كەدەيلەردى سۇيەمەلدەۋدەگى 5000نان استام تاۋىقتىڭ ونىمدىلىگى ەسەلەپ ارتتى

    

    گازەتىمىزدىڭ جالپىلىق اقپارات قۇرالدارى تىلشىلەرى جاڭ جىلي، رايدا

  بىرنەشە كۇننەن بەرى ياركەن اۋدانى ودانلىق قالاشىعى جاڭا ارىق قىستاعىنىڭ تۇرعىنى يمامنياز قۇدىرات شىلان ورمانىنىڭ ماڭىندا اينالىپ ءجۇردى، ول شىلاندى كورگەلى ەمەس، قايتا شىلان اعاشىنىڭ تۇبىندەگى قىزىل ايدارلى ”شىلان جەرگىلىكتى تاۋىعىن“ كورگەلى كەلگەن بولاتىن.

  شىلان ورمانىندا ءوسىپ - جەتىلگەنىنە جارتى جىل بولعان جەرگىلىكتى تاۋىقتار شەتىنەن سەمىرىپ مامىرلاپ ءجۇر. ولارعا ”شايۇيحۇڭگۋان“ ماركاسى جاپسىرىلعاننان كەيىن 2 كۇندە ءبىر اۆتوموبيلمەن ءۇرىمجى جانە ىشكى وڭىرلەر بازارىنا جونەلتىلەدى، ءاربىرى 150 يۋان، ادەتتەگى ەتتى تاۋىق باعاسىنان ءبىر ەسە جوعارى.

  11 - ايدىڭ 9 - كۇنى يمامنياز اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسىنەن جاڭا ارىق قىستاعىندا تۇراتىن ءبىرىنشى شۋجي حى جيانشىڭدى ى زدەپ بارىپ: ”حى شۋجي، ءسىزدىڭ ويلاپ تاپقان شىلان باعىندا تاۋىق باعۋ ءادىسىڭىز توتەنشە جاقسى ەكەن، سوڭعى جىلدارى شىلان باعاسى ارزان بولدى، ال تاۋىق باعۋدان كوپ كىرىس تابۋعا بولادى. كەلەر جىلى مەن دە شىلان باعىندا تاۋىق باعايىن دەپ تۇرمىن“، - دەدى.

  حى جيانشىڭ يمامنيازدىڭ ءوتىنىشىن قۋانا ماقۇلدادى ءارى ياركەن جۇڭفۋ اۋىل شارۋاشىلىق عىلىم - تەحنيكا شەكتى جاۋاپكەرلىك سەرىكتەستىگىنىڭ جاۋاپتىسى ۋاڭ حۋنيانعا: ”شارۋالاردا تاۋىق باعىپ كىرىستى ارتتىرۋ تىلەگى بولادى ەكەن، ءسوز جوق، ولاردىڭ باعىمشىلىق تەحنيكاسىن يگەرۋىنە كومەكتەسىپ، تاۋىق باعىمشىلىعى شارۋاشىلىعىن دامىتۋ كەرەك“، - دەپ تاپسىردى.

  ياركەن جۇڭفۋ اۋىل شارۋاشىلىق عىلىم - تەحنيكا شەكتى جاۋاپكەرلىك سەرىكتەستىگى بيىل 300 مىڭ ”شىلان جەرگىلىكتى تاۋىعىن“ سىناق رەتىندە باعىپ، شارۋا وتباسىلارىمەن قول ۇستاسا 2 ميلليوننان استام تاۋىقتى باقتى، ساتىلۋ سوماسى 100 ميلليون يۋاننان اسادى دەپ مەجەلەنۋدە، 17 قىستاقتاعى مىڭنان استام شارۋا وتباسىن كىرىستى ارتتىرۋعا باستادى. مۇنان سىرت، ۇزدىكسىز ۇلعايعان تاۋىق باعىمشىلىعى كولەمىن توڭىرەكتەي وتىرىپ، سەرىكتەستىك تاعى جۇمىرتقا سالاتىن تاباق زاۆودى، جەتىلدىرۋ فەرماسى، ورگانيكالىق تىڭايتقىش زاۆودى، سويىسحانا سياقتىلاردى سالىپ، 300 نەشە قىستاق تۇرعىنىن جۇمىستانۋعا باستادى.

  ۋاڭ حۋنيان اسەرلەنە: تاۋىق باعىمشىلىعى ياركەن اۋدانىنىڭ ءبىر ماڭىزدى كاسىپ سالاسىنا اينالدى. ايتسەدە بۇل كاسىپ سالاسىنىڭ 2 جىلدىڭ الدىنداعى 5000 نەشە كەدەيلەردى سۇيەمەلدەۋ تاۋىعىنان باستالعانى كىمنىڭ ويىنا كەلەدى دەيسىز، - دەدى.

