شي جينپيڭ وڭتۇستىك افريكانىڭ زۇڭتۇڭىمەن، ۆەنگريانىڭ زۇڭليىمەن جەكە - جەكە تەلەفوندا سويلەستى

  شينحۋا اگەنتتىگىنىڭ 5 - ايدىڭ 15 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 5 - ايدىڭ 15 - كۇنى كەشتە وڭتۇستىك افريكانىڭ زۇڭتۇڭى رامافوسامەن تەلەفوندا سويلەستى.

  شي جينپيڭ بىلاي دەپ اتاپ كورسەتتى: كەزەكتە افريكادا ىندەت جەدەل كەڭەيۋدە، ورشۋدە. ءسىزدىڭ باسشىلىعىڭىزدا وڭتۇستىك افريكا ۇكىمەتى ىندەتكە توتەپ بەرۋدىڭ ءبىر قىدىرۋ شاراسىن قولدانىپ، بەلسەندى ناتيجەگە قول جەتكىزدى. جۇڭگو جاق وڭتۇستىك افريكاعا ۇزدىكسىز باتىل قولداۋ كورسەتىپ جانە قولىنان كەلگەنشە كومەكتەسىپ، ەكى جاقتىڭ ەمدەۋ - دەنساۋلىق ساقتاۋ سەلبەستىگىن كۇشەيتەدى. جۇڭگو جاق وڭتۇستىك افريكامەن ۇنەمىلىك بايلانىستى ساقتاپ، بريكس ەلدەرى، 20 ەل توبى، بىرلەسكەن مەملەكەتتەر ۇيىمى سياقتى كوپ جاقتى تۇعىردا سايكەسۋدى كۇشەيتىپ، جۇڭگو مەن وڭتۇستىك افريكانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ تەرەڭدەي دامۋىن ىلگەرىلەتىپ، ەكى ەلدىڭ جانە وركەندەپ كەلە جاتقان ەلدەردىڭ ءتۇبىرلى مۇددەسىن بىرگە قورعاۋدى قالايدى.

  شي جينپيڭ بىلاي دەپ باسا دارىپتەدى: جۇڭگو مەن افريكانىڭ ءداستۇرلى دوستىعى تەرەڭ، ەكى جاق ءبىر - بىرىنە سەنەدى، جاقسى دوستار، جاقسى سەرىكتەر، جاقسى باۋىرلاستار. جۇڭگو جاق افريكا ەلدەرىنىڭ ىندەت جانە ەكونوميكانىڭ قۇلدىراۋى سىندى قوس قابات قىسىمعا ءدوپ كەلىپ وتىرعاندىعىن سەزىنەدى، ءوز باسى دا ىندەتكە قارسى اتتانۋدىڭ زور قىسىمىنا ءالى دە ءدوپ كەلىپ وتىرعان جاعدايدا، بىرنەشە توپقا، رەتكە ءبولىپ افريكا وداعىن جانە افريكا ەلدەرىن قىرۋار زاتتىق ماتەريالدارمەن قامداپ، بەلسەندى تۇردە افريكا ەلدەرىنە ەمدەۋ ماماندار گرۋپپاسىن جىبەردى، افريكا جاقپەن مامانداردىڭ بەينەەكران ءماجىلىسىن وتكىزىپ، دياگنوز قويۋ - ەمدەۋ تەحنيكالىق اۋىس - كۇيىسىن بۇكپەسىز ورىستەتتى. جۇڭگو جاق حالىقارالىق قوعامدى افريكانىڭ ىندەتكە قارسى اتتانۋىنا قولداۋ كورسەتۋدى ارتتىرۋعا ۇندەيدى ءارى 20 ەل توبىنىڭ ”قارىز اقشانى قايتارۋ ۋاقىتىن كەشەۋىلدەتۋ دارىپتەمەسىنە“ بەلسەنە ات سالىسادى. كەزەكتەگى جاعدايدا جۇڭگو مەن افريكا ءارقانداي كەزدەگىمەن سالىستىرعاندا تاعدىرلاس بولۋدى، ىندەتكە ىنتىماقتاسا قارسى اتتانۋدى، قيىنشىلىقتى بىلەك بىرىكتىرە جەڭۋدى اناعۇرلىم قاجەت ەتەدى. جۇڭگو جاق افريكاداعى باۋىرلاستارمەن تاباندى تۇردە ءبىر جاقتا بولادى. ەكى جاق بىرلەسكەن مەملەكەتتەر ۇيىمى مەن دۇنيە جۇزىلىك دەنساۋلىق ساقتاۋ ۇيىمىنىڭ ىندەتكە قارسى اتتانۋدىڭ حالىقارالىق سەلبەستىگىن سايكەستىرۋ بارىسىندا بەلسەندى رول اتقارۋىن قولداۋ كەرەك. جۇڭگو جاق افريكا جاقپەن بىرگە، اناعۇرلىم بەرىك جۇڭگو − افريكا تاعدىرلاس ورتاق تۇلعاسىن ورناتۋدى قالايدى.

