مامەت ءاليدىڭ قايىن ايتتىرۋى

مامەت ءاليدىڭ قايىن ايتتىرۋى

گازەتىمىزدىڭ اقسۋداعى تىلشىلەر پۋنكتىنەن رىن چۇنحۋا

  5 - ايدىڭ 31 - كۇنى ونسۋ اۋدانى توقۇلا اۋىلىندا اۋىل شارۋاشىلىق ءوندىرىسى ماتەريالدارى دۇكەنىن اشاتىن ليۋ شۋانپيڭ ەرتەمەن رۋحتى دا كەلىستى جاسانىپ، جۇزىنەن شات كۇلكى ەستى. ول بۇگىن اكە ورنىندا ”ۇلى“ مامەت اليگە قايىن ايتتىرۋعا بارماقشى ەدى.

  ”قىز جاققا الا باراتىن قوي، قۇرعاق جەمىس، نان، كامپيت، كيىم - كەشەكتىڭ بارلىعىن تۇگەل الدىڭ با؟ بىردەڭە قالىپ قويماسىن، سەن مەنىڭ دۇكەنىمە كەل، بىرگە جولعا شىعايىق“. تاڭەرتەڭ ساعات 9دا ليۋ شۋانپيڭ مامەتكە تەلەفون شالىپ، قۇدالىققا بارۋدىڭ دايىندىق جۇمىستارىن قاداعالاپ تاپسىردى. ءوزى ۇيىندە ايناعا قاراپ، قۇدالىق سويكەسكەندە ايتاتىن سوزدەردى قايتا - قايتا ماشىقتاندى.

  ساعات 12دە مامەت جاڭادان ساتىپ العان اۆتوكولىگىمەن شەشەسىن، اپايىن، جەزدە اعاسىن ەرتىپ، ليۋ شۋانپيڭنىڭ اۋىل شارۋاشىلىق ءوندىرىسى ماتەريالدارى دۇكەنىنە كەلدى، ءبىر وتباسىنىڭ ادامدارى كوڭىلدى بەينەدە قىزدىڭ ۇيىنە قايىن ايتتىرا بارۋداعى ىستەردى تاپتەشتەي اقىلداستى. قايىن ايتتىرۋدان بۇرىنعى تولىق دايىندىقتان كەيىن، 3 اۆتوكولىك قىز جاقتىڭ ءۇيى تۇرعان ونسۋ اۋدانى تۇمسىق قالاشىعى جوعارعى سىرىم قىستاعىن بەتكە الىپ جولعا شىقتى.

  اۆتوكولىكتەن تۇسىسىمەن، مامەت دايىنداپ العان سالەم - ساۋقىتتارىن اۆتوكولىكتەن تۇسىرە باستادى، قىز جاق ءرايلا راحىماننىڭ ۇيىندەگىلەر ىقىلاسپەن قارسى الىپ، قوناقتاردى ۇيگە كىرگىزىپ، ۇستەلگە اينالا وتىرعىزدى.

  ”مىنا كىسى مەنىڭ ’ليۋ اكەم‘ بولادى، بالا كەزىمنەن وسى كىسىنىڭ الدىندا ەسەيىپ - ەرجەتتىم، قۇددى ءوز اكەم سياقتى“. ەكى جاقتىڭ اتا - اناسى مەن تۋىس - تۋعاندارى جايعاسىپ وتىرعاننان كەيىن، مامەت الدىمەن ليۋ شۋانپيڭدى تانىستىردى، سونداي - اق ونىڭ بۇگىن اكەسى ورنىندا كەلىپ وتىرعاندىعىن ايتا كەتتى. تۋىستار ءبىر - بىرلەپ تانىستىرىلعاننان كەيىن، ەكى جاق تاماقتان اۋىز تيە وتىرىپ شۇيىركەلەسە باستادى.

  ”ەكى بالا دا جاقسى بالا، ولاردىڭ ارالاسقانىنا دا جارتى جىلدان استى، قىزدارىڭىز سۇلۋ دا اقىلدى ەكەن، ءبىز قاتتى رازى بولدىق. ءبىزدىڭ ۇل دا تالپىنعىش، قازىر 2 اسحانا اشىپ وتىر. كونەلەردە شاڭىراق كوتەرىپ، تىرشىلىك قۇر دەگەن اتالى ءسوز بار، الدىمەن شاڭىراق كوتەرىپ، وتاۋ تىككەندە عانا بارىپ، شارۋاشىلىعىڭ ءتىپتى دە جاقسى داميتىن بولادى. بالالار باسىنا شاڭىراق كوتەرەتىن جاسقا كەلدى، ولار بيىل ۇيلەنسە دەگەن تىلەگىمىز بار...“. ليۋ شۋانپيڭ قىز جاقتىڭ تۋىسى - تۋعاندارىنا قۇدالىق تىلەگىن ءبىلدىردى.

  داستارقان باسىندا، ءبىر تۋىسقانىنىڭ بۇل ”اكە - بالا“ اراسىنداعى حيكاياعا اڭسارى اۋدى، ليۋ شۋانپيڭ مەن مامەت كوپ جىلدان بەرى ورناعان اكە - بالا سۇيىسپەنشىلىكتەرىن كوڭىلدەنە اڭگىمەلەي باستادى.

