رايونىمىزدان 30 ۇزدىك وقۋشى قابىلدايدى

  بەيجيڭ شىفان داشۋەسى ”جىيۋان جوسپارى“ بويىنشا

  رايونىمىزدان 30 ۇزدىك وقۋشى قابىلدايدى

  گازەتىمىزدىڭ جالپىلىق اقپارات قۇرالدارى ءتىلشىسى جاۋ شييا 7 - ايدىڭ 27 - كۇنى ۇرىمجىدەن حابارلايدى. بەيجيڭ شىفان داشۋەسىنەن ۇعىسۋىمىزشا، وقۋ - اعارتۋ ارقىلى كەدەيلەردى دالمە - ءدال سۇيەمەلدەۋگە دەم بەرىپ، كەدەي وڭىرلەردىڭ نەگىزدىك وقۋ - اعارتۋ وقىتۋشىلار قوسىنى قۇرىلىسىن جەدەلدەتۋ ءۇشىن، وقۋ - اعارتۋ مينيسترلىگىنىڭ بەكىتۋىمەن بەيجيڭ شىفان داشۋەسى 2020 - جىلى تولىق كۋرسقا وقۋشى قابىلداۋدا العاش رەت ”جىيۋان جوسپارىن“ جاساپ، شينجياڭ، نيڭشيا سياقتى كەدەيلىك قالپاعى ءالى الىنباعان مەملەكەت دارەجەلى كەدەي اۋداندار بار 7 ولكەگە باعىتتاي وقۋشى قابىلدايدى ەكەن. جوسپار بويىنشا بيىل رايونىمىزدان 30 ۇزدىك وقۋشى قابىلدايدى.

  ”جىيۋان جوسپارى“ بويىنشا حانزۋ ءتىل - ادەبيەتى، ماتەماتيكا جانە قولدانىلمالى ماتەماتيكا، اعىلشىن ءتىلى كاسىپتەرىنە وقۋشى قابىلدانادى، ”باعىتتامالى وقۋشى قابىلداۋ، باعىتتامالى تاربيەلەۋ، باعىتتامالى جۇمىستاندىرۋ“ پرينسيبىنە تاباندى بولىپ، رايونىمىزدا وقۋ - اعارتۋ ىستەرىن قىزۋ سۇيەتىن، ۇزاق ۋاقىت وقىتۋشىلىقپەن شۇعىلدانۋعا بەل بۋعان ورتا مەكتەپ تاۋىسقان ۇزدىك وقۋشىلاردان تاڭداپ الادى.

  بەيجيڭ شىفان داشۋەسى وقۋشى قابىلداۋ كەڭسەسىنىڭ قاتىستى جاۋاپتىسى بىلاي دەپ تانىستىردى: ”جىيۋان جوسپارىنداعى“ وقۋ بىتىرگەن وقۋشىلار «بەيجيڭ شىفان داشۋەسىنىڭ جىيۋان جوسپارى بويىنشا شىفان كاسىبىندەگى وقۋشىلاردى باعىتتامالى جۇمىستاندىرۋ كەلىسىمىندە» بەلگىلەنگەن مىندەتتەردى اتقارۋى كەرەك، قوس باعىتتى تاڭداۋ ارقىلى ولكە دارەجەلى وقۋ - اعارتۋ اكىمشىلىك باسقارۋ تاراۋى جاعىنان وقۋشى شىققان ولكەدەگى وقۋ - اعارتۋ بايلىعى سالىستىرمالى تاپشى اۋداندارداعى ورتا، باستاۋىش مەكتەپتەردە كەم دەگەندە 6 جىلعا دەيىن وقىتۋشى بولۋعا ورنالاستىرىلادى. كەلىسىمدەگى مىندەتتى اتقارعاندار ءۇشىن، بەيجيڭ شىفان داشۋەسى ولاردىڭ 4 جىل تولىق كۋرستا وقىعان كەزدەگى وقۋ قاراجاتىن جانە جاتاق قاراجاتىن قايتارىپ بەرەدى ءارى مەكتەپتىڭ ”تورتكە يە“ جاقسى وقىتۋشىلار ساپار جوسپارىنىڭ سيلاۋ كولەمىنە ەنگىزەدى، 2020 - جىلعى سيلاۋ ساياساتىنىڭ سوماسى 100 مىڭ يۋان. قىزمەت وتەۋى ءبىر وقۋ ماۋسىمىنا تولعاندار، ونىڭ ۇستىنە شارتقا ۇيلەسەتىندەر بەيجيڭ شىفان داشۋەسىندە وقۋ - اعارتۋ كاسىبى بويىنشا ماگيسترلىكتى قىزمەتتە ءجۇرىپ وقۋعا ەمتيحانسىز تۇسۋگە ءوتىنىش بەرۋىنە بولادى. قىزمەت وتەۋ مەزگىلىندە، بەيجيڭ شىفان داشۋەسى وتكىزگەن نەگىزدىك وقۋ - اعارتۋ وقىتۋشىلارىن قىزمەتتەگى كەزىندە تاربيەلەۋ نىسانىنا قاتىناسۋعا ءوتىنىش بەرىپ، بەيجيڭ شىفان داشۋەسىنىڭ سارا ساباقتارى، ينتەرنەت جەلىسىندەگى وقۋ - اعارتۋ بايلىعى سياقتى ساپالى وقۋ - اعارتۋ، وقىتۋ بايلىقتارىنان بىرگە پايدالانىپ، پاندەر تاربيەسى ماماندار توبىنىڭ كاسىپتىك جەتەكتەۋىنە يە بولۋىنا، مەكتەپتىڭ نەگىزدىك وقۋ - اعارتۋ ءبىرىنشى شەبىنە باعىتتاعان وقۋ - اعارتۋ، وقىتۋ رەفورماسىن زەرتتەۋ جانە وقىتۋ رەفورماسى امالياتى سياقتى قىزمەتكە قاتىناسقاننان كەيىنگى باۋلۋ جانە تاربيەلەۋ قيمىلدارىنا قاتىناسۋىنا بولادى.

  ەمتيحان تاپسىرعان وقۋشىلار مەن اتا - انالار قاتىستى وقۋشى قابىلداۋ ىستەرىن ۇعىسپاقشى بولسا، بەيجيڭ شىفان داشۋەسى تولىق كۋرسقا وقۋشى قابىلداۋ سايتىنا شىعىپ نەمەسە ”جىيۋان جوسپارى“ ارناۋلى جەلىسى 58809414 -010 تەلەفونىنا جالعاپ كەڭەس سۇراسا بولادى.

جاۋاپتى رەداكتور: نۇربولات قابىل
  • 1
  • 2
  • 3
  • 4