ەگىنجايداعى ەرشىمدى قيمىل

  

     3 - ايدىڭ 17 - كۇنى شارۋالار جاڭعاق باقشاسىندا جەر تەگىستەۋدە. اقسۋ قالاسى توپلۇق اۋىلى تومەنگى كالاكال قىستاعى جەرگىلىكتى جاعدايعا قاراي وتىرىپ، قاربىز، قىشى ەگىپ، ورمان اراسىنداعى ەگىنشىلىك شارۋاشىلىعى دامىتىلدى. □ سۋرەتتى ياڭ شو تۇسىرگەن

  گازەتىمىزدىڭ جالپىلىق اقپارات قۇرالدارى تىلشىلەرى جاڭ تيڭ، گى يوۋجۇن، حان چينيان 3 - ايدىڭ 18 - كۇنى ۇرىمجىدەن حابارلايدى. ”قازىر كۇن جىلىنا باستادى، ەگىنجايداعى جۇمىستار جەدەل ءورىس الدى. وتكەن بىرنەشە كۇندە كاسىپتىك - تەحنيكالىق قىزمەتكەرلەردىڭ جەتەكشىلىگىندە، جەر تەگىستەۋ ماشيناسى ارقىلى ءبيداي ەكتىك، وتباسىمىزدىڭ 300 مۋ جەردەگى ءبيدايى تەز ارادا ەگىلىپ بولدى، بۇگىننەن باستاپ تامشىلاتىپ سۋارۋ تاسپاسى جاتقىزىلادى“، - دەدى 3 - ايدىڭ 17 - كۇنى حوشۇت اۋدانى ۇساقتال حۇيزۋ اۋىلى شالياڭۋان قىستاعىنداعى اتىز باسىندا قاربالاس جۇمىستا جۇرگەن ەگىنشىلىك ءىرى وتباسى ۋاڭ يۇڭشي.

  جىل ەسەبى كوكتەمدە. تيانشاننىڭ وڭتۇستىگى مەن سولتۇستىگىندەگى شارۋالار دا ۋاڭ يۇڭشي سياقتى ەگىس ۋاقىتىن قالت جىبەرمەي، اتىز باسىندا قاربالاس جۇمىسقا ءتۇستى. ەڭبەك ارەدىگىندە ولار ەكى - ۇشتەن باس قوسىپ، كەڭەس قۇرىپ، جاڭا ءبىر جىلداعى جوسپارلارىن قۋانا تىلگە تيەك ەتتى.

  قازىر رايونىمىزدىڭ كوكتەمگى ەگىس دايىندىعى وڭتۇستىكتەن سولتۇستىككە قاراي تارتىپپەن قانات جايۋدا، جەر - جەر ەرتە قيمىلداپ، تولىق دايىندالىپ، ءتۇرلى شارالاردى بىردەي اتقارىپ، كولەمدى ورنىقتىرىپ، ءونىمدى ارتتىردى؛ تۇس - تۇستان كۇش شىعارىپ، اۋىل شارۋاشىلىعى ماشينالارىمەن، اۋىل شارۋاشىلىعى ماتەريالدارىمەن قامداۋدى باقىلاپ - باسقارۋدى كۇشەيتتى؛ بازاردى باعدار ەتىپ، اۋىل شارۋاشىلىعى كاسىپ قۇرىلىمىن ساپالىلاندىردى، رەتتەدى... كوكتەمگى ەگىس دايىندىعى سىندى جىل باسىنداعى شەشۋشى شايقاس كۇش سالا جاقسى جۇرىلۋدە.

  اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنىڭ ساناعىنا نەگىزدەلگەندە، 3 - ايدىڭ 17 - كۇنىنە دەيىن، بۇكىل شينجياڭدا جالپى 326 مىڭ 300 مۋ جەرگە جازدىق ءبيداي ەگىلىپ بولعان، مۇنىڭ ىشىندە وڭتۇستىك شينجياڭداعى باسىم كوپ ءوڭىر 317 مىڭ 100 مۋ جەرگە ەگۋدى نەگىزىنەن ورىنداپ، مەجەدەگى ەگىلەتىن جەر كولەمىنىڭ %90.60ىن ۇستاعان، سولتۇستىك شينجياڭ مەن شىعىس شينجياڭدا 9200 مۋ جەرگە ءبيداي ەگىلىپ بولعان. بيىل ەگىنشىلىك قۇرىلىمىندا ءبيداي ازايعان، ماقتا ازايعان، جۇگەرى ارتقان، كوكونىس ارتقان، ەرەكشە داقىلدار ارتقان جاعداي جارىققا شىقتى.

  3 - ايدىڭ 17 - كۇنى يوپۇرعا اۋدانى جەكسەنبىبازار قالاشىعى مۇعالارىق قىستاعىندا قىستاق تۇرعىنى قوس پارنيكتى شاعىن كۇمبەزشە قالتقى جاساپ، ەرتە پىساتىن بال قاۋىن ەكتى.

