قۇربان اتايدىڭ اۋىلىنىڭ داڭقى شىقتى

قۇربان اتايدىڭ اۋىلىنىڭ داڭقى شىقتى

شينحۋا اگەنتتىگىنىڭ تىلشىلەرى ديڭ جيانگاڭ، حاۋ يۇي

  وتكەن عاسىردىڭ 50 - جىلدارىندا قۇربان اتاي ەسەكپەن كەريا اۋدانىنان بەيجيڭگە اتتانىپ، ءتوراعا ماۋ زىدۇڭدى كورۋگە بەل بۋعان ەدى. ال بۇگىنگى كۇندەرى وسى ەستەلىكتى ەسكە ءتۇسىرىپ، وڭتۇستىك شينجياڭنىڭ جاڭا بەت - بەينەسىن كورۋ ءۇشىن، ءتىپتى دە كوپ ساياحاتشى پويەزبەن، ءوز اۆتوكولىكتەرىمەن ونىڭ مەكەنىنە ات باسىن بۇردى.

  جاز باسى، اق تەرەكپەن كومكەرىلگەن اۋىل - قىستاق تاس جولىن بويلاپ، ءتىلشى قۇمدى ءشولدىڭ جيەگىنە ورنالاسقان قۇربان اتايدىڭ اۋىلى − كەريا اۋدانى تۋراقاز اۋىلى تۋراقاز قىستاعىنا جەتتى. كەڭەيتىپ سالىنعاننان كەيىنگى قۇربان تۇلىم ەسكەرتكىش سارايىنىڭ قاقپاسىنىڭ الدىنا اۆتوموبيلدەر مەن موتوتسيكلدەر رەتتى توقتاپ، اتاعىن ەستىپ تاماشالاۋعا كەلگەندەردىڭ اياعى ۇزىلمەدى.

  ەسكەرتكىش ساراي 2003 - جىلى سالىنعان، سوڭعى جىلدارى نەشە رەت كەڭەيتىپ سالىنعاننان كەيىن، ساياحاتشىلارعا قايتالاي اشىق ۇستالدى. كەڭەيتىپ سالىنعاننان كەيىن، سارايدىڭ ىشىنە باعالى تاريحي سۋرەت، ماڭىزدى حۇجات جانە ناقتى زاتتار كورمەگە قويىلۋدان تىس، تاعى دىبىس كەسكىن بولمەسى قوسىلىپ، بەدەرلى ناقىش، ارناۋلى فيلم جاسالىپ، اۆتونوميالى رايون دارەجەلى وتانشىلدىق تاربيە بازاسى اتى بەرىلدى.

  سارايدى تاماشالاساڭىز كونە سۋرەتتەردىڭ، كونە بۇيىمداردىڭ الىستان كەلگەن تاماشالاۋشىلاردى قايتا - قايتا قايران قالدىرعانىن كورەسىز. قۇربان اتايدىڭ بالا كۇننەن جوقشىلىقپەن كۇن كورىپ، جاڭا جۇڭگو قۇرىلعاننان كەيىن عانا باقىتتى تۇرمىس كەشىرگەنىن بىلگەن موڭعۇلكۇرە اۋدانىنان كەلگەن كادر سۇلتان ماناپحان اسەرلەنە بىلاي دەدى: ”جاڭا داۋىردە جاساپ جاتقان ءبىز پارتياعا ىلەسۋ سەنىمىمىزدى اناعۇرلىم بەكەمدەپ، وڭاي - وسپاق قولعا كەلمەگەن باقىتتى تۇرمىستىڭ قادىرىنا جەتۋىمىز كەرەك“.

  ەسكەرتكىش سارايى قاقپاسىنىڭ سول جاعىنداعى قۇربان تۇلىمنىڭ جاڭالانعان ەجەلگى تۇراعىندا دا ادامدار سابىلىسۋدا. تالاي جاۋىن - شاشىندى باسىنان وتكەرگەن جاتاعان ءۇي كاريانىڭ سول كەزدەگى تۇرمىسى بويىنشا ءوز اينىندە ورنالاستىرىلىپ، اس ءۇي، جاتىن ءۇي، كىلەت ءۇي سياقتىلاردان قۇرالىپ، ونىڭ كوزى تىرىسىندە ىستەتكەن ماي شام، اعاش توستاعان، اعاش تەگەنە سياقتىلار قويىلعان. بۇگىنگى كۇنى قۇربان اتايدىڭ ۇرپاقتارى تۇگەل ۇكىمەت قوسىمشا قاراجات بەرىپ سالعان بەيقۇت ۇيگە كوشىپ كىرىپ، ”ەكى وگىزبەن جەر جىرتىپ“، ”ەسەك اربامەن قاتىنايتىن“ ءوندىرىس جانە تۇرمىس تاسىلىنە تۇبەگەيلى قوش ايتتى.

