شي جينپيڭ بيرمانىڭ زۇڭتۇڭىمەن، بانگلادەشتىڭ زۇڭليىمەن جەكە - جەكە تەلەفوندا سويلەستى

  شينحۋا اگەنتتىگىنىڭ 5 - ايدىڭ 20 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 5 - ايدىڭ 20 - كۇنى كەشتە بيرمانىڭ زۇڭتۇڭى ۋىن مينمەن تەلەفوندا سويلەستى.

  شي جينپيڭ بىلاي دەپ اتاپ كورسەتتى: جۇڭگودا جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، بيرما ۇكىمەتى مەن قوعامىنىڭ ءار سالاسى جۇڭگو جاققا كومەك قولىن سوزدى. بيرماداعى ىندەتكە ءبىز دە كوڭىل بولۋدەمىز. جۇڭگو جاق بيرما جاققا كوپ توپتا ىندەتكە قارسى اتتانۋ زاتتىق ماتەريالدارىن بەردى ءارى 2 توپتا ەمدەۋ ماماندارى گرۋپپاسىن بيرمانىڭ ەمدەۋ قىزمەتكەرلەرىمەن تىزە قوسا كۇرەس جاساۋعا جىبەردى. بۇل ەكى ەل حالىقتارىنىڭ قيىندىقتاردى بىلەك بىرىكتىرە جەڭىپ، ءوزارا قارايلاساتىن باۋىرلاستىق سۇيىسپەنشىلىگىن تولىق ايگىلەپ، جۇڭگو مەن بيرمانىڭ بەينەت پەن زەينەتتە بىرگە بولاتىن تاعدىرلاس ورتاق تۇلعا رۋحىن تەرەڭ ءتۇسىندىردى. جۇڭگو جاق بيرما جاقتىڭ قاجەتىنە قاراي، ۇزدىكسىز باتىل قولداۋ كورسەتەدى جانە قولىنان كەلگەنشە كومەكتەسەدى. بيرما حالقىنىڭ ىندەتتى سوڭىندا، ءسوز جوق، جەڭەتىندىگىنە سەنەمىن. جۇڭگو جاق بيرمانى قامتىعان حالىقارالىق قوعاممەن بىرگە، دۇنيە جۇزىلىك دەنساۋلىق ساقتاۋ ۇيىمىنىڭ باسشىلىق رولىن ساۋلەلەندىرۋىن ۇزدىكسىز قولداپ، حالىقارانىڭ ادىلدىگىن، تۋراشىلدىعىن جانە حالىقارالىق قارىم - قاتىناستىڭ نەگىزگى ولشەمدەرىن باتىل قورعاپ، وسى رەتكى الەمدىك دەنساۋلىق ساقتاۋدى قورعاۋ شايقاسىندا قول ۇستاسا جەڭىسكە جەتۋدى قالايدى.

  شي جينپيڭ بىلاي دەپ باسا دارىپتەدى: بيىل جۇڭگو مەن بيرمانىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى. بيىل 1 - ايدا مەن ەلدەرىڭىزدە ءساتتى ساپاردا بولدىم، ءبىز جۇڭگو - بيرما تاعدىرلاس ورتاق تۇلعاسىن قۇرۋدى ءبىر اۋىزدان ماقۇلداپ، جۇڭگو - بيرما قارىم - قاتىناسىنىڭ جاڭا ءداۋىرىن باستادىق. ەكى جاقتىڭ تىعىز سايكەسىپ، ساپار جەتىستىكتەرىن ناقتى تياناقتاندىرۋىن ءۇمىت ەتەمىن. ەكى جاق ىندەتتەن ساقتانۋ - تىزگىندەۋدى جاقسى ىستەۋ نەگىزىندە، ءار سالاداعى بارىس - كەلىستى، سەلبەستىكتى ورنىقتى ىلگەرىلەتىپ، ەكونوميكالىق ءدالىز نىسانىن ىلگەرىلەتۋدە بەلسەندى ىلگەرىلەۋشىلىككە قول جەتكىزۋ كەرەك. ەكى ەل شەكاراسىنداعى بىرلەسىپ تىزگىندەۋ، بىرلەسىپ ساقتانۋ مەحانيزمىن ويداعىداي پايدالانىپ، شەكارانىڭ بەيبىتشىلىگى مەن تىنىشتىعىن قورعاۋدى، ىندەتتەن ساقتانۋ - تىزگىندەۋدى جانە جۇمىستى، ءوندىرىستى قالپىنا كەلتىرۋدى ءبىر تۇتاس جوسپارلاۋ كەرەك.

