شەشۋشى شايقاستىڭ شەشۋشى جەڭىسىنە جەتىپ، قامال ىشىندەگى قامالدى الدى

شەشۋشى شايقاستىڭ شەشۋشى جەڭىسىنە جەتىپ، قامال ىشىندەگى قامالدى الدى

− رايونىمىزداعى ەڭ سوڭعى 10 كەدەي اۋداننىڭ كەدەيلىك قالپاعىن الۋ بايلانىسىمەن

گازەتىمىزدىڭ جالپىلىق اقپارات قۇرالدارى تىلشىلەرى جاڭ جىلي، ليۋ ي

  9 - ايدىڭ 20 - كۇنى جۇمىسشى - قىزمەتشىلەر شەريا اۋدانى شينجياڭ وۋجينيا توقىماشىلىق شەكتى سەرىكتەستىگىنىڭ سەحىندا قىزمەت ىستەۋدە. وسى سەرىكتەستىك جەرگىلىكتى ورىنداعى ارحيۆ تۇرعىزىلىپ، كارتچكالاندىرىلعان كەدەي قىستاق تۇرعىندارىن بەلسەنە جۇمىستاندىردى، 193 كەدەي قىستاق تۇرعىنى ورنىقتى جۇمىستانۋدى جانە كىرىستى ارتتىرۋدى جۇزەگە اسىردى.

□ سۋرەتتى گازەتىمىزدىڭ جالپىلىق اقپارات قۇرالدارى ءتىلشىسى زوۋ ي تۇسىرگەن

  شايقاس دابىلىنان شات حابار تارالدى، ۇمتىلىستان مول تابىسقا قول جەتتى. 11 - ايدىڭ 14 - كۇنى اۆتونوميالى رايوندىق حالىق ۇكىمەتى «ياركەن قاتارلى 10 كەدەي اۋداننىڭ كەدەيلىك تىزىمىنەن شىعۋى تۋرالى حابارلاندىرۋدى» تاراتتى، بۇل وتانىمىز تەرريتورياسى كولەمىنىڭ التىدان ءبىرىن يەلەيتىن شينجياڭدا مۇلدەم كەدەيلىك ماسەلەسىنىڭ تاريحي شەشىم تاپقاندىعىن كورسەتەدى.

  كەدەيلىكتەن ارىلتۋدان قامال الۋ سوڭىنا قانشا تاياعان سايىن سونشا ماشاقاتتى بولدى. كەدەيلىكتەن ارىلتۋدان قامال الۋدىڭ اياقتالاتىن جىلى رايونىمىز جاڭا تيپتى ايدارشا ۆيرۋس وكپە قابىنۋ ىندەتىنىڭ ءتيىمسىز ىقپالىنا توتەپ بەرىپ، ”كەدەيدىڭ ىشىندەگى كەدەيگە، قيىنشىلىقتىڭ ىشىندەگى قيىنشىلىققا، قيىننىڭ ىشىندەگى قيىنعا، قامال ىشىندەگى قامالعا“ جاتاتىن 10 كەدەي اۋدانداعى 165 مىڭ 800 كەدەي حالىقتىڭ كەدەيلىكتەن ارىلۋىنا شىنايى كەپىلدىك ەتۋى، سونداي - اق كەدەيلىك قالپاعى الىنعان 25 اۋداننىڭ، كەدەيلەردى سۇيەمەلدەۋ مىندەتى بار 44 كەدەي ەمەس اۋداننىڭ كەدەيلىكتەن ارىلتۋ تابىستارىن بەكەمدەۋى كەرەك، ۋاقىت تىعىز، مىندەت اۋىر، تالاپ قاتاڭ، ولشەم جوعارى بولدى.