  كەريا اۋداندىق پارتكومنىڭ تانىستىرۋىنا قاراعاندا، ەسكەرتكىش سارايىنىڭ جىلىنا ورتا ەسەپپەن بۇكىل مەملەكەتتىڭ جەر - جەرىنەن قابىلدايتىن ساياحاتشى سانى 10 مىڭ ادام - رەتتەن اسادى ەكەن. مۇندا، قۇربان اتايدىڭ اۋىلى وڭتۇستىك شينجياڭعا ءوز اۆتوموبيلىمەن ساياحاتتاي باراتىنداردىڭ مىندەتتى تۇردە بارۋدا الدىمەن تاڭدايتىن جەرىنە اينالعان.

  سونىمەن قاتار، تۋراقاز قىستاعى دا بارعان سايىن تانىمال بولا تۇسكەن. قىستاقتا تۇراتىن قىزمەت اترەتىنىڭ باستىعى، ءبىرىنشى شۋجيى ۋاڭ بو بىلاي دەدى: قىستاق ەسكەرتكىش سارايىنىڭ ماڭىنا مادەنيەت اۋلاسى، الاڭ ءمۇسىنى، ۇلتتار ىنتىماعىنان ۇلگى كورسەتۋ كوشەسى سياقتىلاردى قۇرىپ، قىزىل ساياحاتتى اناعۇرلىم جاقسى اشۋعا شارت - جاعداي ازىرلەدى. بۇرىن ۇنەمى قۇمدى بوران سوعىپ تۇراتىن قىستاق بۇگىنگى كۇنى شىت جاڭا بەينەگە ەنگەن، تاسپاداي قىستاق جولىنىڭ ەكى جاعالاۋىنداعى ۇيلەر تازا دا رەتتى ورنالاسىپ، قىزىل تاقتايشادان سالىنعان ءجۇزىم سورەسى ۇزىن كاريدورعا اينالعان، ەلەكتروندى ساۋدا ەرەن بازارى، ساياحات شارۋالار شاتتىعى سياقتىلار مۇنىڭ اراسىندا بىرىنە - ءبىرى كورىك بەرۋدە.

  بىلتىر تۋراقاز قىستاعى بۇكىل قىستاقتىڭ كەدەيلىكتەن ارىلعانىن جاريالادى. قىستاقتا 1000 مۋدان استام جەرگە ءجۇزىم، بارقىت ءشوپ ەگىنشىلىك بازاسى قۇرىلىپ، 250 نەشە وتباسىنىڭ كىرىس ارتتىرۋىنا جەتەكشىلىك ەتتى؛ سونىمەن بىرگە، باسقا سالاعا ويىستىرىپ جۇمىستاندىرۋ ءتاسىلى ارقىلى تاعى 300دەن استام وتباسى ءوز ەڭبەگىمەن كۇنەلتىپ، تۇتاس قىستاقتىڭ كىسى باسىندىق كىرىسى 10 مىڭ يۋاننان استى.

  بيىل تۋراقاز قىستاعى تاعى قىزىل ساياحات شاعىن قالاشىعىن قۇرۋدى جوسپارلاپ، وزگەشە سەلبەستىك كووپەراتيۆىن قۇرىپ، قىستاق تۇرعىندارىنىڭ كىرىس ارناسىن ونان ارى كەڭەيتپەكشى. ۋاڭ بو بىلاي دەدى: بۇقارانىڭ تۇرمىسى بارعان سايىن ۇمىتكە تولىپ، پارتياعا ىلەسۋ سەنىمدەرى ونان ارى بەكەمدەلدى.

(شينحۋا اگەنتتىگىنىڭ ۇرىمجىدەن بەرگەن حابارى)

جاۋاپتى رەداكتور: ريزا حاميت