شي جينپيڭ فرانسيانىڭ زۇڭتۇڭىمەن، انگليانىڭ باس ۋازىرىمەن، ەگيپەتتىڭ زۇڭتۇڭىمەن تەلەفوندا جەكە - جەكە سويلەستى

شي جينپيڭ فرانسيانىڭ زۇڭتۇڭىمەن، انگليانىڭ باس ۋازىرىمەن، ەگيپەتتىڭ زۇڭتۇڭىمەن تەلەفوندا جەكە - جەكە سويلەستى

  شينحۋا اگەنتتىگىنىڭ 3 - ايدىڭ 23 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 23 - كۇنى كەشتە فرانسيانىڭ زۇڭتۇڭى ماكرونمەن تەلەفوندا سويلەستى.

  شي جينپيڭ مىنالاردى باسا دارىپتەدى: بيىل 1 - ايدان بەرى، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانعان شەشۋشى مەزگىلدە، مەن زۇڭتۇڭ مىرزامەن 3 رەت تەلەفوندا سويلەستىم، بۇل ءبىزدىڭ ارامىزداعى جوعارى دەڭگەيدەگى ءوزارا سەنىمىمىزدى جانە جۇڭگو مەن فرانسيا قارىم - قاتىناسىنىڭ جوعارى ورەسىن تولىق ايگىلەدى. ەكى ەل ءوزارا تىلەكتەستىك بىلدىرەتىن، قولداۋ كورسەتەتىن دوستىق ءداستۇرىن ساۋلەلەندىرىپ، ەمدەۋ، ىندەتتەن ساقتانۋ زاتتىق ماتەريالدارىن ءوزارا كومەككە بەرىپ، ءار ەل حالقىنىڭ ءوزارا قارايلاسىپ، قيىندىقتى بىرگە وتكەرۋىنە ۇلگى بولدى. مەن كەزەكتە ەۆروپاداعى جانە فرانسياداعى ىندەتتىڭ دامۋ جاعدايىنا قاداعالاي نازار اۋدارىپ وتىرمىن. فرانسيا جاق تا ءبىر قىدىرۋ بەلسەندى، ءونىمدى ساقتانۋ - تىزگىندەۋ شارالارىن قولدانۋدا، مەن فرانسيا ۇكىمەتى مەن حالقىنان شىنايى حال سۇرايمىن ءارى تاباندىلىقپەن قولدايتىندىعىمدى بىلدىرەمىن. جۇڭگو جاق فرانسيا جاققا قولىنان كەلگەنىنشە ۇزدىكسىز قولداۋ كورسەتۋدى جانە كومەك بەرۋدى قالايدى.

  شي جينپيڭ تالاپ بويىنشا جۇڭگو جاقتىڭ ىندەتتەن ساقتانۋ - تىزگىندەۋ جاعدايىن تانىستىرىپ، مىنالاردى باسا دارىپتەدى: جۇڭگو مەن فرانسيا حالىقارانىڭ جانە ءوڭىردىڭ الەۋمەتتىك دەنساۋلىق ساقتاۋ حاۋىپسىزدىگىن قورعاۋدىڭ ماشاقاتتى جاۋاپكەرشىلىگىن بىرگە ارقالاپ وتىر، ەكى جاق شىن پەيىلدەرىمەن سەلبەستىكتى كۇشەيتىپ، بىرلەسىپ زەرتتەۋ جۇرگىزگەن نىساندارىن ىلگەرىلەتىپ، مەملەكەت شەكاراسىنداعى دەنساۋلىق ساقتاۋ، كارانتيندەۋ سەلبەستىگىن كۇشەيتىپ، دۇنيە جۇزىلىك دەنساۋلىق ساقتاۋ ۇيىمىنىڭ قىزمەتىن قولداپ، افريكاداعى مەملەكەتتەردىڭ ىندەتتەن ساقتانۋ - تىزگىندەۋ قىزمەتىن ويداعىداي ىستەۋىنە بىرگە كومەكتەسىپ، دەنساۋلىق، سالاماتتىق ورتاق تۇلعاسىن قۇلشىنا قۇرۋ كەرەك. جۇڭگو جاق فرانسيا جاقپەن بىرگە قاتىستى جاقتاردىڭ بىرلەسكەن مەملەكەتتەر ۇيىمى، 20 ەل توبى، ت. ب جۇلگەسىندەگى سەلبەستىكتى ىلگەرىلەتىپ، بىرلەسىپ ساقتانۋدى - بىرلەسىپ تىزگىندەۋدى ورىستەتىپ، الەمدىك دەنساۋلىق ساقتاۋدى جونگە سالۋدى كەمەلدەندىرىپ، دامۋ ۇستىندەگى مەملەكەتتەردىڭ جانە باسقا دا قاجەتكە مۇقتاج مەملەكەتتەردىڭ قابىلەت قۇرىلىسىن كۇشەيتۋىنە كومەكتەسىپ، ىندەتتىڭ دۇنيە ءجۇزى ەكونوميكاسىنا جاساعان سوققىسىنا توتەپ بەرىپ، سەلبەستىك شۇعىلاسى ارقىلى ىندەتتىڭ تۇمانىن سەيىلتۋدى قالايدى.