  ”مامەتتىڭ اتا - اناسى ءبارىمىز ارال قالاشىعىندا دۇكەن اشامىز، ول كەزدە بۇل كىشكەنە بولاتىن، ءتىلى ءتاتتى، سۇيكىمدى ەدى“، - دەدى ليۋ شۋانپيڭ، ەكى ۇيدەگىلەر بىرتە - بىرتە تانىسىپ كەتتىك. ليۋ شۋانپيڭنىڭ دە ءبىر ۇل، ءبىر قىزى بار ەكەن، بالالار ۇنەمى بىرگە وينايدى، باسقالارىنا ەرىپ، ءوزىن ”اكە“ دەپ شاقىرۋعا دا ادەتتەنىپ كەتىپتى. ليۋ شۋانپيڭ دە ونى ءوز بالاسىنداي كورەدى ەكەن، مامەت اعاتتىق وتكىزسە، وعان سابىرلىلىقپەن اقىل ايتىپ، اق پەن قارانى پارىقتاۋدى ۇيرەتىپتى.

  ”’ليۋ اكەم‘ مەنىڭ ەسەيىپ - ەرجەتۋ بارىسىمدا شەشۋشى رول اتقاردى، ونىڭ تاربيەسى مەن كومەگى بولماعاندا، قازىر قانداي ادام بولىپ شىعارىمدى ويلاۋعا باتىلىم بارمايدى“. مامەت ەسىنەن كەتپەيتىن بىرنەشە ءىستى ەمىرەنە اڭگىمەلەپ بەردى. 10 نەشە جاس كەزىندە، مامەت ساباقتاستارىمەن توبەلەسىپ، تەمەكى شەگىپ، اراق ىشەدى. ”ليۋ اكەسى“ وعان كوپ - كوپ اقىل ايتىپ، سويقان شىعارىپ توبەلەسۋدىڭ ونەر ەمەس ەكەنىن، وتباسىنداعىلاردىڭ كوڭىلىن ورنىقتىرىپ، الاڭسىز ەتۋدىڭ ەر ازاماتتىڭ جاۋاپكەرشىلىگى ەكەنىن تۇسىندىرەدى. ورتالاۋ مەكتەپتى تاۋىسقاندا، ”ليۋ اكەسى“ وعان كاسىپتىك - تەحنيكالىق مەكتەپكە بارىپ ونەر ۇيرەنۋدى ۇسىنىس ەتەدى، مەكتەپ بىتىرگەن سوڭ، ونى تاعى دا اسكەرگە قاتىناسۋعا تانىستىرىپ، ونى دۇرىس ءومىر جولىنا باستايدى. ول دەربەس شارۋاشىلىق قۇرۋدى ويلاعاندا ليۋ شۋانپيڭ وعان كومەكتەسىپ سابىرلىلىقپەن بازار جاعدايىنا تالداۋ جاسايدى ءارى وعان شارۋاشىلىق قۇرۋ قاراجاتىن بەرە تۇرادى، سونىمەن كوپ ۇزاماي مامەتتىڭ تۇڭعىش باتىسشا تاعام رەستۋرانى اشىلادى، جارتى جىلدان كەيىن تاعى دا ءبىر مۋزيكالى تاعامجايى اشىلادى.

  ”قۇلشىنا ءجۇرىپ، مەن عيماراتتان ءبىر ءۇي ساتىپ الدىم، جەڭىل اۆتوكولىككە دە قولىم جەتتى، ەندى كەلىنشەك الۋ عانا قالدى، كەلىنشەك الۋ سىندى ومىردەگى ۇلكەن ىسكە دە ’ليۋ اكەمنىڭ‘ ارالاسۋىن ءۇمىت ەتەمىن، ويتكەنى ول مەنى تاماشا ومىرگە باستادى“، - دەيدى مامەت كۇلىپ تۇرىپ كوپشىلىككە.

  ليۋ شۋانپيڭ مەيىرلەنە مامەتكە قاراعاننان كەيىن، سول جەردەگى وتىرعان تۋىستارعا بىلاي دەدى: ”بۇل بالا كىشكەنتايىنان كوڭىلشەك، تالاپتانعىش بولىپ ءوستى، قىسقا عانا بىرنەشە جىلدا رەستۋراننىڭ تيجاراتىن ءساتتى جۇرگىزدى. ۇيلەنگەننەن كەيىن ءرايلاداي جاقسى بويجەتكەندى جار ەتسە، بۇدان كەيىنگى كۇندەرىنىڭ ءتىپتى دە جاقسى بولاتىندىعىنا، شارۋاشىلىعىنىڭ دا بارىنشا دامي تۇسەتىندىگىنە سەنەمىن“.

  اتتاناردا، قىز جاقتىڭ اتا - اناسى جاۋابىن بەرىپ، ەكى جاستىڭ ۇيلەنۋىنە قوسىلدى ءارى بيىل 9 - ايدا ءساتتى ءبىر كۇندى تاڭداپ توي جاساۋدى بەكىتتى.

  ءرايلانىڭ اكەسى راحىمان تۇراپ بىلاي دەدى: بۇل قۇدالىققا ءدان ريزامىن، مامەت ەڭ ماڭىزدى جاقىن - جان اشىرىن ەرتىپ قايىن ايتتىرا كەلىپ، وتباسىمىزداعىلاردى قۋانتتى. ونىمەن ”ليۋ اكەسىنىڭ“ اڭگىمەسى توتەنشە اسەرلى ەكەن، مەن دە ”ليۋ اكەسىن“ قۇدامداي سيلاپ وتەمىن، وسى سۇيىسپەنشىلىكتىڭ جالعاسا بەرۋىن ءۇمىت ەتەمىن.

جاۋاپتى رەداكتور: ريزا حاميت