مادەنيەت پەن ساياحات توعىسىپ، شالقي ءتۇستى

 

 گازەتىمىزدىڭ جالپىلىق اقپارات قۇرالدارى ءتىلشىسى جاڭ حايفىڭ 10 - ايدىڭ 26 - كۇنى ۇرىمجىدەن حابارلايدى. ”13 - بەسجىلدىق“ مەزگىلىندە رايونىمىز مادەنيەت پەن ساياحات كاسىپ سالاسىنىڭ توعىسۋ تەبىنىن ۇزدىكسىز كۇشەيتىپ، ساياحات ونىمدەرىنىڭ باۋراۋ قۋاتىن جوعارىلاتۋمەن قاتار، مادەنيەت كاسىپ سالاسىنىڭ زور دامۋىن جەدەلدەتتى. اۆتونوميالى رايوندىق مادەنيەت جانە ساياحات مەڭگەرمەسىنىڭ ساندى مالىمەتىنە نەگىزدەلگەندە، تۇتاس شينجياڭدا مادەنيەت كاسىپ سالاسىنان ۇلگى كورسەتۋ بازاسى 2016 - جىلعى 93تەن 2019 - جىلى 112گە كوبەيىپ، وڭتۇستىك، سولتۇستىك شينجياڭدى قامتىعان. ولار تەك مادەنيەت كاسىپ سالاسىنىڭ شوعىرلانعان ءوڭىرى بولىپ قانا قالماستان، ساياحاتشىلار بارۋدى ارماندايتىن، ءجيى باراتىن كورىنىس وڭىرىنە اينالعان.

  ”13 - بەسجىلدىق“ مەزگىلىندە، اۆتونوميالى رايون جىبەك جولى ەكونوميكالىق بەلدەۋى وزەكتى رايونى مادەنيەت - عىلىم - وقۋ اعارتۋ ورتالىعى قۇرىلىسىن ارقاۋ ەتىپ، «اۆتونوميالى رايوننىڭ مادەنيەت كاسىپ سالاسىن دامىتۋ ارناۋلى جوباسىن (2016 − 2020)» شىعارىپ، شينجياڭ ەرەكشە مادەنيەت كاسىپ سالاسىن سۇيەمەلدەۋ قارجىسىن ورناتىپ، اۆتونوميالى رايون 43 ميلليون 900 مىڭ يۋان مادەنيەت كاسىپ سالاسىن دامىتۋ ارناۋلى قارجىسىن الىپ شىعىپ، رايونىمىزدىڭ مادەنيەت - ساياحات كاسىپورىندارىنىڭ دامۋىن سۇيەمەلدەۋىنە جۇمساپ، ءبىر توپ مادەنيەت - ساياحات كاسىپ سالاسىنىڭ ءتۇيىندى نىسان قۇرىلىسىنا قولداۋ كورسەتىپ، مادەنيەت كاسىپ باقشاسى رايونى قۇرىلىسىنىڭ قارقىنىن ارتتىردى. قازىر تۇتاس شينجياڭدا مەملەكەت دارەجەلى مادەنيەت كاسىپ سالاسىنان ۇلگى كورسەتەتىن 9 بازا بار، مۇنىڭ ىشىندە ءۇرىمجى چيفاڭ كوشەسى تاپقىرلىق كاسىپ سالاسى شوعىرلانعان رايون جانە شينجياڭ حالىقارالىق ۇلكەن بازار ەكەۋى دە جۇڭگو مادەنيەت كاسىپ باقشاسى رايونىنداعى 100 مىقتىنىڭ قاتارىنا ەندى.