  جاپا - ماشاقاتتىڭ شىڭداۋى ادامنىڭ تابىسقا جەتۋىنە دەم بەرەدى. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ شىنايى قامقورلىعىندا، اۆتونوميالى رايوندىق پارتكومنىڭ پارمەندى باسشىلىعىندا، ورتالىق پەن مەملەكەت ورگاندارىنىڭ، ورتالىقتاعى كاسىپورىنداردىڭ، شينجياڭعا باعىتتامالى كومەكتەسەتىن ولكە - قالالاردىڭ قالتقىسىز كومەگىندە، بۇكىل رايونداعى ءار دارەجەلى پارتيا ۇيىمدارى مەن قالىڭ پارتيالى كادرلار نىسانادان جازباي، ولشەمگە تاباندى بولىپ، قايراتتى ارىنمەن، قولايلى جاعدايدان ۇتىمدى پايدالانىپ، قامال الۋ جاۋاپكەرشىلىگىن قاتايتىپ، دالمە - ءدال شارالاردى كۇشەيتىپ، ەڭ سوڭعى ماشاقاتتى تۇيىندەردى بار كۇشپەن جەڭىپ، ۇلكەن شايقاس، ۇلكەن سىناقتا تولىمدى جاۋاپناما تاپسىردى.

حالىق تۇرمىسىنا ءمان بەرىپ، قامتاماسىزداندىرۋ قابىلەتىن كۇشەيتتى

  كەدەيلەردى سۇيەمەلدەۋ جوسپارى − حالىق تۇرمىسىنىڭ نەگىزى. كەدەيلىكتەن ارىلتۋدان قامال الۋ سوڭعى ساتكە وتكەن كەزدە، رايونىمىز نازاردى اۋىر كەدەي وڭىرلەر مەن ەرەكشە كەدەي قاۋىمعا ونان ارى شوعىرلاندىرىپ، نازاردى ”ەكىدەن تارىقتىرماۋ، ءۇشتى قامتاماسىز ەتۋ“ نىساناسىنىڭ ولشەمدەرىنە شوعىرلاندىرۋعا تاباندى بولىپ، كەدەيلىكتەن ارىلتۋدان قامال الۋ شايقاسىنىڭ جەڭىسىنە باتىل تۇردە دەر كەزىندە قول جەتكىزدى.

  ”بيىل 6 - ايدا ءپايزاۋات اۋدان قالاشىعىندا، اۋىلدارىندا اۋىز سۋ حاۋىپسىزدىگى ينجەنەرياسى بويىنشا جالپى بەتتىك سۋ جەتكىزىلىپ، بارلىق وتباسى حاۋىپسىز اۋىز سۋىن ىشەتىن بولدى...“، 10 - ايدىڭ 16 - كۇنى تۇستەن كەيىن ءپايزاۋات اۋدانى جامباز اۋىلى يىپەكچى قىستاعىنداعى ساقا پارتيا مۇشەسى تۇرسىن قادىر تىلشىگە سوڭعى جىلداردا پارتيا مەن ۇكىمەتتىڭ بۇقارانىڭ مۇڭ - مۇقتاجىن ەستەن شىعارماي، كوپتەگەن حالىق تۇرمىسى ماسەلەسىن شەشىپ، قىستاق تۇرعىندارىنىڭ تۇرمىسىن بارعان سايىن جاقسارتقاندىعىن ايتتى.

  ءپايزاۋات اۋدانىنىڭ قونىس جاڭالاپ ورنالاستىرۋ تۇرعىندار شاعىن اۋماعىنىڭ نەگىزدىك قۇرىلعىلارى تولىقتانىپ، بارلىق جەردەن ءداۋىر لەبى ەسەدى. قونىس جاڭالاپ ورنالاستىرىلعان وتباسىلارى قونىس ورتاسىنىڭ جاقسى ەكەندىگىن، كوپتەگەن ساياساتتان يگىلىكتەنگەندىكتەرىن، جۇمىس ىستەپ اقشانى تەز تاپقاندىقتارىن، باقىت كورسەتكىشتەرىنىڭ جوعارىلاعانىن القادى.