  ماكرون فرانسيانىڭ كەزەكتەگى ەل ىشىندەگى ىندەت جاعدايىن جانە قولدانعان قاتىستى شارالارىن تانىستىردى. ماكرون مىنالاردى ءبىلدىردى: جۇڭگو ۇكىمەتى مەن جۇڭگو حالقى اسا زور باتىلدىقپەن جانە باتىل شارالارمەن قىسقا عانا ۋاقىت ىشىندە ىندەتتى ءونىمدى تىزگىندەدى، مەن بۇنى بارىنشا القايمىن. فرانسيا جاق جۇڭگو جاقتىڭ قۇندى قولداۋ كورسەتكەندىگىنە جانە كومەك بەرگەندىگىنە شىن جۇرەكتەن العىس ايتادى. فرانسيا جاق جۇڭگو جاقپەن ەكى جاقتى دەنساۋلىق ساقتاۋ سەلبەستىگىن ورىستەتۋدى ءارى ءار جاقتىڭ 20 ەل توبى، دۇنيە جۇزىلىك دەنساۋلىق ساقتاۋ ۇيىمى سياقتى كوپ جاقتى جۇلگەدە سەلبەستىكتى كۇشەيتىپ، قول ۇستاسا ىندەتتى جەڭىپ، ىندەتتىڭ دۇنيە ءجۇزى ەكونوميكاسىنا جاساعان سوققىسىنا بىرگە توتەپ بەرۋدى قالايدى.

  ەكى ەلدىڭ مەملەكەت باسشىلارى ءجيى بايلانىستى ساقتاپ، ەكى جاقتىڭ ءتۇرلى سالاداعى اۋىس - كۇيىس سەلبەستىگىن ىلگەرىلەتۋگە، جۇڭگو مەن فرانسيا قارىم - قاتىناسىنىڭ جوعارى دەڭگەيدە العا قاراي دامۋىنا شىنايى كەپىلدىك ەتۋگە، جۇڭگو مەن فرانسيانىڭ، جۇڭگو مەن ەۆروپانىڭ كاسىپ سالا تىزبەگىنىڭ، قامداۋ تىزبەگىنىڭ ورنىقتىلىعىن قورعاۋعا قوسىلدى.

  شينحۋا اگەنتتىگىنىڭ 3 - ايدىڭ 23 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 23 - كۇنى كەشتە انگليانىڭ باس ءۋازىرى جونسونمەن تەلەفوندا سويلەستى.

