شي جينپيڭ فرانسيانىڭ زۇڭتۇڭى ماكرونمەن تەلەفوندا سويلەستى

  شينحۋا اگەنتتىگىنىڭ 1 - ايدىڭ 22 - كۇنى بەيجيڭنەن بەرگەن حابارى. ەگىنشىلىك كالەندارى بويىنشا جاڭا جىل كەلۋ قارساڭىندا، مەملەكەت ءتوراعاسى شي جينپيڭ 1 - ايدىڭ 22 - كۇنى ۇسىنىس بويىنشا فرانسيانىڭ زۇڭتۇڭى ماكرونمەن تەلەفوندا سويلەستى.

  ماكرون الدىمەن شي جينپيڭگە جانە جۇڭگو حالقىنا مەرەكەلىك تىلەك ءبىلدىرىپ، جۇڭگو حالقىنىڭ كوكتەم مەرەكەسىن كوڭىلدى وتكىزۋىن تىلەدى.

  شي جينپيڭ ماكرونعا جانە فرانسيا حالقىنا كوكتەم مەرەكەسى بايلانىسىمەن ىزگى تىلەك جولدادى. شي جينپيڭ بىلاي دەپ اتاپ كورسەتتى: ەندى عانا وتكەن 2019 - جىل جۇڭگو - فرانسيا قارىم - قاتىناسى جوعارى دەڭگەيدە دامىعان ءبىر جىل بولدى. ءسىز ەكەۋىمىز ءوزارا ساپاردا بولىپ، جۇڭگو - فرانسيا قارىم - قاتىناسىنىڭ جاڭا تاراۋىن اشتىق. ءبىز كەلىسكەن ءتۇرلى ورتاق تانىم وتە جاقسى تياناقتانۋ ۇستىندە. جاڭا ءبىر جىلدا مەن سىزبەن بىرگە قول ۇستاسا قۇلشىنىپ، جۇڭگو - فرانسيا قارىم - قاتىناسىنىڭ جوعارى دەڭگەيدە دامۋىنا شىنايى كەپىلدىك ەتۋدى قالايمىن. ەكى جاق جوعارى جىكتەگىلەردىڭ بارىس - كەلىس جاساۋ، جەتەكتەۋ رولىن ۇزدىكسىز ساۋلەلەندىرۋى كەرەك. مەن سىزبەن ۇنەمىلىك بايلانىستى ساقتاپ، ەكى جاق كوڭىل ءبولىپ وتىرعان كەلەلى ماسەلەلەر جونىندە دەر كەزىندە پىكىر اۋىستىرۋدى قالايمىن. ءبىز كەلىسكەن ءبىر قىدىرۋ ناقتى سەلبەسۋ ورتاق تانىمىن جەدەل تياناقتاندىرىپ، ءوزارا كەلەلى ءجىتى قاداعالاپ وتىرعان ىستەرىنە كوڭىل ءبولىپ، ءوزارا تيىمدىلىك جاساۋ پرينسيبىن نەگىزگە الىپ، حالىقتىق يادرو ەنەرگياسى، عىلىم - تەحنيكا، ونەركاسىپ، عارىش سياقتى سالالارداعى سەلبەستىكتى ىلگەرىلەتىپ، 2021 - جىلعى جۇڭگو - فرانسيا مادەنيەت - ساياحات جىلىنا ويداعىداي دايىندالۋىمىز كەرەك. جۇڭگو بازارى بۇكىل الەمگە اشىق، ارينە، ەۆروپاعا، فرانسياعا ۇزدىكسىز اشىلا بەرەدى. حالىقارالىق ىستەردەگى بايلانىس پەن سايكەستىكتى كۇشەيتىپ، 6 - ايداعى مارسەل دۇنيە جۇزىلىك تابيعاتتى قورعاۋ جينالىسىن ءارى 4 - كەزەكتى ”ءبىر پلانەتا“ جوعارى دارەجەلىلەر باس قوسۋىن، سونداي - اق 10 - ايداعى كۇنميڭ «ورگانيزمدەردىڭ كوپ تۇرلىلىك شارتى» 15 - رەتكى شارت جاساسۋشى جاقتار جينالىسىن ويداعىداي وتكىزۋگە ءوزارا قولداۋ كورسەتۋىمىز كەرەك. ەكى جاق دۇنيە جۇزىلىك ساۋدا ۇيىمى رەفورماسى ماسەلەسىندە بايلانىستى، سايكەستىكتى كۇشەيتىپ، رەفورمانىڭ دۇرىس بەتالىسپەن دامۋىن ىلگەرىلەتۋ ءتيىس.