  ىشەر اس، كيەر كيىمنەن تارىقپادى، مىندەتتى وقۋ - اعارتۋ قامتاماسىز ەتىلدى، نەگىزدىك ەمدەۋ قامتاماسىز ەتىلدى، تۇرعىن ءۇي حاۋىپسىزدىگى قامتاماسىز ەتىلدى − كەدەي حالىقتىڭ ”ەكىدەن تارىقپاۋىن، ۇشتە قامتاماسىز ەتىلۋىن“ ورنىقتى تۇردە جۇزەگە اسىرۋ − مۇلدەم كەدەيلىكتەن ارىلتۋدىڭ بەلگىسى، كەدەيلىكتەن ارىلتۋدان قامال الۋ شايقاسىنىڭ ساپاسىمەن تىكە قاتىستى. سوڭعى جىلدارى ءتۇرلى ساياساتتىق كومەكتەسۋدىڭ، سۇيەمەلدەۋدىڭ جانە ءار جاقتاعى كۇشتەردىڭ قولداۋىندا وڭتۇستىك شينجياڭداعى 4 ايماق - وبلىستاعى 10 اۋىر كەدەي اۋدان زەيىن - زەردە، كۇش - قۋاتتى ۇيىستىرا وتىرىپ حالىق تۇرمىسى قۇرىلىسىن ىلگەرىلەتىپ، بۇقارانىڭ ىرىس - قۇتىن ارتتىرىپ، حالىق تۇرمىسىنداعى ءاربىر ناقتى ءىستى جۇرت سۇيىنەتىندەي ىستەدى.

  شەريا اۋدانىنىڭ جاراتىلىستىق ورتاسى ناشار، جاسىل القاپ كولەمى نەبارى %2.9تى ۇستايتىن، ونىڭ ۇستىنە جول قاتىناسى دا وتە قولايسىز ەدى. سوڭعى جىلدارى شەريا اۋدانى ەمدەۋ، وقۋ - اعارتۋ، تۇرعىن ءۇي، قونىس ورتاسى سياقتىلاردى شىعار ءتۇيىن ەتىپ، قامتۋ اياسى اناعۇرلىم كەڭ، ءتاسىلى اناعۇرلىم يكەمدى، باياندىلىعى كۇشتى، قازىرگى ساتىداعى اۋىل - قىستاقتىڭ دامۋىنىڭ ءىس جۇزىندىك جاعدايىنا ۇيلەسەتىن تومەنگى شەكتەن تۇسىرمەي قامتاماسىز ەتۋ شارالارىن اتقارىپ، كەدەيلىكتەن ارىلتۋدان قامال الۋ جولىندا حالىق تۇرمىسىن ”قامتاماسىزداندىرۋ تورىن“ بەرىك توقىدى.

  44 جاستاعى ءماتتۇرسىن ءماتتوحتى شەريا اۋدانى شەريا قالاشىعى كوكمەت قىستاعىنىڭ تۇرعىنى. بيىل ول اۆتوكولىك شىرعالاڭىنا ۇشىراپ اياق سۇيەگى سىنىپ شيپاحاناعا تۇسەدى، 3 رەت وپەراتسيا جاساتىپ اياعىن امان الىپ قالادى. كەدەيلىكتەن ەندى عانا ارىلعان ارحيۆ تۇرعىزىلىپ، كارتچكالاندىرىلعان كەدەي وتباسى رەتىندە، ”الدىمەن ەمدەلىپ اقىنى ارتىنان تولەۋ“ جانە ”ءبىر بەكەتتىك ەسەپ جابۋ“ ساياساتى بويىنشا، ول كەپىلگە ەمدەۋ اقىسىن قويمادى، تەك شيپاحانادان شىعاتىن كەزدە ەسەپتەن كوتەرىلگەننەن كەيىنگى جەكە ءوزى تولەيتىن بولىگىن عانا تولەيتىن بولادى. ءسويتىپ، اۋداننىڭ سالماقتى ناۋقاستاردى ەمدەۋدى قامتاماسىزداندىرۋ ساياساتى بويىنشا ول ءوز جانىنان 2000 يۋانعا جەتپەيتىن ەمدەۋ قاراجاتىن تولەيدى.