  شي جينپيڭ جۇڭگو ۇكىمەتى مەن جۇڭگو حالقى اتىنان انگليا ۇكىمەتىنەن جانە انگليا حالقىنان جاڭا تيپتى ايدارشا ۆيرۋس وكپە قابىنۋ ىندەتىنە قارسى تۇرۋ بايلانىسىمەن شىنايى حال سۇرايتىندىعىن ءبىلدىردى. شي جينپيڭ تالاپ بويىنشا جۇڭگو جاقتىڭ جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ شارالارىن تانىستىرىپ، مىنالاردى باسا دارىپتەدى: انگليا جاقتىڭ جۇڭگو جاقپەن سايكەسۋدى كۇشەيتىپ، ءتيىستى ادامداردىڭ بارىس - كەلىسى مەن ساۋدانىڭ ىركىلىسسىزدىگىن قامتاماسىز ەتۋمەن بىرگە، ىندەتتىڭ تارالۋ قاتەرىن ەڭ تومەنگى شەككە ءتۇسىرۋدى ءۇمىت ەتەدى. جۇڭگو جاق انگليا جاققا قولداۋ كورسەتۋدى جانە كومەكتەسۋدى قالايدى. باس ءۋازىر مىرزانىڭ باسشىلىعىندا، انگليا حالقىنىڭ ىندەتتى، ءسوزسىز، جەڭىپ شىعاتىندىعىنا سەنەمىن.

  شي جينپيڭ مىنالاردى باسا دارىپتەدى: جۇڭگو ۇكىمەتى شەتەلدەردەگى جۇڭگو ازاماتتارىنىڭ دەنساۋلىعىن جانە ءومىرىنىڭ حاۋىپسىزدىگىن قورعاۋعا ايرىقشا ءمان بەرەدى. انگليا جاقتىڭ شىن مانىندە ءونىمدى شارالار قولدانىپ، انگلياداعى جۇڭگو ازاماتتارىنىڭ، اسىرەسە، جۇڭگولىق وقۋشىلاردىڭ سالاماتتىعىن، حاۋىپسىزدىگىن جانە ورىندى ۇقىق - مۇددەسىن ويداعىداي قورعاۋىن ءۇمىت ەتەمىن.

  شي جينپيڭ مىنالاردى اتاپ كورسەتتى: ۆيرۋس مەملەكەت شەكاراسىنا بولىنبەيدى، ناسىلگە بولىنبەيدى، بۇكىل ادامزات ورتاق قۇلشىنعاندا عانا جەڭىپ شىعا الادى. ءار ەل بىرلەسكەن مەملەكەتتەر ۇيىمى جانە 20 ەل توبى جۇلگەسىندە سەلبەستىكتى ىلگەرىلەتىپ، ينفورماتسيا مەن تاجىريبە اۋىس - كۇيىسىنەن تەڭ يگىلىكتەنۋدى كۇشەيتىپ، عىلمي زەرتتەۋدە قامال الۋ سەلبەستىگىن نىعايتىپ، دۇنيە جۇزىلىك دەنساۋلىق ساقتاۋ ۇيىمىنىڭ ءتيىستى رولىن ساۋلەلەندىرۋىنە قولداۋ كورسەتىپ، الەمدىك دەنساۋلىق ساقتاۋدى جونگە سالۋدى ىلگەرىلەتىپ، كەمەلدەندىرىپ، ماكرولىق ەكونوميكا ساياساتىن سايكەستىرۋدى كۇشەيتىپ، بازاردى ورنىقتىرىپ، ارتۋدى ساقتاپ، حالىق تۇرمىسىنا كەپىلدىك ەتىپ، الەمدىك قامداۋ تىزبەگىنىڭ اشىق، ورنىقتى، حاۋىپسىز بولۋىنا شىنايى كەپىلدىك ەتۋى كەرەك. ىندەتتى جەڭگەننەن كەيىن، جۇڭگو مەن انگليانىڭ ءوزارا تۇسىنىستىگىنىڭ ءتىپتى دە تەرەڭدەيتىندىگىنە، ورتاق تانىمدارىنىڭ ءتىپتى دە كەڭەيە تۇسەتىندىگىنە، ەكى ەل سەلبەستىگىنىڭ ءتىپتى دە كەڭ بولاشاقتى قارسى الاتىندىعىنا سەنەمىن.

