ەلىمىز بەيدوۋ جەر شارىندىق جۇيەسى جاساندى سەرىك شوعىرىن جارتى جىل بۇرىن ورنالاستىرىپ بولدى

بەيدوۋ - 3تىڭ ەڭ سوڭعى تور قۇراۋشى جاساندى سەرىگى ”قايتا باستالىپ“ ءساتتى ۇشىرىلدى

ەلىمىز بەيدوۋ جەر شارىندىق جۇيەسى جاساندى سەرىك شوعىرىن جارتى جىل بۇرىن ورنالاستىرىپ بولدى

  شينحۋا اگەنتتىگىنىڭ 6 - ايدىڭ 23 - كۇنى شيچاڭنان بەرگەن حابارى (تىلشىلەر لي گولي، جاڭ ميمي، حۋ جى). اسپان بەينە شاحمات تاقتاسىنا ۇقساسا، ال جاساندى سەرىكتەر شاحمات تاسى بولىپ، جۇڭگونىڭ بەيدوۋى عارىشتى نۇرلاندىردى. تەحنيكالىق سەبەپ سالدارىنان ءبىر اپتا كەشىكتىرىلىپ ۇشىرىلعان بەيدوۋ - 3تىڭ ەڭ سوڭعى جەر شارىندىق تور قۇراۋشى جاساندى سەرىگى 6 - ايدىڭ 23 - كۇنى ءتۇستىڭ الدىندا شيچاڭ جاساندى سەرىك ۇشىرۋ ورتالىعىندا ۇشۋدى ”قايتا باستاعاننان“ كەيىن عارىشقا ءساتتى جايعاسىپ، ەلىمىز بەيدوۋ جەر شارىندىق جاساندى سەرىك جول نۇسقاۋ جۇيەسى جاساندى سەرىك شوعىرىن جارتى جىل بۇرىن جاپپاي ورنالاستىرىپ بولدى.

  جۇڭگو جاساندى سەرىك جول نۇسقاۋ جۇيەسىن باسقارۋ كەڭسەسى بىلاي دەدى: وسى جاساندى سەرىك وربيتاداعى ءبىر قىدىرۋ سىناقتاردان ءوتىپ تورعا كىرگەن سوڭ، ەلىمىز بەيدوۋ تۇتاس جۇيەسىن بىرلەسىپ رەتتەپ، سىناپ، ءساتى كەلگەندە بۇكىل جەر جۇزىندەگى ابونتتارعا جەر شارىندىق ورىن بەلگىلەپ جول نۇسقاۋ بويىنشا تولىق كۇن، كۇندىز - ءتۇنى، جوعارى دالدىكتى تولىق قىزمەت وتەيدى.

  سول كۇنى ساعات 9دان 43 مينۋت وتكەندە، جاڭبىردان كەيىنگى شيچاڭ ۇشىرۋ الاڭىنىڭ اسپانى بۇلتتاپ تۇردى. 01 قولباسشى يىن شياڭيۋان وتالدىرۋ بۇيرىعىن بەرگەن سوڭ، سۇتتەي اق چاڭجىڭ راكەتاسى جاساندى سەرىكتى الىپ كەڭىستىككە كوتەرىلدى.

  بۇل جولعى ۇشىرۋ بۇراڭدىقتاردى باسىپ ءوتتى. وسىنىڭ الدىندا 2 رەتكى عارىشقا ۇشىرۋ مىندەتى ءساتسىز بولىپ، ۇشىرۋ ۋاقىتى 5 - ايدان 6 - ايعا وزگەرتىلدى؛ 6 - ايدىڭ 16 - كۇنى ۇشىرىلۋ الدىندا ونىمنەن تەحنيكالىق ماسەلە بايقالعاندىقتان، ۇشىرۋ تاعى دا ءبىر اپتا كەشىكتىرىلدى.

  بۇل چاڭجىڭ جەلىلەس تاسىمال راكەتاسىنىڭ 336 - رەت ۇشىرىلۋى. بۇگىنگە دەيىن، ەلىمىز بەيدوۋدى ۇشىرۋ مىندەتىن جالپى 44 رەت ۇيىمداستىردى، چاڭجىڭ - 3A جەلىلەس تاسىمال راكەتاسىمەن ىلگەرىندى - كەيىندى بەيدوۋ - 1 تاجىريبە سەرىگىنەن 4ىن، بەيدوۋ - 2 جانە بەيدوۋ - 3 تور قۇراۋشى جاساندى سەرىكتەرىنەن 55ىن بەلگىلەنگەن وربيتاعا جەتكىزىپ، ءساتتى بولۋ سالىستىرماسى %100كە جەتتى.

  جاساندى سەرىك 30 مينۋتتاي ۇشقان سوڭ، بەلگىلەنگەن وربيتاعا ءساتتى كىردى. ىلە - شالا شيچاڭ جاساندى سەرىك ۇشىرۋ ورتالىعى ۇشىرۋ مىندەتىنىڭ تولىق تابىسقا جەتكەنىن جاريالادى.

