اۋىل - قىستاقتىڭ ”دۋماندى ۋاقىتى“ وزگەرۋدە

  شينحۋا اگەنتتىگىنىڭ 6 - ايدىڭ 13 - كۇنى ۇرىمجىدەن بەرگەن حابارى (تىلشىلەر ديڭ جيانگاڭ، حاۋ يۇي). ءانۋارنيساحان دولايدىڭ ەسىندە قالۋىنشا، كوپ جىلدان بەرى تاڭ سارىدە قىستاق مۇلگىگەن تىنىشتىققا شومىپ، جەل تەربەگەن اعاش بۇتاقتارىنىڭ دىبىسى دا ەستىلىپ تۇراتىن. ال قازىر تاڭ اتىسىمەن بالالاردىڭ دابىرلاعان اشىق داۋىستارى، ەلەكتروسيكلدىڭ گۇرىلدەگەن داۋىسى قىستاقتىڭ تىنىشتىعىن بۇزدى.

  وڭتۇستىك شينجياڭنىڭ اۋىل - قىستاقتارىنداعى وسى دىبىس - سىبدىرلارعا، ءانۋارنيساحان بارعان سايىن كونە باستادى. الايدا بىرنەشە جىلدىڭ الدىندا ول تۇرمىس كەشىرىپ جاتقان لوپ اۋدانى لوپ قالاشىعى قىرقاش قىستاعىندا كۇن ارقان بويى كوتەرىلگەندە بارىپ قىستاق تۇرعىندارى ەكى - ۇشتەن توپتاسىپ، اعاش كولەڭكەسىنە نەمەسە تامنىڭ تۇبىندە وتىرىپ اڭگىمە دۇكەنىن قۇراتىن، سوندا بارىپ قىستاق دۋمانعا بولەنەتىن. ءتۇس اۋعاننان كەيىن كۇن جارقىراي تۇسكەندە، قىستاق تۇرعىندارى ۇيىنە تىعىلىپ سىرتقا شىقپايتىن. ”ىستەيتىن كوپ جۇمىس جوق بولعاندىقتان، قىستاق تۇرعىندارى ادەتتە ەرتە تۇرمايتىن“.

  ۇزاق ۋاقىت قىستاقتا تۇرىپ، شارۋالار وتباسىندا بولعاندىقتان، كەريا اۋدانىنىڭ كادرى جاڭ لەي دە وقۋ، جۇمىستانۋ جاعدايىنىڭ وزگەرۋىنە ىلەسە، وڭتۇستىك شينجياڭداعى اۋىل - قىستاقتاردىڭ دۋمانعا بولەنەتىن ۋاقىتىنىڭ وزگەرە باستاعانىن، تاڭەرتەڭ مەن كەش بارعان سايىن دۋماندانىپ، كەرىسىنشە ءتۇس الەتىنىڭ جىم - جىلاس بولاتىندىعىن سەرگەكتىكپەن بايقادى.

  ءار كۇنى تاڭ سارىدە، قىستاقتار ءدۇر - دۇرمەكپەن ويانادى. ويتكەنى بارلىق وقۋ جاسىنداعى جاستار مەن ورەندەر تۇگەلدەي وقۋعا تۇسكەن، بارلىق وتباسى ەرتە تۇرىپ تاماق ىستەيدى، ودان بالالارىن مەكتەپكە اپارادى. كەيبىر بالالار بىرگە بارىپ، جول بويى اسىر سالىپ ويناپ، شات - شادىمان كۇلكى ۇندەرى قىستاققا تاراپ جاتادى.

  تەك بۇل عانا ەمەس، ءبىر توپ كەدەيلەردى سۇيەمەلدەۋ كاسىپورنى مەن كەدەيلەردى سۇيەمەلدەۋ سەحىنىڭ ارت - ارتىنان قۇرىلۋىنا ىلەسە، بۇرىن ۇيىندە بوس وتىراتىن ايەلدەر جابال زاۆودقا كىرىپ جۇمىس ىستەدى. ءار كۇنى تاڭەرتەڭ بالالارىنىڭ تاڭعى اسىن بەرگەن سوڭ، ولار ەلەكتروسيكلگە ءمىنىپ، زاۆود رايونىنا قاراي زىمىرايدى. ءتىلشى حوتان اۋدانى باقچي قالاشىعى بازاربويى قىستاعىنان تاڭ سارىدە قىستاق جولىندا الۋان رەڭدى ەلەكتروسيكلدىڭ ۇزىن ءبىر قاتار بولىپ ءتىزىلىپ كەتىپ بارا جاتقاندىعىن، دۋلىعانىڭ استىنداعى كۇلگى ۇيىرىلگەن جۇزدەر قازىرگى وڭتۇستىك شينجياڭنىڭ ەرەكشە كورىنىسىنە اينالعاندىعىن كوردى.

