قۇمتاعتا ”قۇمنان التىن شايقادى“

  گازەتىمىزدىڭ جالپىلىق اقپارات قۇرالدارى ءتىلشىسى ءرايدا

  ”التىن ءتۇستى قۇمدى - ءشولدىڭ وركەشتەنگەن ايبىنىنا، شەكسىز كورىنىسىنە كوز جىبەرسەڭىز كوڭىل كۇيىڭىز ءبىر جاساپ قالادى“. 10 - ايدىڭ 6 - كۇنى ءپىشان اۋدانى قۇمتاع ايگىلى قۇم كورىنىس وڭىرىندە ساياحاتشى جاڭ شين كوز الدىنداعى قۇمدى - ءشولدىڭ ايبىندى كورىنىسىن كورىپ ەرەكشە تاڭداندى.

  10 - اي كىرگەننەن كەيىن ءپىشان اۋدانىنىڭ اۋا تەمپەراتۋراسى تومەندەگەنىمەن، ساياحاتشىلاردىڭ ىنتاسى تيتتەي دە سۋىنبادى. ”ءدال وسى مەزگىلدىڭ اۋا تەمپەراتۋراسى وتە جاقسى، كۇندىز بۇل جەردە ءبىر كۇن سەيىلدەپ، كەشتە كۇننىڭ باتقانىن تاماشالاپ، ونان جۇلدىزدى اسپان تۇسەلحاناسىنا تۇنەپ جۇلدىزداردى تاماشالاساڭىز كەرەمەت باقىتتى سەزىنەسىز“، - دەدى جاڭ شين.

  ”1 - قازان“ دەمالىسى كەزىندە جاڭ شين وتباسىنداعىلار سياقتى قۇمتاع قۇمدى شولىنە بارىپ ساياحاتتاۋدى تاڭداعان ساياحاتشىلار وتە كوپ بولدى. ”مەرەكە كەزىندە ءبىز قۇمدى - شولدە ايدى تاماشالاۋ، الاۋ شاتتىعىنا شومۋ، جاياۋ ءجۇرىس سياقتىلاردى ورتاعا قويىپ، ساياحاتشىلاردىڭ قارسى الۋىنا يە بولدىق، وتە - موتە، ءبىزدىڭ جۇلدىزدى اسپان تۇسەلحانامىزعا بەرىلگەن تاپسىرىس ءبىر اي بۇرىن تولىپ كەتتى“، - دەدى ءپىشان اۋدانى قۇمتاع ايگىلى قۇم كورىنىسى ءوڭىرىن باسقارۋ كوميتەتىنىڭ ورىنباسار مەڭگەرۋشىسى ۋىن جيڭ.

  قۇمتاع ايگىلى قۇم كورىنىس وڭىرىندە قۇمدى - ءشولدى تاماشالاۋ اۆتوكولىگى، بۇيرات قۇم اۆتوكولىگى، قۇمدى جەر موتوتسيكلى، شىراق سالتاناتى، قۇمنان سىرعاناۋ، قۇمدى - شولدە تۇنەۋ، ”كەشكى كروران“ قۇمدى - ءشول ناقتى كورىنىس كونسەرتى، ءۇش بۇرىشتى توپشى سياقتى سەزىنۋ نىساندارى بار، كورىنىس تاماشالاۋ، جەمىس - جيدەك ءۇزۋ، عىلمي زەرتتەۋ، تەكسەرۋ جۇرگىزۋ، جاھانكەزدىك، فوتو، قۇمدى جەر سپورتى، قۇمدى - ءشول مادەنيەتىن بارىنشا سەزىنۋ ءبىر تۇلعالانعان ايگىلى ساياحات ورنى.

  ”قىستاق مەنىڭ كىرىسىمدى ارتتىرىپ بايۋ جولىنا تۇسۋىمە كومەكتەستى، ساياحاتپەن شۇعىلدانۋ مەنىڭ وتباسىما ۇلكەن وزگەرىستەردى الا كەلدى“، - دەدى ءپىشان اۋدانى ءپىشان قالاشىعى بازار قىستاعىندا تۇراتىن ابدىراحمان حابيبول تۇيەسىنە جەم بەرە تۇرىپ قۋانىشپەن.