  شينجياڭ تاريح، مادەنيەت جانە ۇلتتىق مادەنيەت ءجيى شوعىرلانعان جەر. مادەنيەت پەن ساياحاتتىڭ ىشكەرىلەي توعىسۋىنا ىلەسە، تۇتاس شينجياڭداعى ءارقايسى جەرلەر تاڭداۋلى تاريحي مادەنيەتتەن جانە الۋان ءتۇرلى ۇلتتىق مادەنيەتتەن پايدالانىپ، جاڭا ساياحات قىزۋ تۇيىندەرىن ۇزدىكسىز جارىققا شىعارىپ، جاڭا ساياحات كۇيىن دامىتتى؛ مادەنيەت كاسىپ سالاسى دا ساياحات كاسىبىنەن پايدالانىپ، كاسىپ سالاسىنىڭ دارەجەسىن ۇزدىكسىز جوعارىلاتتى. شينجياڭ حالىقارالىق ۇلكەن بازار العاشىندا تەك ”شينجياڭنىڭ ەرەكشە ونىمدەرى شوعىرلانعان جەر“ بولاتىن، مادەنيەت فاكتورىنىڭ ۇزدىكسىز قۇيىلۋىنا، مادەنيەت رايىنىڭ ۇزدىكسىز قالىپتاسۋىنا ىلەسە، مەملەكەت دارەجەلى مادەنيەت كاسىپ سالاسىنان ۇلگى كورسەتۋ بازاسىنا اينالدى. قازىر ساياحاتشىلار ەڭ ۇناتاتىن ”ينتەرنەتتەگى ايتۋلى“، ءسوزسىز باراتىن جەرگە اينالىپ قانا قالماستان، تۇتاس شينجياڭداعى ەڭ ۇلكەن مادەنيەت جاسامپازدىق ونىمدەرىن توپتايتىن - جونەلتەتىن جەرگە اينالدى، كوزدىڭ جاۋىن الاتىن سان مىڭداعان مادەنيەت جاسامپازدىق ونىمدەرى شينجياڭنىڭ مادەنيەت كاسىپ سالاسىنىڭ زور دامۋىن جاندى ايگىلەدى.

  جۋىق جىلداردان بەرى، تۇتاس شينجياڭدا ساياحات كاسىبىنىڭ قارىشتاي دامۋى مادەنيەت كاسىپ سالاسىنىڭ ىلگەرىلەتكىشىنە اينالدى. تولاسسىز كەلگەن ساياحاتشىلار ءتۇرلى مادەنيەت جاسامپازدىق ونىمدەرىن جانداندىردى، كەيبىر قۇرۋعا تاياعان بەيزاتتىق مادەني مۇرا نىساندارى قايتادان جاندانۋ ورايىنا يە بولىپ قالماستان، ءىرى كاسىپ سالاسى بولىپ دامىدى. اتىلاس توقۋ، بوياۋ ونەرى مەملەكەت دارەجەلى بەيزاتتىق مادەني مۇرا نىسانى، اتىلاس مەكەنى حوتان قالاسى جييا اۋىلىندا بارلىق وتباسى نەگىزىنەن وسى بەيزاتتىق مادەني مۇرانى جالعاستىرۋعا ات سالىسىپ كەلەدى. ەل ءىشى - سىرتىنداعى ساياحاتشىلار وسى ارانى تالاسا - تارماسا ”ءسوزسىز، باراتىن جەرگە اينالدىرعاندىقتان“، اتىلاس جىبەگى جەرگىلىكتى بۇقارانىڭ كەدەيلىكتەن ارىلىپ، بايۋىنداعى ءىرى كاسىپ سالاسىنا اينالدى.

  ءار ۇلت بۇقاراسىنىڭ تاماشا تۇرمىسقا دەگەن تالپىنىسى جاڭا مادەنيەت كاسىپ كۇيىن ۇزدىكسىز قالىپتاستىردى. جۋىق جىلداردان بەرى، باننىڭ كىتاپ دۇكەنىن، زوبيان - يۋبيان كىتاپ دۇكەنىن وكىل ەتكەن ءبىر توپ جاڭا ۇلگىدەگى كىتاپ دۇكەندەرى مەن ءتۇرلى جاڭا ۇلگىدەگى كينوحانالار وڭتۇستىك، سولتۇستىك شينجياڭدا جاڭبىردان كەيىنگى جاۋقازىنداي جارىققا شىعىپ، بۇقارانىڭ مادەنيەت، سەيىل - سەرۋەن تۇرمىس ساپاسىن جوعارىلاتتى ءارى ەكونوميكانىڭ جاڭا ارتۋ تۇيىنىنە اينالدى.

جاۋاپتى رەداكتور: نۇربولات قابىل