مەملەكەتتىك كەڭەستىڭ اقپارات كەڭسەسى «2019 - جىل امەريكانىڭ ادامدىق ۇقىققا قول سۇعۋ بايانداماسىن» جاريالادى

  شينحۋا اگەنتتىگىنىڭ 3 - ايدىڭ 13 - كۇنى بەيجيڭنەن بەرگەن حابارى (تىلشىلەر ۋاڭ زىميڭ، جاڭ يۇنلۇڭ). مەملەكەتتىك كەڭەستىڭ اقپارات كەڭسەسى 3 - ايدىڭ 13 - كۇنى «2019 - جىل امەريكانىڭ ادامدىق ۇقىققا قول سۇعۋ بايانداماسىن» جاريالاپ، امەريكانىڭ ادامدىق ۇقىققا قول سۇعۋ جاعدايىن اشكەرەلەدى.

  بايانداما العى ءسوز، ازاماتتىق ۇقىق پەن ساياسي ۇقىقتىڭ اتى بولعانىمەن زاتى جوق، ەكونوميكالىق جانە قوعامدىق ۇقىقتاردا نەگىزگى قامتاماسىزدىق كەمشىل، از ۇلتتار ۇرپاقتارى جابىرگە، شەتكە قاعۋعا مەيلىنشە ۇشىرادى، ايەلدەر اۋىر كەمسىتۋگە جانە زورلىق - زومبىلىققا ءدوپ كەلدى، ءالسىز شوعىردىڭ جاعدايى مۇشكىل، كوشپەلىلەرگە ادامگەرشىلىككە جات مامىلە جاسالدى، باسقا ەلدەردىڭ ادامدىق ۇقىعىن قيسىنسىز اياققا تاپتادى قاتارلىلارعا ءبولىندى، جالپى ءماتىنى 20 مىڭ ءارىپ شاماسىندا.

  باياندامادا مىنالار اتاپ كورسەتىلدى: امەريكا ءوزىنىڭ ادامدىق ۇقىق جونىندەگى تار ءورىستى تۇسىنىگى اياسىندا، الەمگە قوجايىن بولۋداي وزەكتى مۇددەسىن ولشەم ەتىپ، ءار جىلى كورىنگەندى كولدەنەڭ تارتقان، الىپ - قاشتى وسەك ماتەريالداردان جىلدىق مەملەكەت ايىرماسى ادامدىق ۇقىق بايانداماسىن قۇراستىرىپ شىعىپ، ءوزىنىڭ ستراتەگيالىق مۇددەسىنە ۇيلەسپەگەن مەملەكەتتەر مەن رايونداردىڭ ادامدىق ۇقىق جاعدايىن قيسىنسىز بۇرمالادى، كەمسىتتى، ال ءوزىنىڭ ادامدىق ۇقىققا ۇزدىكسىز، جۇيەلى، زور كولەمدى قول سۇققان قىرۋار سۇرقيالىعىن ەستىمەسكە، كورمەسكە سالدى.

  باياندامادا بىلاي دەلىندى: امەريكا دۇنيە جۇزىندەگى مىلتىقتى زورلىقتى كۇش ەڭ اۋىر مەملەكەت. 2019 - جىلى امەريكادا جيىنى 415 رەت زور كولەمدى وق شىعارۋ وقيعاسى تۋىلدى، ورتا ەسەپپەن كۇنىنە ءبىر رەتتەن ارتىق، جيىنى 39 مىڭ 52 ادام مىلتىققا قاتىستى زورلىقتى كۇش وقيعالارىنان قازا تاپتى.