  2018 - جىلدىڭ باسىندا حى جيانشىڭ جاڭا ارىق قىستاعىنا كەدەيلەردى سۇيەمەلدەۋ قىزمەتىن ورىستەتۋگە كەلگەن كەزدە قىستاقتا كاسىپ سالاسى ارقىلى دەم بەرۋدىڭ جەتەرسىز، قىستاق تۇرعىندارىندا تەحنيكا جانە بايۋ سەنىمى كەمشىل ەكەندىگىن بايقايدى. ۇعىسۋ ارقىلى قىستاقتاعى شياڭ گۇيليننىڭ تاۋىق باعىمشىلىعى ارقىلى كىرىستى ارتتىرعىسى كەلەتىندىگىن بىلەدى. حى جيانشىڭ بازارعا تولىق تەكسەرۋ - زەرتتەۋ جۇرگىزگەننەن كەيىن جەكە دارا ىستەۋدەن كاسىپ سالاسى قالىپتاسپايدى، جۇرتتى بىرگە تاۋىق باعىپ، بىرگە بايۋعا جۇمىلدىرۋ كەرەك دەپ قارايدى.

  قىستاق تۇرعىندارى تاۋىق باعىپ كورمەگەن، اقشا شىعارىپ حاۋىپ - قاتەر ارقالاۋدى قالامادى. قىستاق كوللەكتيۆىندە اقشا جوق، سونىمەن حى جيانشىڭ جانىنان 30 مىڭ يۋان اقشا شىعارادى، قىستاقتا تۇراتىن جوعارى مەكتەپ وقىتۋشىلارى دا 8000 يۋان اقشا شىعارادى، ولار ءبىر بوس جاتقان سيىر قورانى تاۋىق قوراسىنا اينالدىرىپ، 5400 شوجە ساتىپ اكەلىپ، شياڭ گۇيلين بىرنەشە قىستاق تۇرعىنىن باستاپ سىناق رەتىندە باعادى.

  قالىڭ قىستاق تۇرعىندارىن تاۋىق باعىمشىلىعى تەحنيكاسىن ۇيرەنۋگە باستاۋ، قىستاق تۇرعىندارىنىڭ كەدەيلىكتەن ارىلۋ تانىمىن كۇشەيتۋ ءۇشىن حى جيانشىڭ قىستاق تۇرعىندارىن جارنا قوسۋعا، ءار وتباسىن 500 يۋان قارجى شىعارىپ، 100 شوجە ساتىپ الۋعا جۇمىلدىرىپ، شوجەلەر ۇلكەيىپ ساتىلعاننان كەيىن سول اقشانىڭ قايتارىلىپ بەرىلۋمەن بىرگە، پايدانىڭ بولىسكە سالىناتىندىعىن ايتادى. ءبىراق تاۋىق باعىپ كورمەگەن، جارنا قوسىپ، پايدانى بولىسكە سالۋ ۇلگىسىن ءتىپتى دە ەستىپ كورمەگەن قىستاق تۇرعىندارى ونىڭ سوزىنە سەنبەيدى. ەڭ سوڭىندا بىرنەشە قىستاق تۇرعىنى حى جيانشىڭنىڭ جانىنان اقشا شىعارىپ، كوپشىلىكتىڭ كەدەيلىكتەن ارىلۋ جولىن ىزدەستىرۋىنە كومەكتەسۋ ادىسىنەن اسەرلەنىپ، باستاماشىلدىقپەن جارنا قوسادى.

  3 ايعا جەتپەي 5000نان استام كەدەيلەردى سۇيەمەلدەۋ تاۋىعى ساتىلىپ، وزىندىك قۇنىن شىعارىپ تاستاعاندا ءار تاۋىقتان 8 يۋان پايدا قالادى. حى جيانشىڭ تۇسكەن اقشادان جارنا قوسقان شارۋا وتباسىلارىنا پايدا ءبولىپ بەرەدى، اقىل روزى قاتارلى جارنا قوسقان شارۋالار ءوز كوزدەرىنە وزدەرى سەنبەيدى: كەزىندە قوسقان 500 يۋان جارنا اقشا قازىر 1300 يۋان بولدى، سونىمەن ولار تاباندا بۇل اقشانى جالعاستى جارناعا قوساتىندىعىن بىلدىرەدى. 2 - توپتاعى شوجەلەر ساتىپ اكەلىنگەننەن كەيىن جارنا قوسقان شارۋا وتباسىلارى 40قا مولايادى.

  3 - توپتاعى، 4 - توپتاعى... قىستاق تۇرعىندارىنىڭ بارلىعى دەرلىك تاۋىق باعىمشىلىعىنا ات سالىسىپ، ءىشىنارا قىستاق تۇرعىندارىنىڭ جىلدىق پايدا ءبولىسى 10 مىڭ يۋانعا جەتەدى. بارا - بارا باسقا قىستاقتار دا وسى ۇلگىنى قولدانىپ تاۋىق باعادى. وسىدان كەيىن باعىمشىلىق فەرماسى ۇزدىكسىز كوبەيىپ، اۋىل شارۋاشىلىعىن كاسىپ سالالاندىرعان كاسىپورىندار ات سالىسىپ، تاۋىق باعىمشىلىق سەلبەستىك كووپەراتيۆتەرى قۇرىلىپ، تاۋىق ەتىنىڭ، جۇمىرتقانىڭ ءونىم مولشەرىنىڭ ارتۋ جانە قاتىستى كاسىپ سالاسىنىڭ دامۋىن جەتەكتەۋ قارقىنى ونىمدىلىكتى ەسەلەپ ارتتى.

جاۋاپتى رەداكتور: نۇربولات قابىل
  • 1
  • 2
  • 3
  • 4