  كەشقۇرىم قىستاق تاعى ابىر - سابىر كۇيگە تۇسەدى: ساباقتان تۇسكەن بالالار ارت - ارتىنان ۇيلەرىنە قايتسا، جۇمىستان قايتقان تۇرعىندار دا ۇيلەرىنە ورالىپ، قىستاقتى تاعى دا دۋمانعا بولەيدى.

  كەشكى استان كەيىن، كوپتەگەن قىستاق تۇرعىندارى قىستاق تۇرعىندار كوميتەتىنىڭ الىس ارالىقتى وقىتۋ كلاسىنا جينالىپ، ەكرانداعى وقىتۋشىنىڭ ەگىنشىلىك، باعىمشىلىق تەحنيكاسى تۋرالى ايتقانىن، زاڭ - ساياسات تۋرالى تۇسىندىرمەسىن تىڭدايدى. ساباق ارالىعىندا، قىستاق كادرلارىنىڭ باس بولۋىندا كوپشىلىك تاعى جاڭا ءان ۇيرەنەدى. اپتا سوڭىنا كەلگەندە، قىستاق تۇرعىندارى وزدىكتەرىنەن ۇيىمداسقان كوركەمونەر ويىن قويۋ اترەتى قىستاقتارداعى ۇلكەن ساحنادا ءان - ءبي، كۇي سياقتى نومىرلەردى قويىپ، قىستاقتى ءتىپتى دە دىر - دۋمانعا بولەيدى.

  بيىل وڭتۇستىك شينجياڭداعى قىستاقتار ارت - ارتىنان كەشكى بازار اشىپ، شارۋالاردى جۇمىستانۋعا باستاپ كىرىستەرىن ارتتىرىپ قانا قالماستان، اۋىل - قىستاقتىڭ كەشىن دە دۋمانعا بولەدى. كەريا اۋدانى لانگان اۋىلىندا 40 نەشە ازىق - تۇلىك جايما يەسى بار كەشكى بازار ايرىقشا دۋماندى بولادى، كەش باتىسىمەن قىستاق تۇرعىندارى ءمانتى، جىڭعىل كاۋاپ، ايران، قياق كۇرىش سياقتى ءدامدى تاعامداردان ءدام تاتادى ءارى راۋاپ شالىپ، دۇتتار شەرتىپ، قول بارابان ۇرعان اۋىل - قىستاق ونەرپازدارىنا الاقايلاپ قوشامەت بىلدىرەدى.

  اۋىل - قىستاقتىڭ ”دۋماندى ۋاقىتىنىڭ“ وزگەرۋى − وڭتۇستىك شينجياڭنىڭ كاسىپ سالاسىن دامىتىپ، جۇمىستانۋدى جەبەۋى اكەلگەن تىكەلەي وزگەرىس. ءتىلشى حوتان ايماقتىق پارتكومنان ۇعىسۋىنشا، قىسقا عانا بىرنەشە جىلدا جەرگىلىكتى ورىننان 70تە 80 مىڭ ادام كاسىپورىندارعا كىرىپ جۇمىس ىستەگەن، مۇنىڭ ىشىندە %60تەن استامى ايەلدەر ەكەن. وڭتۇستىك شينجياڭدا ءانۋارنيساحان سياقتى وتباسىنان شىعىپ، سول جەردە، جاقىن ماڭدا جۇمىستانعان نەمەسە قالاعا بارىپ جۇمىس ىستەگەن شارۋالار بارعان سايىن مولايىپ، كىرىستەرىن ارتتىرىپ قانا قالماستان، كوز ايالارىن كەڭەيتىپ، قوعامدىق بەت - بەينەنىڭ وزگەرۋىنە جەتەكشى بولدى.

  ”شارۋادان جۇمىسشىعا وزگەردىم، وتە كەرەمەت سەزىنىپ تۇرمىن“، - دەدى ءانۋارنيساحان، قازىر ول زاۆودتىڭ ىسىلعان جۇمىسشىسى ءارى شاكىرت تاربيەلەي باستادى، ءار ايداعى 2000 نەشە يۋان ەڭبەكاقىسى ونىڭ وتباسىن كەدەيلىكتەن ارىلتتى.

جاۋاپتى رەداكتور: ريزا حاميت
  • 1
  • 2
  • 3
  • 4