  ”بيىل امالدىڭ بارىنشا شارۋالاردىڭ كوپ ارنا ارقىلى كىرىسىن ارتتىرۋىنا مۇمكىندىك جاسايمىز“. مۇعالارىق قىستاعى پارتيا ياچەيكاسىنىڭ شۋجيى ۋ ليڭحۋا بىلاي دەدى: ەرتە پىساتىن بال قاۋىن بازارعا ەرتە شىعادى، ءونىمى جوعارى، شارۋالاردىڭ ەگۋ بەلسەندىلىگى دە ارتتى، بيىل ءاربىر وتباسىنىڭ بال قاۋىن ەگۋدەن 3000 − 5000 يۋانعا دەيىن كىرىستەرىن ارتتىرا الاتىندىعىن مەجەلەپ وتىرمىز.

  وسى بىرنەشە كۇندە ماناس اۋدانى لوتويى قالاشىعى حيلياڭ قىستاعىنداعى كوكونىس ەگەتىن شارۋالار قالامشا جەتىلدىرۋ، تەلۋ جۇمىستارىمەن ابىگەر بولدى. قازىر بۇكىل قىستاقتا 11 شارۋا وتباسىندا كوشەت جەتىلدىرەتىن ءىرى قالتقىدان 52سى سالىنعان، جىلىنا ءتۇرلى كوكونىس مايساسىنان 4 ميلليون تۇپتەن استام جەتىلدىرىپ، سول اۋدانعا جانە توڭىرەكتەگى جەر - جەرگە ساتىپ، مايسا جەتىلدىرىلەتىن شارۋا وتباسىلارى ورتا ەسەپپەن 50 مىڭ يۋان اينالاسىندا كىرىسىن ارتتىرادى.

  ”جاسىل وتكەلگە ارقا سۇيەي وتىرىپ، تۇقىم، حيميالىق تىڭايتقىش، اۋىل شارۋاشىلىعى دارىلەرى سياقتى اۋىل شارۋاشىلىعى ءوندىرىس قۇرال - جابدىقتارى ىركىلىسسىز تاسىلادى، ءبىز ساپا مەن سانعا كەپىلدىك ەتە وتىرىپ كوكونىس مايساسىن جەتىلدىرىپ شىعامىز “، - دەدى حيلياڭ قىستاعى پارتيا ياچەيكاسىنىڭ شۋجيى لۋ چۋان.

  رايونىمىزدىڭ جەر - جەرى اۋىل شارۋاشىلىعى ءوندىرىس قۇرال - جابدىقتارىن سايكەستىرۋدى، تاسىمالداۋدى ءبىر تۇتاس جوسپارلاپ جاقسى ىستەپ، تاسىمال ارناسىن ىركىلىسسىزدەندىردى، سونىمەن بىرگە، بۇقارانى اۋىل شارۋاشىلىعى ماشينا - جابدىقتارىن الدىن الا جوندەۋگە ۇيىمداستىردى.

  ۇشقىشسىز ۇشاق ارقىلى اتىز باسقارۋ، ”ساۋساق ۇشىنداعى“ كوكتەمگى ەگىس دايىندىعى... ەگىن ەگە ”بىلۋدەن“ ”زەردەمەن“ ەگۋگە دەيىن زەردەلى اۋىل شارۋاشىلىعى ماشينالارى رايونىمىزدىڭ جەر - جەرىندە كەڭىنەن جالپىلاستىرىلدى.

  كوكتوعاي اۋدانى تەمەكى اۋىلى ءدۇزباي قىستاعىندا استىق ەگەتىن ءىرى وتباسى ياڭ ۋيدۇڭ بۇرىن مول ءونىم الىپ، ءونىم مولشەرى ارقىلى ونىمدىلىكتى ارتتىرۋدى كوزدەيتىن. ”الايدا جۋىق جىلداردان بەرگى جاعداي ءماز ەمەس، ساپالى استىق ەگۋ قاجەت“. ول قازىر باستى زەيىن - زەردەسىن جاڭا سورتقا ارنادى، بىلتىر ”شينچۇن 41 - ءنومىرلى“ سورتتى سىناق رەتىندە ەككەن ەدى، ءبيدايدىڭ ساپاسى زور مولشەردە ارتتى.

  كوكتوعاي اۋداندىق اۋىل شارۋاشىلىعى، اۋىل - قىستاق مەكەمەسى پارتيا باسشىلىق گرۋپپاسىنىڭ شۋجيى چيۋ جيانجياڭ بىلاي دەپ تانىستىردى: كوپتەگەن ءىرى وتباسىلار اۋىل شارۋاشىلىعىندا تيبىن جاڭالاۋعا ىرىقتىلىقپەن سايكەسىپ، ءونىم مولشەرىن كوزدەۋدەن ساپاعا ءمان بەرۋگە قاراي بۇرىلىس جاساپ، سول ارقىلى بازاردىڭ جاسىل، حاۋىپسىز، ساپالى اۋىل شارۋاشىلىعى ونىمدەرىنە بولعان قاجەتىن قاناعاتتاندىردى.

جاۋاپتى رەداكتور: سايراش تۇرارجان