رايونىمىز قيىنشىلىعى بار بۇقاراعا 8 ميلليارد 880 ميلليون يۋان قۇتقارۋ، كومەكتەسۋ قارجىسىن ءبولدى

رايونىمىز قيىنشىلىعى بار بۇقاراعا 8 ميلليارد 880 ميلليون يۋان قۇتقارۋ، كومەكتەسۋ قارجىسىن ءبولدى

سايكەس مەزگىلدەگىدەن %14 ارتتى

  گازەتىمىزدىڭ جالپىلىق اقپارات قۇرالدارى ءتىلشىسى لي لين 8 - ايدىڭ 8 - كۇنى ۇرىمجىدەن حابارلايدى. اۆتونوميالى رايوندىق حالىق ىستەرى مەڭگەرمەسىنەن ۇعىسۋىمىزشا، رايونىمىز قيىنشىلىعى بار بۇقاراعا 8 ميلليارد 880 ميلليون يۋان قۇتقارۋ، كومەكتەسۋ قارجىسىن بولگەن، بۇل بىلتىرعىدان ءبىر ميلليارد 40 ميلليون يۋان ارتىپ، ارتۋ مولشەرى %14كە جەتكەن. الدىڭعى جارتى جىلدا قالا، اۋىلدارداعى ەڭ تومەنگى تۇرمىسى قامتاماسىزداندىرىلاتىندار، ەرەكشە قيىنشىلىعى بارلار، جەتىم بالالار سياقتى قيىنشىلىعى بار قاۋىمعا 4 ميلليارد 100 ميلليون يۋان قۇتقارۋ، كومەكتەسۋ قارجىسى تاراتىلدى، ءار ءتۇرلى قيىنشىلىعى بار 7 ميلليون 390 مىڭ ادام (رەت) يگىلىكتەنىپ، ىندەتتەن ساقتانۋ - تىزگىندەۋ مەزگىلىندە قيىنشىلىعى بار بۇقارانىڭ نەگىزگى تۇرمىسى پارمەندى قامتاماسىز ەتىلدى.

  ىندەتتەن ساقتانۋ - تىزگىندەۋ مەزگىلىندە قۇتقارۋ بەرىلەتىن ادامداردىڭ كەڭ كولەمدىلىگى، قۇتقارۋ - كومەكتەسۋ قاجەتىنىڭ شۇعىلدىعى، قۇتقارۋ - كومەكتەسۋ جاعدايىنىڭ كۇردەلىلىگى سياقتى احۋالدارعا مەڭزەس، رايونىمىز دەر كەزىندە ساياسات شىعارىپ، شارتقا ۇيلەسەتىن قيىنشىلىعى بار بۇقارانى ەڭ تومەنگى تۇرمىستى قامتاماسىزداندىرۋ، ەرەكشە قيىنشىلىق، ۋاقىتشا قۇتقارۋ - كومەكتەسۋ كولەمىنە ەنگىزىپ، ”جالعىزىلىك وتباسى“، ”بىرتىندەپ شەگەرۋ مەرزىمى“، الدىمەن قۇتقارۋ - كومەكتەسۋ“، ”باعا قوسىمشا قاراجاتىن بەرۋ“ سياقتى ءبىر قىدىرۋ ساياساتتىق شارالاردى دالمە - ءدال تياناقتاندىرۋ ارقىلى قيىنشىلىعى بار قاۋىمدى ەڭ تومەنگى شەكتەن تۇسىرمەي قامتاماسىز ەتىپ، نەگىزگى تۇرمىسىنا كەپىلدىك ەتىپ، ىندەتتىڭ ىقپالىن ەڭ تومەنگى شەككە تۇسىرۋگە قۇلشىندى.

  رايونىمىز جەر - جەردىڭ ىندەت مەزگىلىندە قالا، اۋىلدارداعى ەڭ تومەنگى تۇرمىستى قامتاماسىزداندىرۋ قاراجاتىن، ەرەكشە قيىنشىلىعى بارلارعا بەرىلەتىن باعىپ - قاعۋ قاراجاتىن، جەتىم بالالاردىڭ نەگىزگى تۇرمىس قاراجاتىن، سونداي - اق قيىنشىلىعى بار مۇگەدەكتەردىڭ تۇرمىس قوسىمشا قاراجاتىن جانە اۋىر مۇگەدەكتەردى كۇتىمدەۋ قوسىمشا قاراجاتىن، ءسوز جوق، دەر كەزىندە تولىعىمەن تاراتۋىن تالاپ ەتتى. 7 - ايدىڭ ورتا شەنىندە جاڭا ىندەت ىقپالىنا مەڭزەس، اۆتونوميالى رايوندىق حالىق ىستەرى مەڭگەرمەسى جەر - جەردىڭ 7 - ايداعى، 8 - ايداعى قالا، اۋىلداعى ەڭ تومەنگى تۇرمىستى قامتاماسىزداندىرۋ قاراجاتىن جانە ەرەكشە قيىنشىلىعى بارلارعا بەرىلەتىن باعىپ - قاعۋ قاراجاتىن الدىن الا تاراتۋىن ورنالاستىردى.