  باياندامادا مىنالار كورسەتىلدى: باتىس ەلدەرىنىڭ اراسىندا امەريكادا كەدەي مەن باي پارقى ەڭ اۋىر. 2018 - جىلى گيني كوەففيتسەنتى 0.485كە شىعىپ، كەدەي مەن باي پارقى 50 جىلدان بەرگى جاڭا جوعارى دەڭگەيگە جەتتى. امەريكادا حالىقتىق كىرىس بولىسىندەگى پارىق ۇزدىكسىز ۇلعايۋمەن بىرگە، ەمدەۋ، وقۋ - اعارتۋ قاراجاتى ۇزدىكسىز جوعارىلادى، ال قوعامدىق قامتاماسىزداندىرۋدىڭ قامتۋ اۋماعى تارايۋدا: 2018 - جىلعى ساناق ساندى مالىمەتىندە كورسەتىلۋىنشە، امەريكادا 39 ميلليون 700 مىڭ كەدەي حالىق بار؛ ءار كۇنى كەش سايىن، از دەگەندە، 500 مىڭ امەريكان ءۇيسىز - كۇيسىز جۇرەدى؛ 65 ميلليون ادام ەمدەۋ قاراجاتى وتە جوعارى بولۋ سەبەبىنەن ەمدەلۋدەن باز كەشتى.

  از ۇلت ۇرپاقتارىنىڭ ادامدىق ۇقىعى جاعىندا، باياندامادا مىنالار اتاپ كورسەتىلدى: امەريكادا اق ناسىلدىلەر جوعارى تۇرادىشىلدىق قايتا ورلەپ، امەريكانىڭ ەل ىشىندە جۋىقتاعى جىلداردان بەرى تۋىلعان لاڭكەستىك ارەكەتتەردىڭ كوبى اق ناسىلدىلەر جوعارى تۇرادىشىلدىق زورلىقتى كۇشپەن قاتىستى؛ امەريكا ساقشىلارىنىڭ افريكالىقتاردىڭ ۇرپاقتارىن اتۋ جانە قانقۇيلىلىقپەن جابىرلەۋ دەلولارى ءجيى تۋىلدى، افريكالىقتار ۇرپاقتارى ەرەسەكتەرىنىڭ قامالۋ مولشەرى اق ءناسىلدى ەرەسەكتەردىڭ 5.9 ەسەسىندەي.

  ايەلدەردىڭ، بالالاردىڭ ادامدىق ۇقىقتارىن قامتاماسىز ەتۋ جاعىندا، باياندامادا مىنالار باسا دارىپتەلدى: امەريكاداعى ايەلدەردىڭ اتىپ ءولتىرىلۋ مولشەرى باسقا جوعارى كىرىستى ەلدەردەن 21 ەسە جوعارى، امەريكالىق ايەلدەردىڭ %70تەن استامى جاقىن جولداسىنىڭ دەنە نەمەسە جىنىستىق زورلىقتى كۇشىنە ۇشىراعان؛ بالالاردىڭ كەدەيلىك ماسەلەسى جان تۇرشىكتىرەدى، 2018 - جىلعا دەيىن، امەريكادا 12 ميلليون 800 مىڭ بالا كەدەيلىك تۇرمىس كەشىرۋدە، 5 جاستان تومەن كەدەي بالالاردىڭ سانى 3 ميلليون 500 مىڭنان اسادى.

  باياندامادا بىلاي دەپ قارالدى: امەريكا ءوزىنىڭ حالىقاراداعى زورەكەرلىك ۇقىعىن قورعاۋ ءۇشىن، سىڭارجاقتىلىقتى ۇستانىپ، باسقا ەلدەردىڭ ادامدىق ۇقىعىن قيسىنسىز اياققا تاپتادى، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىن وزەك ەتكەن حالىقارالىق ءتارتىپ پەن حالىقارالىق جۇيەنى اياققا تاپتادى. قيت ەتسە ”شوعىردان شىعىپ“، ”شارتنامانى بۇزىپ“، حالىقارالىق جاۋاپكەرشىلىگىنەن قاشقالاقتاپ، الەمدىك ءوزارا سەنىمدىلىك سەلبەستىكتىڭ نەگىزىن شايقالتتى؛ قايتا - قايتا ”جازالاپ“، ”كۇشكە باسىپ“، دۇنيە جۇزىندەگى كوپتەگەن وڭىرلەردى الاساپىرانعا، بىلىقپالىققا باتىرىپ، اۋىر ادامگەرشىلىك اپاتىن تۋدىردى.

جاۋاپتى رەداكتور: نۇربولات قابىل