2035 - جىلى وقۋ - اعارتۋدى وسىزامانداندىرۋ جالپى تۇلعادا جۇزەگە اسىرىلادى

«شينجياڭ وقۋ - اعارتۋدى وسىزامانداندىرۋ 2035» جانە «شينجياڭ وقۋ - اعارتۋدى وسىزامانداندىرۋدى جەدەل ىلگەرىلەتۋدى اتقارۋ جوباسى (2018 − 2022 - جىل)» شىعارىلدى

2035 - جىلى وقۋ - اعارتۋدى وسىزامانداندىرۋ جالپى تۇلعادا جۇزەگە اسىرىلادى

  گازەتىمىزدىڭ جالپىلىق اقپارات قۇرالدارى ءتىلشىسى جاۋ شييا 6 - ايدىڭ 23 - كۇنى ۇرىمجىدەن حابارلايدى. اۆتونوميالى رايوندىق اقپارات كەڭسەسى اشقان اقپارات جاريالاۋ ماجىلىسىنەن ۇعىسۋىمىزشا، جۋىردا «شينجياڭ وقۋ - اعارتۋدى وسىزامانداندىرۋ 2035» جانە «شينجياڭ وقۋ - اعارتۋدى وسىزامانداندىرۋدى جەدەل ىلگەرىلەتۋدى اتقارۋ جوباسى (2018 − 2022 - جىل)» شىعارىلعان، ۇزاق مەزگىل مەن جاقىنعى مەزگىلدى ۇشتاستىرعان، ءارقايسىنىڭ ءوز جۇمىس ءبولىسى مەن ءتۇيىنى بار بۇل ەكى حۇجات شينجياڭنىڭ 2035 - جىلى وقۋ - اعارتۋدى وسىزامانداندىرۋدى جالپى تۇلعادا جۇزەگە اسىرۋىنىڭ جوعارى دەڭگەيلى جوبالاۋىن جانە ارەكەت جوباسىن قۇراعان.

  حۇجاتتا مىنالار العا قويىلدى: 2022 - جىلعا جەتكەندە، شينجياڭدا ءار دارەجەلى، ءار تۇردەگى وقۋ - اعارتۋدى جالپىلاستىرۋ نىساناسى جالپى بەتتىك جۇزەگە اسىپ، وقۋ - اعارتۋداعى قولامتالى، قيىن ءتۇيىندى ماسەلەلەر ۇتىمدى شەشىلىپ، وقۋ - اعارتۋدىڭ جالپى تۇلعالىق ناقتى قۋاتى زور دارەجەدە جوعارىلاپ، وقۋ - اعارتۋ رەفورماسىنىڭ، دامۋىنىڭ تابىستارى ءار ۇلت بۇقاراسىن اناعۇرلىم مول، اناعۇرلىم ءادىل تۇردە تيىمدىلىككە كەنەلتەدى. 2035 - جىلعا جەتكەندە، وقۋ - اعارتۋدى وسىزامانداندىرۋ جالپى تۇلعالىق جاقتان جۇزەگە اسىپ، ىنتىماقتى، جاراسىمدى، گۇلدەنگەن، باي، وركەنيەتتى، العا باسقان، الاڭسىز تىرشىلىك، شات - شادىمان تۇرمىس كەشىرەتىن جۇڭگوشا سوتسياليستىك شينجياڭ قۇرۋعا بەرىك نەگىز قالانادى.

  حۇجات رايونىمىزدىڭ نەگىزدىك وقۋ - اعارتۋ، كاسىپتىك وقۋ - اعارتۋ، جوعارى دارەجەلى وقۋ - اعارتۋ سياقتى جاقتارداعى ءتۇيىندى مىندەتتەرىنە ورنالاستىرۋ جاساپ، مەكتەپكە دەيىنگى تاربيەنىڭ جالپىلاسۋ جانە جالپىعا تيىمدىلىك جەتكىزۋ ورەسىن جوعارىلاتىپ، مىندەتتى وقۋ - اعارتۋدىڭ ساپالى، بىركەلكى دامۋىن ىلگەرىلەتىپ، ورتا مەكتەپ ساتىسىنداعى وقۋ - اعارتۋدى جالپىلاستىرۋدان قامال الۋدى ورىستەتۋدى؛ ورتا دارەجەلى كاسىپتىك وقۋ - اعارتۋدىڭ دامۋ نەگىزىن بەكەمدەپ، جوعارى دارەجەلى كاسىپتىك وقۋ - اعارتۋدا رەفورما جاساۋدى، جاڭالىق اشۋدى ىلگەرىلەتىپ، مەكتەپ پەن كاسىپورىننىڭ تەرەڭدەي توعىسۋىن ىلگەرىلەتىپ، زور كولەمدەگى جوعارى ساپالى ەڭبەكشىلەر مەن تەحنيكالىق شەبەرلىك دارىندىلارىن جەتىلدىرۋدى؛ ەرەكشەلىككە يە، جوعارى دەڭگەيلى ءبىر توپ داشۋەنى تۇرگە ءبولىپ قۇرىپ، جوعارى دارەجەلى وقۋ - اعارتۋدىڭ ماندىك دامۋىن ىلگەرىلەتىپ، دارىندى جەتىلدىرۋ، عىلمي زەرتتەۋ، قوعامدىق قىزمەت وتەۋ، مادەنيەتتى جالعاستىرۋ، جاڭالىق اشۋ جانە حالىقارالىق اۋىس - كۇيىس قابىلەتىن جالپى بەتتىك جوعارىلاتۋدى تالاپ ەتتى.

