ىندەتتەن ساقتانۋ - تىزگىندەۋ مەزگىلىندە بۇكىل ەلدەگى اقى الىناتىن تاس جولداردا كولىكتەردەن قاتىناۋ اقىسى الىنبايدى

قاتىناس - تاسىمال مينيسترلىگى:

ىندەتتەن ساقتانۋ - تىزگىندەۋ مەزگىلىندە بۇكىل ەلدەگى اقى الىناتىن تاس جولداردا كولىكتەردەن قاتىناۋ اقىسى الىنبايدى

  شينحۋا اگەنتتىگىنىڭ 2 - ايدىڭ 15 - كۇنى بەيجيڭنەن بەرگەن حابارى (ءتىلشى ۋي يۇيكۇن). ءتىلشىنىڭ 2 - ايدىڭ 15 - كۇنى قاتىناس - تاسىمال مينيسترلىگىنەن ۇعىسۋىنشا، مەملەكەتتىك كەڭەستىڭ ماقۇلداۋىمەن 2 - ايدىڭ 17 - كۇنى ساعات نولدەن باستاپ ىندەتتەن ساقتانۋ - تىزگىندەۋ قىزمەتى اياقتاعانعا دەيىن، بۇكىل ەلدەگى اقى الىناتىن تاس جولداردا كولىكتەردەن قاتىناۋ اقىسى الىنبايدى ەكەن. ناقتىلى اياقتالاتىن ۋاقىت ايىرىم ۇقتىرىلادى.

  ۇعىسۋعا قاراعاندا، بۇل رەتكى اقى الماۋدىڭ كولەمى: جۇڭحۋا حالىق رەسپۋبليكاسىنىڭ تاس جول زاڭىنا، اقى الىناتىن تاس جولداردى باسقارۋ ەرەجەسىنىڭ بەلگىلەمەسىنە ۇيلەسەتىن، زاڭ بويىنشا رۇقسات ەتىلگەن بارلىق اقى الىناتىن تاس جولدار (اقى الىناتىن كوپىرلەر مەن تۋنەلدەردى قامتيدى)؛ اقى الىنبايتىن وبيەكتىلەر: زاڭ بويىنشا قاتىناۋ اقىسى الىناتىن تاس جولدارداعى بارلىق كولىكتەر. مۇنىڭ ىشىندە توراپتاسىپ اقى الاتىن تاس جولدار كولىكتەردىڭ شىعار اۋىزداعى اقى الۋ جولىنان شىققان ۋاقىتىن نەگىز ەتەدى، جاريا اقى الىناتىن جوعارى قارقىندى تاس جولدار مەن ادەتتەگى اقى الىناتىن تاس جولدار كولىكتەردىڭ اقى الۋ پۋنكتى جولىنان شىققان ۋاقىتىن نەگىز ەتەدى.

  قاتىناس - تاسىمال مينيسترلىگى حابارلاندىرۋ باسىپ تاراتىپ، جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ مەزگىلىندە اقى الىناتىن تاس جولداردا كولىكتەردەن قاتىناۋ اقىسىن الماۋ جونىندەگى ناقتى قىزمەتتەردى ايقىندادى، ءارقايسى ولكەلىك (رايون، قالا) حالىق ۇكىمەتتەرى ءبىر تۇتاس ۇيىمداستىرىپ اتقارۋعا جاۋاپتى بولادى. ولكە دارەجەلى قاتىناس - تاسىمال باسقارۋ تاراۋلارى جەرگىلىكتى ۇكىمەتتىڭ ءبىر تۇتاس باسشىلىعىندا، قاتىستى تاراۋلارمەن بىرلەسىپ جوبا بەلگىلەپ، جاۋاپكەرشىلىكتى تياناقتاندىرىپ، شارالاردى اشالاپ، تاس جولداردىڭ ىركىلىسسىز بولۋىنا كەپىلدىك ەتۋدى كۇشەيتىپ، حالىق بۇقاراسىنىڭ ءومىرىنىڭ حاۋىپسىزدىگى مەن دەنساۋلىعىن قورعاپ، ىندەتتەن ساقتانۋ - تىزگىندەۋ جانە ءوندىرىس، تۇرمىس زاتتىق ماتەريالدار تاسىمالىن قامتاماسىز ەتىپ، كاسىپورىنداردىڭ جۇمىستى قايتا باستاۋىن، ءوندىرىستى قالپىنا كەلتىرۋىن قولداپ، ەكونوميكالىق، قوعامدىق جالپى جاعدايدىڭ ورنىقتى بولۋىنا پارمەندى تىرەك ازىرلەۋ كەرەك.

جاۋاپتى رەداكتور: ريزا حاميت