  ىندەتتىڭ ىقپالىنا جانە زات باعاسىنىڭ قىمباتتاۋىنىڭ ءىس جۇزىندىك جاعدايىنا مەڭزەس، رايونىمىز قوعامدىق قۇتقارۋ - كومەكتەسۋ مەن قامتاماسىزداندىرۋ ولشەمىن زات باعاسىنىڭ قىمباتتاۋىمەن بايلانىستىرۋ مەحانيزمىن دەر كەزىندە اتقارىپ، باعا ۋاقىتشا قوسىمشا قاراجاتىنان جيىنى 63 ميلليون 762 مىڭ يۋان تاراتتى، مۇندا 3 - ايدان 6 - ايعا دەيىنگى باعا ۋاقىتشا قوسىمشا قاراجاتىنىڭ ولشەمىن تاعى دا ءبىر ەسە جوعارىلاتتى ءارى تۇڭعىش رەت جەتىم بالالاردى قوسىمشا قاراجات بەرۋ كولەمىنە ەنگىزىپ، ەڭ تومەنگى تۇرمىسى قامتاماسىزداندىرىلاتىندار، ەرەكشە قيىنشىلىعى بارلار، جەتىم بالالار سياقتى قيىنشىلىعى بار 4 ميلليون 467 مىڭ ادامعا (رەت) يگىلىك جەتكىزىپ، زات باعاسىنىڭ قىمباتتاۋىنىڭ قيىنشىلىعى بار بۇقارانىڭ نەگىزگى تۇرمىسىنا تۋدىرعان ءتيىمسىز ىقپالىن ءونىمدى تۇردە جويدى.

  حالىق ىستەرى بويىنشا تومەنگى شەكتەن تۇسىرىلمەي قامتاماسىز ەتىلەتىن وبيەكتىلەرگە ۋاقىتشا قۇتقارۋ - كومەكتەسۋ قاراجاتىن بەرۋدىڭ سىرتىندا، رايونىمىز قۇتقارۋ - كومەكتەسۋدىڭ قامتۋ كولەمىن كەڭەيتىپ، ۋاقىتشا قۇتقارۋ - كومەكتەسۋدى ىندەتتىڭ ىقپالى سەبەبىنەن نەگىزگى تۇرمىسى قيىنشىلىققا ۇشىراعان بۇقاراعا دەيىن كەڭەيتتى. ىندەتتىڭ ىقپالىنان جۇمىس ورىندارىنا قايتا الماعاندارعا، تۇرمىسىندا قيىنشىلىعى بار ءارى قامسىزداندىرۋعا قاتىناسپاعان جۇمىسىزدارعا ءبىر رەتتىك ۋاقىتتىق قۇتقارۋ قاراجاتىن تاراتتى. ىندەت ىقپالىنان سىرتقا شىعىپ جۇمىس ىستەۋگە شاراسىز قالعان، كىرىس كىرگىزە الماعان، تۇرمىستىق كىرىس قاينارى جوق، نەگىزگى تۇرمىسى قيىنشىلىقتا قالعان قالا - قالاشىقتىڭ جەرگىلىكتى نوپوسىنداعى وتباسىلاردى دەر كەزىندە ەڭ تومەنگى تۇرمىستى ۋاقىتشا قامتاماسىز ەتۋ كولەمىنە ەنگىزىپ، ءار ادامعا اي سايىن 450 يۋاندىق ولشەممەن كومەك قاراجات بەردى. ىندەت تۋىلعاننان بەرى، رايونىمىز 38 مىڭ وتباسىنداعى 100 مىڭ ادامعا (رەت) ەڭ تومەنگى تۇرمىستى ۋاقىتشا قامتاماسىزداندىرۋ بويىنشا كومەك بەرىپ، 44 ميلليون 840 مىڭ يۋان قارجى تاراتتى.

  قيىنشىلىعى بار بۇقارانىڭ ىندەت سەبەبىنەن توسىن تۋىلعان ۋاقىتشا تۇرمىستىق قيىنشىلىعىن ءونىمدى تۇردە شەشۋ ءۇشىن، رايونىمىز ۋاقىتشا قۇتقارۋ - كومەكتەسۋ ارناسىن ىركىلىسسىزدەندىرىپ، ەرتە بايقاپ، ەرتە ارالاسىپ، ەرتە قۇتقارىپ - كومەكتەسىپ، جاعدايىن جاپپاي تەكسەرىپ انىقتاۋ ارقىلى تەكسەرۋ - بەكىتۋ ءتارتىبىن ىقشامداپ، ىندەتتىڭ ىقپالىنان تۇرمىسى قيىنشىلىقتا قالعان وتباسىلار مەن جەكەلەردى (سول جەردىڭ نوپوسىندا ەمەس ادامداردى دا قامتيدى) ۋاقىتشا قۇتقارۋ - كومەكتەسۋ كولەمىنە ەنگىزىپ، بۇرىنعى كەزدەگى نوپوستاعى ادامداردى عانا ۋاقىتشا قۇتقارۋ - كومەكتەسۋ شەكتەمەسىن تالقاندادى. قازىر بۇكىل رايون بويىنشا 1 - ايدان 7 - ايعا دەيىن 390 ميلليون يۋان ۋاقىتشا قۇتقارۋ - كومەكتەسۋ قارجىسى تاراتىلىپ، ءبىر ميلليون 380 مىڭ ادامعا (رەت) ۋاقىتتىق كومەك بەرىلدى.

جاۋاپتى رەداكتور: ريزا حاميت
  • 1
  • 2
  • 3
  • 4