جۇڭگو ەكونوميكاسى الدىڭعى 3 توقساندا وڭ سانمەن ارتتى

  ىندەتتىڭ ۇلكەن سىن - سىناعىندا

  جۇڭگو ەكونوميكاسى الدىڭعى 3 توقساندا وڭ سانمەن ارتتى

  شينحۋا اگەنتتىگىنىڭ 10 - ايدىڭ 19 - كۇنى بەيجيڭنەن بەرگەن حابارى (تىلشىلەر چىن ۋيۋي، ان بەي). مەملەكەتتىك ساناق مەكەمەسى 10 - ايدىڭ 19 - كۇنى ساندى مالىمەت جاريالادى، الدىڭعى 3 توقساندا جۇڭگو ەكونوميكاسى كەمەيۋدەن ارتۋعا ويىسىپ، سايكەس مەزگىلدەگىدەن %0.7 ارتقان. ىندەتتىڭ ۇلكەن سىن - سىناعىندا جۇڭگو ەكونوميكاسى الدىمەن جاندانعان، ناتيجە وڭاي - وسپاق قولعا كەلمەگەن.

  مەملەكەتتىك ساناق مەكەمەسىنىڭ اقپارات مالىمدەمەشىسى ليۋ ايحۋا سول كۇنگى مەملەكەتتىك كەڭەس اقپارات كەڭسەسىنىڭ اقپار جاريالاۋ ماجىلىسىندە بىلاي دەدى: بيىل جىل باسىنان بەرى، جاڭا تيپتى ايدارشا ۆيرۋس وكپە قابىنۋ ىندەتىنىڭ وراسان زور سوققىسىندا جانە كۇردەلى دە قاتاڭ ەل ءىشى - سىرتى ورتاسىندا وڭىرلەر، تاراۋلار ىندەتتەن ساقتانۋ - تىزگىندەۋدى جانە ەكونوميكالىق، قوعامدىق دامۋدى عىلمي ءبىر تۇتاس جوسپارلاپ، ءوندىرىس، تۇرمىس ءتارتىبىنىڭ قالپىنا كەلۋىن پارمەندى، ءونىمدى ىلگەرىلەتىپ، حالىق شارۋاشىلىعى ورنىقتى قالپىنا كەلۋ جاعدايىن جالعاستىردى.

  ساندى مالىمەتتە كورسەتىلۋىنشە، 1 - توقساندا GDP سايكەس مەزگىلدەگىدەن %6.8 تومەندەگەن جاعدايدا، 2 - توقساندا وڭ سانمەن ارتىپ، سايكەس مەزگىلدەگىدەن %3.2 ارتقان، 3 - توقساندا ارتۋ قاقىنى ونان ارى تەزدەپ، %4.9كە جەتكەن، نەگىزگى ەكونوميكالىق كورسەتكىشتەردە جاقسارۋ بەتالىسى جارىققا شىققان.

  ءوندىرىس جاعىندا، 3 - توقساندا بۇكىل ەلدە كولەمنەن جوعارى ونەركاسىپتىڭ ارتقان قۇنى سايكەس مەزگىلدەگىدەن %5.8 جوعارىلاپ، 2 - توقسانداعىدان 1.4 پايىز تەزدەگەن؛ قىزمەت وتەۋ كاسىبىنىڭ ارتقان قۇنى سايكەس مەزگىلدەگىدەن %4.3 جوعارىلاپ، ارتۋ قارقىنى 2 - توقسانداعىدان 2.4 پايىز تەزدەگەن.

  سۇرانىس جاعىندا، 3 - توقساندا قوعامدىق تۇتىنۋ بۇيىمدارىنىڭ بولشەك ساتىلۋ جالپى سوماسى سايكەس مەزگىلدەگىدەن %0.9 جوعارىلاپ، ماۋسىمدىق ارتۋ قارقىنى وسى جىل ىشىندە تۇڭعىش رەت وڭ سانمەن ارتتى؛ الدىڭعى 3 توقساندا بۇكىل ەل بويىنشا تۇراقتى مال - مۇلىككە قوسىلعان قارجى سايكەس مەزگىلدەگىدەن %0.8 جوعارىلاپ، ارتۋ قارقىنى وسى جىل ىشىندە تۇڭعىش رەت وڭ سانعا اينالعان؛ الدىڭعى 3 توقساندا تاۋار يمپورت - ەكسپورت جالپى سوماسى سايكەس مەزگىلدەگىدەن %0.7 جوعارىلاپ، وسى جىل ىشىندە تۇڭعىش رەت وڭ سانمەن ارتتى.

  نازار اۋدارۋعا تاتيتىنى، جۇمىستانۋ جاعدايى جالپى تۇلعالىق جاقتان ورنىقتى بولدى. الدىڭعى 3 توقساندا بۇكىل ەلدىڭ قالا - قالاشىقتارىندا 8 ميلليون 980 مىڭ ادام تىڭنان جۇمىستانىپ، تۇتاس جىلدىق نىسانا - مىندەتتىڭ %99.8ى ورىندالدى. 9 - ايدا بۇكىل ەلدىڭ قالا - قالاشىقتارىندا تەكسەرىلىپ انىقتالعان جۇمىسسىزدىق سالىستىرماسى %5.4بولىپ، 8 - ايداعىدان 0.2 پايىز ازايعان. مۇنان سىرت، الدىڭعى 3 توقساندا تۇرعىندار كىرىسىنىڭ ءىس جۇزىندىك ارتۋ قارقىنى كەمەيۋدەن ارتۋعا ويىستى.

  ”جۇڭگو ەكونوميكاسى ىندەتتىڭ قىسىم سىناعىنان ءوتتى، ىندەتتەن ساقتانۋ - تىزگىندەۋ جانە ەكونوميكانى قالپىنا كەلتىرۋ جاعىندا تۇگەلدەي دۇنيە ءجۇزى بويىنشا الدىڭعى لەكتە ءجۇرىپ، قۋاتتى توزىمدىلىگى مەن ومىرشەڭدىگىن ايگىلەدى“، - دەدى 13 - كەزەكتى مەملەكەتتىك ساياسي كەڭەس ەكونوميكا كوميتەتىنىڭ مۇشەسى ۋاڭ يميڭ.

  حالىقارالىق اقشا قور ۇيىمى (IMF) جاقىندا «دۇنيە ءجۇزى ەكونوميكاسىنا نازار بايانداماسىن» جاريالاپ، جەر شارى ەكونوميكاسىنىڭ بيىل %4.4 قۇلدىرايتىندىعىن، جۇڭگونىڭ جەر شارىنداعى بىردەن - ءبىر وڭ ارتۋدى جۇزەگە اسىرا الاتىن باستى ەكونوميكالىق تۇلعا بولاتىندىعىن مەجەلەدى. IMFتىڭ ءتوراعاسى گەورگىيەۆا جۇڭگو ەكونوميكاسىنىڭ جەر شارى ەكونوميكاسىنىڭ بەلسەندى قوزعاۋشى كۇشىنە اينالاتىندىعىن ءبىلدىردى.

جاۋاپتى رەداكتور: نۇربولات قابىل
  • 1
  • 2
  • 3
  • 4