  ”ەكى بالام پارتيانىڭ وقۋ - اعارتۋ ارقىلى حالىققا تيىمدىلىك جاساۋ ساياساتىنىڭ يگىلىگىن كورىپ، بالاباقشادان تولىق ورتا مەكتەپكە دەيىنگى وقۋدى ءساتتى اياقتاتتى“، - دەدى لوپ اۋدانى اڭگيا قالاشىعى حورازتوعىراق قىستاعىنىڭ تۇرعىنى ارالي پەردۇن قۋانا.

  سوڭعى جىلدارى لوپ اۋدانى وقۋ - اعارتۋ ارقىلى كەدەيلەردى سۇيەمەلدەۋدى تۇبىرىنەن وڭاۋ شاراسى ەتىپ، كەدەيلەردىڭ بالالارىنىڭ تاماشا نەگىزدىك وقۋ - اعارتۋدان يگىلىكتەنىپ، جۇمىستانۋ، شارۋاشىلىق قۇرۋ قابىلەتىن ازىرلەپ، كەدەيلىكتى ۇرپاقتان - ۇرپاققا جالعاستىرماي ءۇزىپ تاستاۋىنا قۇلشىنا شىنايى كەپىلدىك ەتتى. قازىر بۇكىل اۋدان تەگىن وقۋ - اعارتۋ مەن كەدەي ستۋدەنتتەرگە قارجىلاي كومەكتەسۋ ساياساتىن جالپى بەتتىك تياناقتاندىردى. سونىمەن بىرگە، كاسىپتىك وقۋ - اعارتۋدى كۇشەيتىپ، ”باۋلۋدى يگەرۋ، شەبەرلىكتى جوعارىلاتۋ، جۇمىستانۋدى جەبەۋ، كىرىستى ورنىقتىرۋ“ ۇستانىمىمەن بىرلەستىرىپ، وقۋشىلاردىڭ جۇمىستانۋ توقتامى كەلىسىمى بار كاسىپورىندارعا بارىپ جۇمىسقا شىعىپ پراكتيكا جاساپ، الدىن الا جۇمىستانۋ مەن پراكتيكانىڭ ساڭلاۋسىز ۇشتاسۋىن جۇزەگە اسىردى.

دامۋدى جەبەپ، ”قان جاساۋ“ كومەسكى كۇشىن ىشكەرىلەي اشتى

  كاسىپ سالاسىن دامىتۋ − كەدەيلىكتەن ارىلتۋدى جۇزەگە اسىرۋدىڭ ءتۇبىرلى شاراسى. وڭتۇستىك شينجياڭداعى 4 ايماق - وبلىستا ”جەتى ءبىر توپتى“ تىڭعىلىقتى ىلگەرىلەتۋ بارىسىندا كاسىپ سالاسى ارقىلى كەدەيلىكتەن ارىلتۋدىڭ ءونىمى كورنەكتى بولدى. كاسىپ نەگىزى سالىستىرمالى ءالسىز، كەدەيلىك قالپاعى الىنباعان 10 كەدەي اۋدان جونىنەن ايتقاندا، كاسىپ سالاسى ارقىلى كەدەيلىكتەن ارىلتۋ − ”قان بەرۋ“ ءارى ”قان جاساۋ“ بولىپ تابىلادى.

  اقتاۋ اۋدانى جەرگىلىكتى جاعدايعا قاراي ىستەپ، ەگىمشىلىك قۇرىلىمىن بەلسەنە رەتتەپ، جەردى جۇيەلى اينالىمعا سالۋدى ۇزدىكسىز ىلگەرىلەتتى. قازىرگە دەيىن بۇكىل اۋداندا 422 كاسىپتىك سەلبەستىك كووپەراتيۆى قۇرىلىپ، 100 مىڭ مۋ جەر بىرىكتىرىلىپ، ”ءبىر قىستاقتا ءبىر ءونىم بولۋ، ءبىر اۋىلدا ءبىر كاسىپ سالاسى بولۋ“ سىندى كاسىپ سالاسى ارقىلى كەدەيلەردى سۇيەمەلدەۋ ارناسى قالىپتاستى.