  ”بۇل ءتۇيىندى مىندەتتەر − وقۋ - اعارتۋ ىستەرىنىڭ جاڭا باستامادا جوعارى ساپالى دامۋىن ىلگەرىلەتۋدىڭ كوزدەۋ ءتۇيىنى، كۇش سالۋ ءتۇيىنى، حالىق رازى بولاتىن وقۋ - اعارتۋدى جاقسى جۇرگىزۋدىڭ شەشۋشى ءتۇيىنى ءارى شينجياڭنىڭ ەكونوميكالىق، قوعامدىق دامۋىنا ۇيلەسۋدىڭ جانە ءار ۇلت وقۋشىلارىنىڭ تاماشا تاربيە الۋىنىڭ نەگىزگى ءتۇيىنى“، - دەدى اۆتونوميالى رايوندىق وقۋ - اعارتۋ مەڭگەرمەسىنىڭ ورىنباسار باستىعى، اقپارات مالىمدەمەشىسى ليۋ يۇيگۋاڭ تانىستىرىپ، - «شينجياڭ وقۋ - اعارتۋدى وسىزامانداندىرۋ 2035تىڭ» قالىڭ بۇقارامەن قاتىناسى ەڭ تىعىز بولعانى 2035 - جىلعا بارعاندا مىندەتتى وقۋ - اعارتۋى ساپالى، بىركەلكى اۋدانداردىڭ (قالا، رايون) سالىستىرماسى %95كە جەتەدى. كەلەسى قادامدا، وقۋ - اعارتۋ جۇيەسىنىڭ قاتىستى تاراۋلارى نەگىزىنەن بىركەلكىلەندىرۋدىڭ شەشۋشى شايقاسىن جۇرگىزۋمەن بىرگە، ساپالى، بىركەلكى بولۋدى كىرىستىرە ىلگەرىلەتىپ، ءتۇرلى شارالار ارقىلى وسى نىسانانى جۇزەگە اسىرۋعا كەپىلدىك ەتەدى.

  ۇعىسۋعا قاراعاندا، جۋىرداعى جىلداردان بەرى رايونىمىز وقۋ - اعارتۋ ىستەرىنىڭ دامۋىنا باسا ءمان بەرىپ، شينجياڭنىڭ وقۋ - اعارتۋ ىستەرىنىڭ دامۋىنا ۇزاق ۋاقىت بويى تۇساۋ بولىپ كەلگەن كەيبىر نەگىزدىك ماسەلەلەردى كۇشتى شوعىرلاندىرا وتىرىپ شەشىپ، وقۋ - اعارتۋدى وسىزامانداندىرۋدى جەدەل ىلگەرىلەتۋدىڭ نەگىزگى شارت - جاعدايىن ازىرلەگەن. 2019 - جىلدىڭ اياعىنا دەيىن، رايونىمىزداعى مەكتەپكە دەيىنگى تاربيە بويىنشا بالاباقشاعا ءتۇسۋ جالپى مولشەرى %97.51كە، 9 جىلدىق مىندەتتى وقۋ - اعارتۋدىڭ بەكەمدەلۋ مولشەرى %95.51كە، ورتا مەكتەپ ساتىسىنداعى وقۋ - اعارتۋ بويىنشا وقۋعا ءتۇسۋ جالپى مولشەرى %98.82كە، جوعارى دارەجەلى وقۋ - اعارتۋ بويىنشا وقۋعا ءتۇسۋ جالپى مولشەرى %46.79كە جەتتى. 2019 - جىلى بۇكىل رايوننىڭ قازىنالىق ادەتتەگى الەۋمەتتىك مەجە ەسەبىنەن وقۋ - اعارتۋعا باعىتتالعان ۇسىنىلىم 86 ميلليارد 307 ميلليون يۋان بولىپ، وتكەن جىلداعىمەن سالىستىرعاندا 4 ميلليارد 770 ميلليون يۋان ارتتى.

  مۇنان كەيىن، رايونىمىز وقۋ - اعارتۋدى وسىزامانداندىرۋدىڭ جالپى تۇلعالىق ستراتەگيالىق ورنالاستىرۋى بويىنشا وقۋ - اعارتۋعا باعىتتالعان ۇسىنىلىم تەبىنىن ۇزدىكسىز ارتتىرۋ، وقۋ - اعارتۋ سالاسىنداعى كەشەندى رەفورمانى تەرەڭدەتۋ، وقۋ - اعارتۋ ىستەرىنىڭ دامۋ ورەسىن جوعارىلاتۋ ارقىلى وقۋ - اعارتۋدى وسىزامانداندىرۋدىڭ مەجەلىك كورسەتكىشتەرىن بىرتىندەپ جۇزەگە اسىرىپ، اناعۇرلىم ءادىل، ساپالى، قامتىمدى وقۋ - اعارتۋ مەحانيزمىن ورناتىپ، حالىق رازى بولاتىن وقۋ - اعارتۋدى قۇلشىنا جاقسى جۇرگىزەدى.

جاۋاپتى رەداكتور: سايراش تۇرارجان