  جونسون مىنالاردى ءبىلدىردى: جۇڭگو ۇكىمەتى مەن جۇڭگو حالقى جاپالى قۇلشىنىس جاساۋ جانە وراسان زور بوداۋ بەرۋ ارقىلى ىندەتتەن ساقتانۋ - تىزگىندەۋدە كەرەمەت تابىسقا قول جەتكىزدى، مەن مۇنى قۇتتىقتايمىن. قازىر انگليادا ىندەت جاعدايى اۋىر، انگليا جاق قازىر جۇڭگو جاقتىڭ پايدالى تاجىريبەلەرىن زەرتتەپ جانە ودان ۇلگى الىپ، عىلمي، ءونىمدى ساقتانۋ - تىزگىندەۋ شارالارىن قولدانۋدا. انگليا جاق جۇڭگو جاقتىڭ قۇندى قولداۋ كورسەتكەندىگىنە جانە كومەك بەرگەندىگىنە العىس ايتادى، انگلياداعى جۇڭگو ازاماتتارىنىڭ، اسىرەسە، جۇڭگولىق وقۋشىلاردىڭ سالاماتتىعى مەن حاۋىپسىزدىگىنە كۇش سالا ويداعىداي قامقورلىق جاسايدى. مەن ءتوراعا شي جينپيڭنىڭ كوزقاراستارىن تولىق قۇپتايمىن، ىندەت الدىندا ءارقانداي ەلدىڭ ءوزىنىڭ عانا قامىن ويلاۋعا بولمايدى. ءار ەل سەلبەستىكتى كۇشەيتۋى كەرەك. انگليا جاق دۇنيە جۇزىلىك دەنساۋلىق ساقتاۋ ۇيىمىنىڭ ماڭىزدى رولىن ساۋلەلەندىرۋىن قولدايدى، ءار جاقتىڭ 20 ەل توبى سياقتى كوپ جاقتى جۇلگەدە قاتىستى سەلبەستىكتەرىن تەرەڭدەتۋىن ءۇمىت ەتەدى. جۇڭگو مەن انگليا ەكى ەل بيىل جەكە - جەكە «ورگانيزمدەردىڭ الۋان تۇرلىلىگى شارتىن» جاساسۋشى جاقتاردىڭ 15 - رەتكى ءماجىلىسىن جانە «بىرلەسكەن مەملەكەتتەر ۇيىمى كليمات وزگەرىسى جۇلگەلىك شارتىن» جاساسۋشى جاقتاردىڭ 26 - رەتكى ءماجىلىسىن وتكىزەدى، ەكى جاق وسى ورايدا، حالىقارالىق قوعامنىڭ دەنساۋلىق ساقتاۋ، ىندەتتەن ساقتانۋ سەلبەستىگىن كۇشەيتۋىن ىلگەرىلەتۋى كەرەك. مەن ءتوراعا شي جينپيڭمەن ءجيى بارىس - كەلىستى ساقتاپ، ىندەتتەن كەيىن جۇڭگوعا ەرتەرەك ساپارلاي بارۋدى، انگليا مەن جۇڭگو قارىم - قاتىناسىنىڭ دامۋىن بىرگە ىلگەرىلەتۋدى ءۇمىت ەتەمىن.

  شينحۋا اگەنتتىگىنىڭ 3 - ايدىڭ 23 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 23 - كۇنى كەشتە ەگيپەتتىڭ زۇڭتۇڭى سيسيمەن تەلەفوندا سويلەستى.