  اۋىل شارۋاشىلىعىن كاسىپ سالالاندىرعان باستاماشى كاسىپورىنداردى تىرەك ەتكەن اقتاۋ اۋدانى جامالتەرەك اۋىلى ەلەۋسىز قارالعان قانت قىزىلشا ەگىمشىلىگىن شارۋا وتباسىلارىنىڭ كىرىستى ارتتىرىپ، كەدەيلىكتەن ارىلۋىنداعى جاڭا ارناسىنا اينالدىردى. بۇل اۋىل - قىستاقتىڭ كوللەكتيۆ جەرى مەن يگەرىلگەن تىڭ جەردى بىرىكتىرىپ، ”پارتيا ۇيىمى + كاسىپورىن + شارۋا وتباسى“ ۇلگىسىن قولدانىپ، قاشقار اۋدۋ قانت شارۋاشىلىعى شەكتى سەرىكتەستىگىمەن كوتەرمەگە بەرۋ توقتامىن جاساستى. سەرىكتەستىك قانت قىزىلشاسى ەگىمشىلىك اتىزىن باسقارۋدى شارۋا وتباسىلارىنا كوتەرمەگە بەرىپ، شارۋالاردىڭ كىرىستى ارتتىرۋ ارناسىن كەڭەيتتى. قانت قىزىلشاسى ءونىمىن جيناۋ مەزگىلىندە، بۇكىل اۋىلداعى 3500 مۋ جەردەگى قانت قىزىلشاسىنىڭ مۋ باسىندىق ءونىمى 5 توننادان ارتىپ، كىرىس 8 ميلليون يۋاننان استى.

  10 اۋىر كەدەي اۋدان كاسىپ سالاسىن جەتىلدىرۋدى كەدەيلىكتەن ارىلتۋدان قامال الۋدى ىلگەرىلەتۋدىڭ ءتۇبىرلى شىعار جولى ەتۋگە تاباندى بولىپ، وزىندىك باسىمدىقتى تياناق ەتىپ، كاسىپ سالاسىن دامىتۋ جوباسىن كەمەلدەندىرىپ، اناعۇرلىم كوپ كاسىپورىندى قارجى قوسىپ زاۆود سالۋعا باۋراپ، كەدەي بۇقارانىڭ سول جەردە، جاقىن ماڭدا جۇمىستانۋىن جۇزەگە اسىرىپ، بارلىق ادامنىڭ ىستەيتىن ءىسى بولۋدى، بارلىق وتباسىنىڭ كىرىسى بولۋىن، بارلىق وتباسىنىڭ كىرىسىنىڭ ارتۋىن قۇلشىنا جۇزەگە اسىردى.

  ”قازىر مەنىڭ كىرىسىم تۇراقتى، كۇندەرىم بۇرىنعىدان كوپ جاقساردى. ءوزىڭ ايتشى، وسىلاي بولعاندا كەدەيلىكتەن قالاي ارىلماسقا؟“، - دەدى گۇما اۋدانى كىلىياڭ اۋىلى يۇلعۇنجاي قىستاعىنىڭ تۇرعىنى سالامات تۇرۇپ. بۇرىن ول ايەلى ەكەۋى تۇس - تۇستا ۇساق - تۇيەك جۇمىس ىستەپ، اي بويى ارىپتالاسقاندا ۇزاعاندا 2000 يۋان كىرىس كىرگىزەتىن. گۇما اۋدانى حىجيا جاڭا قىستاعى ولشەمدەندىرىلگەن ەسەك باعىمشىلىق ورتالىعىنىڭ جۇمىسشىسى بولعاننان كەيىن، سالاماتتىڭ ءوزىنىڭ ايلىق ەڭبەكاقىسى 2500 يۋان بولدى.