  شي جينپيڭ بىلاي دەپ اتاپ كورسەتتى: بيىل جۇڭگو مەن ەۆروپا وداعى ديپلوماتيالىق قارىم - قاتىناس ورناتقاندىعىنىڭ 45 جىلدىعىن بىرگە قۇتتىقتايدى، جۇڭگو مەن ەۆروپا الدا ءبىر قىدىرۋ كەلەلى بارىس - كەلىس جاسايدى. ەكى جاقتىڭ جوعارى دەڭگەيدەگى جۇڭگو - ەۆروپا قارجى قوسۋ كەلىسىمىن كۇنى بۇرىن جاساسىپ، كوپ جاقتىلىق پەن ەركىن ساۋدا ءتۇزىلىسىن قول ۇستاسا قورعاپ، بۇكىل الەمدىك جونگە سالۋدى كەمەلدەندىرىپ، اشىق دۇنيە جۇزىلىك ەكونوميكانى بىرگە قۇرىپ، كليمات وزگەرىسى سياقتى بۇكىل الەمدىك سىن - سايىسقا بىرگە توتەپ بەرىپ، جۇڭگو - ەۆروپا قارىم - قاتىناسىن جاڭا ءبىر جىلدا جاڭا دا اناعۇرلىم جوعارى دەڭگەيگە كوتەرۋىن ءۇمىت ەتەمىن.

  ماكرون مىنالاردى ءبىلدىردى: بيىل فرانسيا - جۇڭگو قارىم - قاتىناسى جانە ەۆروپا - جۇڭگو قارىم - قاتىناسى جونىنەن ەرەكشە ماڭىزدى جىل، ەكى جاقتىڭ كەڭەستىك تارتىپتەرى ەرەكشە مول. مەن جۇڭگوعا تاعى دا ساپاردا بولۋدى كۇتىپ وتىرمىن. ەكى جاقتىڭ ساۋدا، قارجى قوسۋ، قورشاعان ورتانى قورعاۋ سياقتى سالالاردا سەلبەستىكتى ۇزدىكسىز ىلگەرىلەتۋىن ءۇمىت ەتەمىن. فرانسيا جاق كليمات وزگەرىسى، ورگانيزمدەردىڭ كوپ تۇرلىلىگى، دۇنيە جۇزىلىك ساۋدا ۇيىمى رەفورماسى سياقتى ماسەلەلەردە جۇڭگو جاقپەن سايكەسۋدى، سەلبەسۋدى كۇشەيتۋدى كۇتەدى، جۇڭگو جاقتىڭ «ورگانيزمدەردىڭ كوپ تۇرلىلىك شارتى» 15 - رەتكى شارت جاساسۋشى جاقتار جينالىسىن تابىستى وتكىزۋىن قولدايدى. مەن 5G ماسەلەسىندە فرانسيا جاقتىڭ ءارقانداي ايرىقشا بەلگىلەنگەن مەملەكەتتەرگە نەمەسە ايرىقشا بەلگىلەنگەن سەرىكتەستىكتەرگە باعىتتاي، كەمسىتۋ شاراسىن قولدانبايتىندىعىن قايتالاي دارىپتەيمىن، جۇڭگو جاقپەن بايلانىستى ساقتاۋدى قالايمىن. ەۆروپا مەن جۇڭگونىڭ قارجى قوسۋ كەلىسىمى كەلىسسوزىنىڭ كۇنى بۇرىن ىلگەرىلەۋشىلىككە قول جەتكىزۋىن ءۇمىت ەتەمىن.

  ماكرون مىنالاردى ءبىلدىردى: فرانسيا جاق جۇڭگو جاقتىڭ جاڭا تيپتەگى ايدارشا ۆيرۋسىمەن جۇعىمدالعان وكپە قابىنۋ ىندەتى جاعدايىنا بەلسەنە توتەپ بەرۋىن قولدايدى، جۇڭگو جاقپەن دەنساۋلىق ساقتاۋ سەلبەستىگىن كۇشەيتۋدى قالايدى. شي جينپيڭ مىنالاردى ءبىلدىردى: جاڭا تيپتەگى ايدارشا ۆيرۋسىمەن جۇعىمدالعان وكپە قابىنۋ ىندەتى جاعدايى تۋىلعاننان بەرى، جۇڭگو جاق قاتاڭ ساقتانۋ - تىزگىندەۋ، ساقتانۋ - ەمدەۋ شاراسىن قولدانىپ، ىندەت جاعدايىنان ساقتانۋعا جانە ونى ەمدەۋگە قاتىستى ينفورماتسيالاردى دەر كەزىندە جاريالاپ، دۇنيە جۇزىلىك دەنساۋلىق ساقتاۋ ۇيىمىنا جانە قاتىستى ەلدەر مەن وڭىرلەرگە ىندەت جاعدايى ينفورماتسياسىن دەر كەزىندە حابارلاندىردى. جۇڭگو جاق حالىقارالىق قوعاممەن بىرگە ىندەت جاعدايىنا ۇتىمدى توتەپ بەرىپ، بۇكىل الەمنىڭ دەنساۋلىق ساقتاۋ حاۋىپسىزدىگىن قورعاۋدى قالايدى.

  ەكى ەلدىڭ مەملەكەت باسشىلارى تاعى يراننىڭ يادرو ماسەلەسى سياقتى ماسەلەلەر جونىندە كوزقاراس اۋىستىردى.

جاۋاپتى رەداكتور: نۇربولات قابىل