  رامافوسا مىنالاردى ءبىلدىردى: وڭتۇستىك افريكا مەن جۇڭگو ەكى ەل كوپتەگەن ماسەلەلەردە ورتاق تانىمعا يە، ەكى جاقتىڭ قارىم - قاتىناسى بەكەم، جاقسى. وڭتۇستىك افريكا جۇڭگو جاقتىڭ تايۋان سياقتى جۇڭگونىڭ وزەكتى مۇددەسىنە ساياتىن ماسەلەلەردەگى تۇرعىسىن قولدايدى، جۇڭگو جاقپەن تىعىز سەلبەستىك جاساپ، ەكى جاقتىڭ ورتاق مۇددەسىن قورعاۋدى قالايدى. جۇڭگو جاقتىڭ افريكا ەلدەرىنە ۇزبەي كورسەتىپ كەلگەن قىمباتتى كومەگىنە جانە قولداۋىنا العىس ايتادى، جۇڭگو وڭتۇستىك افريكانىڭ جانە افريكا ەلدەرىنىڭ ناعىز دوسى، قيىنشىلىققا، سىن - سايىسقا ءدوپ كەلگەندە سۇيەنىش ەتەتىن سەرىگى. افريكا وداعى مەن افريكا ەلدەرى بىرلەسكەن مەملەكەتتەر ۇيىمى مەن دۇنيە جۇزىلىك دەنساۋلىق ساقتاۋ ۇيىمىنىڭ قىزمەتىن باتىل قولدايدى، ىندەتكە قارسى اتتانۋدىڭ حالىقارالىق سەلبەستىگى ءۇشىن بەلسەندى رول اتقارادى.

     شينحۋا اگەنتتىگىنىڭ 5 - ايدىڭ 15 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 5 - ايدىڭ 15 - كۇنى كەشتە ۆەنگريانىڭ زۇڭليى وربانمەن تەلەفوندا سويلەستى.

  شي جينپيڭ بىلاي دەپ باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتىنە بىرگە قارسى اتتانعان ەرەكشە مەزگىلدە، جۇڭگو مەن ۆەنگريا ەكى ەل حالقى قيىندىقتى بىلەك بىرىكتىرە جەڭدى، ءبىر - بىرىنە قول ۇشىن بەردى. جۇڭگو جاق ۆەنگريا ۇكىمەتى مەن حالقىنىڭ ىندەتكە قارسى اتتانۋ قۇلشىنىسىن باتىل قولدايدى، ۆەنگريا جاققا قولىنان كەلگەنشە ۇزدىكسىز كومەك كورسەتەدى. مەن ءسىزدىڭ پارمەندى باسشىلىعىڭىزدا قايراتتانا ۇمتىلعان ۆەنگريا حالقىنىڭ ىندەتتى، ءسوز جوق، كۇن ىلگەرى جەڭە الاتىندىعىنا سەنەمىن. جۇڭگو جاق بىرلەسكەن مەملەكەتتەر ۇيىمىنىڭ جانە دۇنيە جۇزىلىك دەنساۋلىق ساقتاۋ ۇيىمىنىڭ ىندەتكە قارسى اتتانۋدىڭ حالىقارالىق سەلبەستىگىندە تيەسىلى رول اتقارۋىن باتىل قولدايدى، ۆەنگريانى قامتىعان دۇنيە جۇزىندەگى ءارقايسى ەلدەرمەن بىرلەسىپ ساقتانۋدى، بىرلەسىپ تىزگىندەۋدى ءونىمدى ورىستەتىپ، ىندەتتىڭ ءورشۋىن باتىل تىزگىندەۋمەن بىرگە، ماكرولىق ەكونوميكالىق ساياساتتى سايكەستىرۋدى كۇشەيتىپ، ىندەتتىڭ دۇنيە ءجۇزى ەكونوميكاسىنا اكەلگەن سىن - سايىسىنا بىرگە توتەپ بەرۋدى قالايدى.