  ورنىقتى كىرىس، ورنىقتى جۇمىستانۋ ورنىقتى دامىعان كاسىپ سالاسىنان كەلەدى. جاقىنعى جىلداردان بەرى گۇما اۋدانى ”ون، ءجۇز، مىڭ، ون مىڭ، ءجۇز ميلليون“ كاسىپ سالالاندىرۋ جوباسى بويىنشا، ەسەك، قاز، قوي، قويان، ازىقتىق ساڭىراۋقۇلاق سياقتى كاسىپ سالالارىن دامىتۋدى ۇزدىكسىز ىلگەرىلەتتى، باستاماشى كاسىپورىنداردىڭ جەتەكتەۋىن تياناق ەتىپ، كاسىپ سالالارىنىڭ بايۋعا باستاۋ قابىلەتى ۇزدىكسىز ارتتى. كەزەكتە، گۇما اۋدانى 42 مىڭ ەسەك، 6 ميلليون قاز، 9 ميلليون قويان، 180 مىڭ كوپ ءتولدى قوي باعىمشىلىعى سياقتى باستاماشى كاسىپ سالاسىن ورنالاستىرىپ، بۇكىل اۋدانداعى 31 مىڭ وتباسىنداعى 120 مىڭعا جۋىق ادامدى كەدەيلىكتەن ارىلىپ، كىرىستەرىن ارتتىرۋعا باستادى.

  ياركەن اۋدانى ودانلىق قالاشىعى راۋاتوستەڭ قىستاعى كەپتەر باعىمشىلىق بازاسىندا 20 جاستاعى اماننيسا قادىر 3000نان استام مامىق كەپتەردى زەر سالا باعۋدا. ”ىستەگەنىمە ءبىر جىل بولدى، ەڭبەكاقىم اي سايىن ارتىپ كەلەدى، باعىمشىلىق تەحنيكاسىن دا ۇيرەنىپ الدىم“، - دەدى ول.

  ياركەن اۋداندىق پارتكومنىڭ ورىنباسار شۋجيى، اۋدان اكىمى ابدۇعيني مامەت بىلاي دەپ تانىستىردى: جاقىنعى جىلداردان بەرى ياركەن اۋدانى كاسىپ سالاسىن دامىتۋ ارقىلى جۇمىستاندىرۋدى جەبەۋدى نەگىز، ۇكىمەت قىزمەت وتەۋدى ساتىپ الىپ جۇمىستانۋ ورنىن اشۋدى تولىقتاما ەتىپ، 6 ءىرى باقشا رايونىنا، اۋىل - قىستاق سەحىنا ارقا سۇيەي وتىرىپ، ەڭبەك شوعىرلى سيپاتتى كاسىپتەردى دامىتۋ ارقىلى اۋىل - قىستاقتاعى ”ون شاعىن“ قىزمەت وتەۋ كاسىبىن قولداۋ سياقتى كوپ ءتۇرلى تاسىلدەر قولدانىپ، 100 مىڭعا جۋىق قيىنشىلىعى بار وتباسىلارىنداعى ەڭبەككۇشتەردىڭ ورنىقتى جۇمىستانۋىن جۇزەگە اسىردى.

  كەزىندە قۇمدى ءشول سەبەبىنەن كەدەيلەسكەن كەريا اۋدانىنىڭ قازىر بارلىق جەرىنەن قۇمدى ءشول ەرەكشەلىگىنە يە كاسىپ سالالارىن كەزدەستىرۋگە بولادى. جەرگىلىكتى ورىن ءوز ەرەكشەلىگىن تياناق ەتىپ، راۋشان گۇلى، بارقىت ءشوپ، كوپ ءتولدى سويىس قوي، اعاش ساڭىراۋقۇلاعى سياقتى ەرەكشەلىككە يە كاسىپ سالالارىن ءتۇيىندى دامىتتى، ءاربىر اۋىل - قالاشىقتا تۇگەلدەي بىردەن ارتىق ەرەكشەلىككە يە كاسىپ سالاسى بار بولىپ، اۋدان، اۋىل، قىستاق ءۇش دارەجەلى ورىندى كاسىپ سالاسىمەن تۇگەلدەي قامتۋدى جۇزەگە اسىردى. ەرەكشەلىككە يە كاسىپ سالاسى جەرگىلىكتى ورىننىڭ كەدەي بۇقارانى كەدەيلىكتەن ارىلتىپ، كىرىسىن ارتتىرۋعا جەتەكشىلىك ەتەتىن پارمەندى تىرەگىنە اينالدى.