  1970 - جىلى قۇرىلعان شيچاڭ جاساندى سەرىك ۇشىرۋ ورتالىعىنىڭ ”بەيدوۋ پورتى“ دەگەن اتى بار. وسى ورتالىق پارتكومىنىڭ شۋجيى دۇڭ چۇڭچيڭ بىلاي دەدى: ”ەلىمىزدىڭ بەيدوۋ جاساندى سەرىكتەرىنىڭ بارلىعى وسى جەردەن عارىشقا ءساتتى ۇشىرىلىپ، جۇڭگو قارقىنىن، جۇڭگو كەرەمەتىن جاراتتى“.

  بەيدوۋ جۇيەسى − ەلىمىز دەربەس قۇرعان، دەربەس جۇمىس جۇرگىزەتىن جەر شارىندىق جاساندى سەرىك جول نۇسقاۋ جۇيەسى، جەر شارىنداعى 3 ءتۇرلى وربيتاداعى جاساندى سەرىكتەردەن قۇرالعان بىردەن - ءبىر جول نۇسقاۋ جۇيەسى، 2009 - جىلى بەيدوۋ - 3 جۇيەسىنىڭ قۇرىلىسى رەسمي باستالىپ، 2017 - جىلى 11 - ايدا بەيدوۋ - 3تىڭ العاشقى توپتاعى قوس جاساندى سەرىگى ءساتتى ۇشىرىلدى.

  بيىل جاڭا تيپتى ايدارشا ۆيرۋس وكپە قابىنۋ ىندەتى تۋىلعان ەرەكشە جاعدايدا، بەيدوۋ ينجەنەرياسى تور قۇراۋ مىندەتى مەن ىندەتتەن ساقتانۋ - تىزگىندەۋ سىندى ەكى شەپتە تۇتاس جەلى بويىنشا ”قوس شەپ شايقاسىن“ جۇرگىزىپ، ەڭ سوڭعى 2 رەتكى ۇشىرۋ مىندەتىن ۋاعىندا ءساتتى ورىندادى، جەر شارىندىق جاساندى سەرىك شوعىرىن ورنالاستىرىپ بولۋ ۋاقىتى اۋەلدەگى جوسپاردان جارتى جىل بۇرىن ىسكە اسىرىلدى. قازىر دۇنيە جۇزىندەگى مەملەكەتتەردىڭ جارتىسىنان استامى بەيدوۋ جۇيەسىن قولدانا باستادى.

  ”جۇڭگونىڭ بەيدوۋى بۇكىل جەر جۇزىنە قىزمەت وتەپ، ادامزاتقا باقىت اكەلەدى“. جۇڭگو بەيدوۋ جاساندى سەرىك جول نۇسقاۋ جۇيەسى ينجەنەرياسىنىڭ باس جوبالاۋشىسى ياڭ چاڭفىڭ بىلاي دەدى: 2035 - جىلى ەلىمىز اناعۇرلىم قامتىمدى، اناعۇرلىم توعىسقان، اناعۇرلىم زەردەلى امبەباپ ورىن بەلگىلەۋ، جول نۇسقاۋ ۋاقىت قىزمەتىن وتەيتىن جۇيەنى قۇرىپ، ۋاقىت، كەڭىستىك ينفورماتسياسىمەن قىزمەت وتەۋ قابىلەتىن ونان ارى ءوسىرىپ، ادامزاتتىڭ ارمانى مەن قادامىن ءتىپتى دە الىستارعا جەتكىزۋگە جۇڭگو عارىشىنىڭ ءتيىستى ۇلەسىن قوسادى.

  ەلىمىز 20 - عاسىردىڭ سوڭعى مەزگىلىنەن باستاپ مەملەكەت جاعدايىنا ۇيلەسەتىن جاساندى سەرىك جول نۇسقاۋ جۇيەسىن دامىتۋ جولىن قاراستىرا باستاپ، ”ءۇش قادامدىق“ دامۋ ستراتەگياسىن بىرتىندەپ قالىپتاستىردى: 2000 - جىلدىڭ اياعىندا بەيدوۋ - 1 جۇيەسىن قۇرىپ، جۇڭگوعا قىزمەت وتەدى؛ 2012 - جىلدىڭ اياعىندا بەيدوۋ - 2 جۇيەسىن قۇرىپ، ازيا - تىنىق مۇحيت وڭىرىنە قىزمەت وتەدى؛ 2020 - جىلى بەيدوۋ - 3 جۇيەسىن قۇرىپ، بۇكىل جەر شارىنا تولىق قىزمەت وتەۋ قابىلەتىن ازىرلەدى.

جاۋاپتى رەداكتور: سايراش تۇرارجان
  • 1
  • 2
  • 3
  • 4