  ابدىراحمان ءاسىلى 3 مۋ جەرگە ءجۇزىم ەگۋگە، تۇيە وسىرۋگە سۇيەنىپ وتباسىن اسىرايتىن، تۇرمىسى ءۇپى - ءتاپى ءوتىپ جاتقان ەدى.

  2018 - جىلدىڭ باسىندا قىستاق ”ەكى كوميتەتىنىڭ“ سايكەستىرۋىندە ابدىراحمان وتباسى 4 تۇيەسىن الىپ كورىنىس رايونىنا كىرىپ، ساياحاتشىلاردىڭ سۋرەتكە ءتۇسۋ، تۇيە ءمىنۋ قاجەتىنەن شىعادى. قازىر ونىڭ تۇيە قوسىنى ۇلعايىپ سانى 40قا جەتتى، بىلتىر كىرىسى 60 مىڭ يۋاننان اسىپتى.

  ۋىن جيڭ بىلاي دەپ تانىستىردى: قۇمعا كومىلىپ ەمدەلۋ نىسانى دا ساياحاتشىلاردىڭ قىزۋ قارسى الۋىنا يە بولدى، ءار جىلى 6 - ايدىڭ سوڭعى شەنىنەن 8 - ايدىڭ ورتا شەنىنە دەيىنگى مەزگىل قۇمعا كومىلىپ ەمدەلۋدىڭ ەڭ تاماشا كەزى، ءار كۇنى قۇمعا كومىلىپ ەمدەلەتىن ساياحاتشىلاردىڭ سانى 300دەن اسادى.

  قۇمعا كومىلىپ ەمدەلۋ نىسانى تاعى توڭىرەكتەگى ەرەكشە حالىقتىق تۇسەلحانا، ەرەكشە اس - سۋ، شارۋالار شاتتىعى ساياجايى سياقتىلاردىڭ دامۋىنا تۇرتكى بولىپ، كوپتەگەن قىستاق تۇرعىندارى قۇمدى - ءشول ساياحاتىنا سۇيەنىپ اقشا تاپتى.

  قۇمتاۋ ەتەگىندەگى پيجان قالاشىعى شياۋدۇڭحۋ قىستاعىنىڭ تۇرعىنى يىمارنياز سيت تىلشىگە ءوزىنىڭ حالىقتىق تۇسەلحانا تيجاراتىمەن شۇعىلدانعانىنا 5 جىل بولعانىن، مۇندا قوناتىن ادامداردىڭ باسىم كوبى قۇمعا كومىلىپ ەمدەلۋشىلەر ەكەنىن ايتتى. ”مەن حالىقتىق تۇسەلحانا اشقان العاش جىلى 3000 يۋاننان استام اقشا تاپتىم، اتاعىنىڭ كەڭەيۋىنە ىلەسە كەلەتىن قوناقتار دا بارعان سايىن كوبەيدى، بىلتىر ءبىر ايدان استام ۋاقىتتا 50 مىڭ يۋاننان استام اقشا تاپتىم“، - دەدى يىمارنياز.

  ”ءبىز كورىنىس ءوڭىرىنىڭ تۇلعالىق قىزمەت وتەۋ ورەسىن ۇزدىكسىز جوعارىلاتىپ، كورىنىس ءوڭىرىنىڭ وزىندىك ءمانىن بارىنشا اشىپ، كورىنىس ءوڭىرىنىڭ نەگىزدىك قۇرىلعى - قۇرىلىستارىن كەمەلدەندىرىپ، ساياحاتتىڭ حاۋىپسىزدىگىنە قامتاماسىز ەتۋدى ورىنداپ، بۇل جەردى ساياحاتشىلاردىڭ كوڭىل تورىنەن ورىن العان قۇمدى - ءشول ساياحات كوزەۋلى جەرىنە اينالدىرامىز“، - دەدى ۋىن جيڭ.

جاۋاپتى رەداكتور: نۇربولات قابىل
  • 1
  • 2
  • 3
  • 4