  شي جينپيڭ مىنالاردى اتاپ كورسەتتى: وسى ءبىر مەزگىلدە، ىندەت جەر شارىنداعى كوپتەگەن مەملەكەتتەردە، كوپتەگەن جەردە تۋىلدى. شىندىق ادامزاتتىڭ قۋانىش پەن جۇبانىشتى بىرگە وتكەرەتىن تاعدىرلاس ورتاق تۇلعا ەكەندىگىن قايتالاي دالەلدەدى. ءار ەل، ءسوزسىز، ىنتىماقتاسا سەلبەسىپ، بىرگە توتەپ بەرۋى كەرەك. جۇڭگو ءارقايسى ەلمەن بىرگە ادامزاتتىڭ تاعدىرلاس ورتاق تۇلعاسى ۇستانىمى نەگىزىندە، ىندەتتەن ساقتانۋدىڭ حالىقارالىق سەلبەستىگىن كۇشەيتىپ، ورتاق قاتەر مەن سايىسقا قول ۇستاسا توتەپ بەرىپ، تۇتاس الەمنىڭ الەۋمەتتىك دەنساۋلىق ساقتاۋ حاۋىپسىزدىگىن قورعايدى. ىندەت تۋىلعاننان كەيىن، ەگيپەت جاق جۇڭگونىڭ ىندەتكە قارسى تۇرۋىن قولدايتىندىعىن ءبىلدىرىپ، جۇڭگو مەن ەگيپەتتىڭ قيىن - قىستاۋ ساتتەردى بىرگە وتكەرەتىن تەرەڭ دوستىعى مەن ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناسىنىڭ جوعارى دەڭگەيىن ايگىلەدى. كەزەكتە ەگيپەتتە ىندەتكە قارسى تۇرۋدىڭ شۇعىل مىندەتىنە ءدوپ كەلىپ وتىر، جۇڭگو جاق ەگيپەت جاقپەن ىندەت ينفورماتسياسىنان، ساقتانۋ - تىزگىندەۋ، قۇتقارۋ - ەمدەۋ تاجىريبەسىنەن، ەمدەۋ، زەرتتەۋ ناتيجەسىنەن دەر كەزىندە تەڭ يگىلىكتەنۋدى، ەمدەۋ ماتەريالدارىمەن قامداۋدى، ەگيپەت جاقتىڭ ىندەتتەن ساقتانۋ - تىزگىندەۋ قىزمەتىن قولداۋدى، ىندەتكە بىرگە قارسى تۇرۋدى قالايدى. وسى جولى ىندەتكە قول ۇستاسا توتەپ بەرۋ ارقىلى جۇڭگو مەن ەگيپەت ەكى ەلدىڭ ءداستۇرلى دوستىعىنىڭ تەرەڭدەي تۇسەتىندىگىنە سەنەمىن. جۇڭگو جاق جۇڭگو - ەگيپەت قارىم - قاتىناسىن دامىتۋعا ايرىقشا ءمان بەرەدى، ەگيپەت جاقپەن قول ۇستاسا قۇلشىنىس جاساپ، ءتۇرلى سالاداعى ناقتى سەلبەستىكتى تەرەڭدەتىپ، جۇڭگو - ەگيپەت قارىم - قاتىناسىن جۇڭگو مەن اراب ەلدەرىنىڭ جانە جۇڭگو مەن افريكا ەلدەرى تاعدىرلاس ورتاق تۇلعاسىن ورناتۋدىڭ جول سالۋشىسى، سىناق ۇلگىسى ەتىپ قۇرىپ شىعۋدى قالايدى.

  سيسي مىنالاردى ءبىلدىردى: جۇڭگو ىندەتكە قارسى تۇرۋدا بەلسەندى ىلگەرىلەۋشىلىكتەرگە قول جەتكىزدى، بۇل ءتوراعا مىرزانىڭ ءدانىشپاندىق باسشىلىعىنىڭ پارمەندى دە قۋاتتى ەكەندىگىن، جۇڭگو حالقىنىڭ ىنتىماعىنىڭ ۇلى ەكەندىگىن تاعى ءبىر رەت دالەلدەدى. ەگيپەت جاق جۇڭگونىڭ ىندەتتى جەڭىپ شىعاتىندىعىنا ءارى ءتىپتى دە كۇشەيە تۇسەتىندىگىنە باستان - اياق كامىل سەنىپ كەلەدى. ەگيپەت جاق جۇڭگو جاقتىڭ كورسەتكەن قولداۋى مەن كومەگىنە العىس ايتادى، ىندەتكە بىرگە قارسى تۇرۋ ارقىلى ەگيپەت پەن جۇڭگو ەكى ەل دوستىق قارىم - قاتىناسىنىڭ ءتىپتى دە تەرەڭدەي تۇسەتىندىگىنە سەنەمىن. ەگيپەت پەن جۇڭگو ەرەكشە دوس سەرىكتەر. مەن ەگيپەت - جۇڭگو قارىم - قاتىناسىنا ايرىقشا ءمان بەرەمىن، جۇڭگو جاقپەن بىرگە قۇلشىنىپ، ەكى ەلدىڭ ءار سالاداعى ناقتى، ءوزارا پايدالى سەلبەستىگىن ىلگەرىلەتۋدى، حالىقارالىق ىستەردەگى بايلانىسىن، سايكەسۋىن كۇشەيتۋدى قالايمىن.

جاۋاپتى رەداكتور: ريزا حاميت