كىرىستى ورنىقتى ارتتىرىپ، ىشكى قوزعاۋشى كۇشتى كۇشەيتتى

  كەدەيلەردى سۇيەمەلدەۋدە الدىمەن ەرىك - جىگەر جاعىنان سۇيەمەلدەۋ، كەدەيلەردى سۇيەمەلدەۋدە، ءسوز جوق، اقىل - پاراسات جاعىنان سۇيەمەلدەۋ كەرەك. 10 اۋىر كەدەي اۋدان ولقىلىقتاردى تولىقتاۋ، ءالسىز تۇستاردى كۇشەيتۋ، كەدەيلىكتەن ارىلتۋ جاۋاپناماسىن جوعارى ساپامەن جاقسى تاپسىرۋ بارىسىندا، ىشكى قوزعاۋشى كۇش جەتىسپەۋ سىندى ولقىلىقتى تولىقتاۋعا باستان - اياق ءمان بەردى.

  ”قازىر قىستاقتا نەگىزىنەن بوس ادام جوق. قىستاقتىڭ ماڭىنداعى زاۆودتا جۇمىس ىستەۋىنە بولادى، كوپشىلىك تۇگەلدەي قۇلشىنا جۇمىس ىستەپ، اقشا تابۋدا. كورشىم ابىلەت الىمجاننىڭ بۇرىن ەلەكترسيكل ساتىپ الۋعا دا شاماسى جەتپەيتىن، زاۆودتا جۇمىس ىستەگەننەن كەيىن، جەڭىل اۆتوكولىك ساتىپ الۋمەن قاتار، تاعى ءدارى - دارمەك دۇكەنىن اشپاقشى“، - دەدى قاراقاش اۋدانى شينجياڭ مەيبيتى توبى شەكتى سەرىكتەستىگى، رەتتەۋ 2 - ءبولىمى سەحىنىڭ مەڭگەرۋشىسى مامەتابدۇللا اسەن وزىندەگى جانە ماڭىنداعىلارداعى وزگەرىستى دامىلسىز تىلگە الدى.

  كەدەي وتباسىلارىنىڭ ىشكى دامۋ قوزعاۋشى كۇشىن قاۋلاتىپ، ”كاسىپ ارقىلى ادامدى ورنىقتىرۋدى، كاسىپ ارقىلى ادامدى ورنالاستىرۋدى“ جۇزەگە اسىردى، قاراقاش اۋدانى ”ءتىزىم ۇلگىسىندە“ باۋلۋ، باعىتتامالى باۋلۋ، ناقتى امالياتتىق باۋلۋ ورىستەتىپ، ىستەۋ ارقىلى جاتتىقتىرىپ، تۇرلىشە ەرەكشەلىگى بار ەڭبەكشىلەرگە وزدەرىنە ۇيلەسىمدى جۇمسىتانۋ ورايىن جاراتىپ بەردى. سونىمەن قاتار، كەدەيلەردى سۇيەمەلدەۋ ساياساتىن قانىق بىلەتىن ادام، كەدەيلىكتەن ارىلتىپ بايۋعا جەتەكتەيتىن ادام، وركەنيەتتى سالتتى تاراتاتىن ادام باۋلۋ ارقىلى بۇقارانىڭ كەدەيلىكتى جەڭۋ سەنىمىن، بەكىمىن قاۋلاتتى. بيىل الدىڭعى جارتى جىلدا بۇكىل اۋداندا ارحيۆ تۇرعىزىلىپ، كارتچكالاندىرىلعان 22 مىڭ كەدەي وتباسى كاسىپ سالاسىنىڭ جانە نىساننىڭ جەتەكشىلىگىندە كىرىستەرىن ارتتىردى.