  ۋىن مين مىنالاردى ءبىلدىردى: ءسىزدىڭ پارمەندى باسشىلىعىڭىزدا، جۇڭگو ۇكىمەتى مەن حالقى ىندەتتەن ءونىمدى ساقتانىپ جانە ونى تىزگىندەپ، بۇكىل ەلدىڭ ەكونوميكاسى، قوعامى، تۇرمىسى جاپپاي قايتا قالپىنا كەلدى، بيرما جاق بۇعان ايرىقشا قۋانادى. جۇڭگو جاقتىڭ دۇنيە جۇزىلىك دەنساۋلىق ساقتاۋ ۇيىمىنىڭ جانە بيرمانى قامتىعان باسقا مەملەكەتتەردىڭ ىندەتكە قارسى اتتانۋىنا قولداۋ كورسەتكەندىگىنە جانە كومەكتەسكەندىگىنە العىس ايتامىز. ىندەت الدىندا ءار ەل سەلبەستىكتى كۇشەيتىپ، حالىقارانىڭ تۋراشىلدىعىن قورعاۋ، ءار ەلدىڭ دامۋ ۇقىعىن قورعاۋ ءتيىس. بيرما مەن جۇڭگو اراسىنداعى تاماشا سەلبەستىك ەكى جاقتىڭ بيرما - جۇڭگو تاعدىرلاس ورتاق تۇلعاسىن قۇرۋعا قۇلشىنعاندىعىنىڭ بەينەسى. بيرما جاق ءبىر جۇڭگو ساياساتىن ۇزدىكسىز باتىل اتقارادى. بيرما جاق جۇڭگو جاقپەن بىرگە، ءتوراعا شي جينپيڭنىڭ بيىل 1 - ايداعى بيرماداعى ساپار جەتىستىكتەرىن مۇقيات تياناقتاندىرىپ، باۋىرلاستىق سۇيىسپەنشىلىكتى جانە ءار سالاداعى سەلبەستىكتى ۇزدىكسىز تەرەڭدەتىپ، بيرما - جۇڭگو جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىنىڭ ۇزدىكسىز دامۋىن ىلگەرىلەتەدى.

  شينحۋا اگەنتتىگىنىڭ 5 - ايدىڭ 20 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 5 - ايدىڭ 20 - كۇنى كەشتە بانگلادەشتىڭ زۇڭليى حاسينامەن تەلەفوندا سويلەستى.

  شي جينپيڭ بىلاي دەپ اتاپ كورسەتتى: جۇڭگو جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانعان شەشۋشى ساتتە، بانگلادەش قوعامىنىڭ ءار سالاسى تۇرلىشە تاسىلدەرمەن جۇڭگو جاققا قولداۋ كورسەتىپ، بانگلادەش حالقىنىڭ جۇڭگو حالقىنا دەگەن تەرەڭ سۇيىسپەنشىلىگىن ايگىلەدى. كەزەكتە وڭتۇستىك ازيا وڭىرىندە ىندەت تارالۋدا، ساقتانۋ - تىزگىندەۋ مىندەتى ءالى دە جاپالى. جۇڭگو جاق بانگلادەش جاقتىڭ قاجەتىنە قاراي، بانگلادەش جاقتىڭ ىندەتكە قارسى اتتانۋىنا ۇزدىكسىز باتىل قولداۋ كورسەتەدى جانە قولىنان كەلگەنشە كومەكتەسەدى، جاقىندا بانگلادەش جاققا ءبىر ەمدەۋ ماماندارى گرۋپپاسىن جىبەرەدى. ءسىزدىڭ باسشىلىعىڭىزدا، بانگلادەش حالقىنىڭ ىندەتتى، ءسوز جوق، كۇنى بۇرىن جەڭەتىندىگىنە سەنەمىن. بانگلادەش ۇكىمەتىنىڭ بانگلادەشتەگى جۇڭگو ازاماتتارىنا كومەكتەسكەندىگىنە العىس ايتامىن، جۇڭگو جاق تا بانگلادەشتىڭ جۇڭگوداعى ازاماتتارىنىڭ ءومىرىنىڭ حاۋىپسىزدىگى مەن دەنساۋلىعىن ۇزدىكسىز قامتاماسىز ەتەدى.