  شي جينپيڭ بىلاي دەپ اتاپ كورسەتتى: ىندەتكە بىرگە قارسى اتتانۋ سىنىن باستان كەشكەن جۇڭگو مەن ۆەنگريانىڭ ءداستۇرلى دوستىعى اناعۇرلىم تەرەڭدەيدى، سەلبەستىك جاساسۋ بولاشاعى اناعۇرلىم جارقىن بولادى. ەكى جاق ىندەتتەن كەيىنگى ەكى جاقتى قارىم - قاتىناستىڭ دامۋىن بەلسەنە جوبالاپ، جوعارى جىكتەگىلەردىڭ بارىس - كەلىسىن ساقتاپ، ەكونوميكا - ساۋدا، قارجى قوسۋ سياقتى ءداستۇرلى سالالارداعى سەلبەستىكتى كۇشەيتىپ، سيفرلى ەكونوميكا، جاساندى زەردە سياقتى جاڭا سالالارداعى سەلبەستىكتى بەلسەنە قاراستىرىپ، گۋمانيتارلىق اۋىس - كۇيىستى جەبەۋ كەرەك. مەن ىندەتتەن كەيىن سىزبەن كۇن ىلگەرى جۇزدەسىپ، جۇڭگو مەن ۆەنگريانىڭ جالپى بەتتىك ستراتەگيالىق سەرىكتەستىك قارىم - قاتىناسى مەن جۇڭگو - ورتا، شىعىس ەۆروپا ەلدەرى سەلبەستىگىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋدى كۇتەمىن.

  وربان مىنالاردى ءبىلدىردى: جۇڭگو حالقى جاپالى قۇلشىنىس جاساپ، ىندەتتى ءساتتى تىزگىندەدى، مەن مۇنى قۇتتىقتايمىن. ۆەنگريا حالقى جۇڭگو جاقتىڭ ۆەنگريانى ىندەتكە قارسى اتتانۋعا شۇعىل قاجەتتى ەمدەۋ، قورعانۋ زاتتىق ماتەريالدارىمەن، ت. ب دەر كەزىندە قامداعاندىعىن ۇمىتپايدى، بۇعان تەرەڭ العىس ايتادى. ۆەنگريا جاق ءبىر جۇڭگو ساياساتىن باستان - اياق باتىل اتقارادى. ۆەنگريا مەن جۇڭگو ەكى جاق جوعارى تەحنيكا سالالارىندا تاماشا سەلبەستىك ورىستەتىپ، ۆەنگريانىڭ ەكونوميكالىق دامۋىن جەبەدى. ۆەنگريا جاق جۇڭگو جاقپەن ەكونوميكا - ساۋدا، فينانس سياقتى سالالارداعى سەلبەستىكتى كۇشەيتىپ، ورتا، شىعىس ەۆروپا ەلدەرى - جۇڭگو سەلبەستىگىنە بۇرىنعىداي قولداۋ كورسەتۋدى جانە ات سالىسۋدى قالايدى.

جاۋاپتى رەداكتور: نۇربولات قابىل