  قاعىلىق اۋدانىنىڭ قىزىل انار نان كاسىپ باقشاسىندا ناۋبايلار ماي توقاش، جاڭعاق نان، كۇنجۇت نان، راۋشانگۇلى نانى سياقتى ءتۇرلى دامدەگى نانداردى جابۋدا. قىزمەتكەرلەردىڭ جۇزدەرىنەن سەنىم مەن باقىتتىڭ مۇندالاعانىن، نان كاسىپ باقشاسىنىڭ اۋىل - قىستاقتاعى ناۋايحانالاردى تيجارات تاسىلىنە وزگەرىس ەنگىزۋگە جەتەكتەگەنىن كورگەن قىزىل انار نان كاسىپ باقشاسىنىڭ جاۋاپتىسى اۋىت مامتيمىن اسەرلەنە بىلاي دەدى: قاعىلىق اۋدانى شارۋالاردىڭ كىرىسىن ارتتىرۋمەن تىعىز قاتىسى بار نان، جاڭعاق، انار سياقتى كاسىپ سالالارىن دامىتقاننان كەيىن، قالىڭ شارۋالاردىڭ كەدەيلىكتەن ارىلىپ كىرىستەرىن ارتتىرۋ بەلسەندىلىگى جالىندادى، كەدەي وتباسىلارى ”كەدەيلىكتەن ارىلىت“ دەگەن يدەيانى ”كەدەيلىكتەن ارىلامىن“ دەگەن يدەياعا وزگەرتتى، مىنە بۇل ناعىز كەدەيلەردى كەدەيلىكتەن ارىلتۋ، كەدەيلىكتەن شىن ارىلتۋ سانالادى.

  بيىل يىڭسار اۋدانى كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزۋ بارىسىندا ەرىك - جىگەر، اقىل - پاراسات جاعىنان كەدەيلەردى سۇيەمەلدەۋدى قامتىعان ”كەدەيلەردى سۇيەمەلدەۋدىڭ 10 ءىرى ينجەنەرياسىن“ تەرەڭدەتىپ، ەگجەي - تەگجەيلىلەندىرىپ، سىرتقى جانە ىشكى سەبەپ جاعىنان بىرگە كۇش شىعارىپ، كەدەي وتباسىلارىنىڭ ىشكى قوزعاۋشى كۇشىن قاۋلاتىپ، كەدەي وتباسىلارىنىڭ ۇزدىكسىز، ورنىقتى كىرىس ارتتىرۋىنا مۇمكىندىك جاسادى.

  ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ كادرلارى مەن قىستاق كادرلارى وزىق باعىمشىلىق تەحنيكاسىن ۇيرەنگىم كەلەتىنىن بىلگەننەن كەيىن، مەنى شاڭحاي، سۋجوۋ جانە شينجياڭ ىشىندەگى كەيبىر باعىمشىلىق بازالارىنا بارىپ وسىزاماندانعان باعىمشىلىق باسقارۋىن ۇيرەنۋگە ورنالاستىردى. وسى وزىق باسقارۋ ۇستانىمدارىن يگەرگەننەن كەيىن، ءتىپتى كوپ كەدەي وتباسىلارىن بىرگە كىرىستى ارتتىرىپ كەدەيلىكتەن ارىلۋعا جەتەكشىلىك ەتە الاتىن بولدىم“، - دەدى يىڭسار اۋدانى شولپان اۋىلى قازاقارىق قىستاعى باعىمشىلىق كاسىپتىك سەلبەستىك كووپەراتيۆىنىڭ جاۋاپتىسى جاپار ۇرايىم.

  بيىل يىڭسار اۋدانى 40 مىڭ كەدەي حالىقتى اۋىل - قىستاق قولدانىلمالى تەحنيكاسىمەن باۋلۋدى جۇزەگە اسىرىپ، 9880 كەدەي حالىقتى جۇمىستاندىرۋ بويىنشا تەحنيكالىق شەبەرلىككە باۋليدى، شارۋاشىلىق قۇرىپ بايۋعا جەتەكشىلىك ەتكەن 500 ادامدى شارۋاشىلىق قۇرۋ بويىنشا باۋلىپ، كەدەيلىكتەن جالپى بەتتىك ارىلتۋدى اۋىل - قىستاقتاردى گۇلدەندىرۋمەن ءونىمدى ۇشتاستىرۋدى ۇزدىكسىز ىلگەرىلەتۋگە اناعۇرلىم بەرىك نەگىز قالايدى.

جاۋاپتى رەداكتور: 热依扎·海米提