  شي جينپيڭ بىلاي دەپ باسا دارىپتەدى: جۇڭگو جاق حالىقارانىڭ ىندەتكە قارسى اتتانۋ سەلبەستىگىنە كەدەرگىلىك جاسايتىن، بۇكىل الەمنىڭ، اسىرەسە، قالىڭ وركەندەپ كەلە جاتقان ەلدەردىڭ ىندەتكە قارسى اتتانۋداعى قۇلشىنىسىنا زيان سالاتىن ارەكەتتەرگە قارسى تۇرادى. جۇڭگو جاق بانگلادەشتى قامتىعان حالىقارالىق قوعاممەن بىرگە، دۇنيە جۇزىلىك دەنساۋلىق ساقتاۋ ۇيىمىنىڭ باسشىلىق رولىن ساۋلەلەندىرۋىن قولداپ، حالىقارالىق بىرلەسىپ ساقتانۋ، بىرلەسىپ تىزگىندەۋ سەلبەستىگىن ىلگەرىلەتىپ، الەمدىك الەۋمەتتىك دەنساۋلىق ساقتاۋ حاۋىپسىزدىگىن قورعاۋدى قالايدى.

  شي جينپيڭ بىلاي دەپ باسا دارىپتەدى: جۇڭگو مەن بانگلادەش ءداستۇرلى دوس كورشىلەر، ەكى جاق ءبىر - ءبىرىنىڭ ماڭىزدى دامۋ سەرىكتەرى. ەكى جاق جۇڭگو - بانگلادەش ستراتەگيالىق سەلبەستىك سەرىكتەستىك قارىم - قاتىناسىن بەكەمدەپ، ”ءبىر بەلدەۋ، ءبىر جولدى“ بىرگە قۇرۋدى تەرەڭدەتۋ كەرەك. جۇڭگو جاق بانگلادەش جاقپەن ىندەتتەن ساقتانۋ - تىزگىندەۋگە شىنايى كەپىلدىك ەتۋ العى شارتىندا، ءتيىمدى شارت - جاعدايلاردى بىرتىندەپ ازىرلەپ، ءتۇيىندى سەلبەستىك نىساندارىن اتقارۋدى قالپىنا كەلتىرىپ، كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن ساقتاپ، ەكى جاقتىڭ ىندەتتەن كەيىن ءار سالاداعى سەلبەستىگىن كەڭەيتۋگە تاماشا نەگىز سالۋدى قالايدى.

  حاسينا مىنالاردى ءبىلدىردى: بانگلادەش پەن جۇڭگو دوستىعىنىڭ تاريحى ۇزاق، تامىرى تەرەڭ، ءتوراعا شي جينپيڭ 2016 - جىلى بانگلادەشتە ءساتتى ساپاردا بولىپ، ەكى ەلدىڭ قارىم - قاتىناسىن جاڭا بەلەسكە كوتەردى. بانگلادەش جاق ىندەتكە قارسى اتتانعان قيىن ساتتە، جۇڭگو جاق بەرگەن قىمباتتى قولداۋ مەن كومەك بانگلادەش جاقتىڭ ساقتانۋ - تىزگىندەۋ قابىلەتىن كۇشەيتتى، بانگلادەش جاقتىڭ قيىنشىلىقتى جەڭۋ سەنىمىن نىعايتتى، بانگلادەش جاق بۇعان كوپتەپ العىس ايتادى. جاڭا تيپتى ايدارشا ۆيرۋس وكپە قابىنۋ ىندەتى الەمدىك سىن - سايىس، ءار ەل بىرگە توتەپ بەرۋى ءتيىس. جۇڭگو جاقتىڭ بانگلادەشتىڭ جۇڭگوداعى ازاماتتارىنا، اسىرەسە، ۋحانداعى بانگلادەش وقۋشىلارىنا قامقورلىق جاساعاندىعىنا العىس ايتامىن، بانگلادەش جاق جۇڭگونىڭ بانگلادەشتەگى ازاماتتارىنىڭ تۇرمىسىن جاقسى قامتاماسىز ەتەدى. بانگلادەش جاق جۇڭگو جاقپەن ”ءبىر بەلدەۋ، ءبىر جولدى“ بىرگە قۇرىپ، بانگلادەش - جۇڭگو ستراتەگيالىق سەلبەستىك سەرىكتەستىك قارىم - قاتىناسىنىڭ ۇزدىكسىز دامۋىن ىلگەرىلەتۋدى قالايدى.

جاۋاپتى رەداكتور: ريزا حاميت