17 جىل بويى قىزىل توپىراققا تامىر تارتىپ، 44 دۇكەن اشىپ، ۇلتتار ىنتىماعىنىڭ گۇلىن شەشەك اتتىردى

17 جىل بويى قىزىل توپىراققا تامىر تارتىپ، 44 دۇكەن اشىپ، ۇلتتار ىنتىماعىنىڭ گۇلىن شەشەك اتتىردى

ابدوللا عوجاشىم جياڭشي ولكەسىنىڭ ۇلتتار ىنتىماعى، العاباسارلىعىنداعى ۇلگىلى جەكە بولىپ باعالاندى

  تىلشىلەرىمىز لي چۇنشيا، ميھىرگۇل عوپۇر، جياڭشي گازەتىنىڭ تىلشىلەرى حۇڭ حۋايفىڭ، سۇڭ سىجيا 12 - ايدىڭ 19 - كۇنى نانچاڭنان حابارلايدى. ”شەشە، قاراڭىزشى، مىناۋ جياڭشي ولكەسى ماعان بەرگەن ۇلتتار ىنتىماعى سيلىعى!“ 12 - ايدىڭ 19 - كۇنى نانچاڭ قالاسىنىڭ گۋاڭچاڭ شىعىس جولىنداعى شينجياڭ ابلاجان كاۋاپ مايتالمانى اسحاناسىندا اسحانا يەسى ابدوللا عوجاشىم شەشەسىمەن قول تەلەفون بەينەەكرانىندا سويلەسكەندە، سوناۋ الىستاعى قاراقاش اۋدانىنداعى شەشەسىنە قولىنداعى نارتتاي قىزىل داڭق كۋالىگىن بيىك كوتەرىپ كورسەتتى − ول جاڭا عانا 2019 - جىلعى جياڭشي ولكەسىنىڭ ۇلتتار ىنتىماعى، العاباسارلىعىنداعى ۇلگىلى جەكە بولىپ باعالانعان بولاتىن.

  ابدوللا قاراقاش اۋدانىنىڭ زاۋا قالاشىعى چوكانجىلعا قىستاعىنان بارعان، نانچاڭدا 17 جىل جۇمىس ىستەپ، جول بويىنداعى جايما يەسىنەن 44 جەلىلەس دۇكەنى بار اس - سۋ كاسىبىنىڭ قوجايىنىنا اينالىپ، قىزىل توپىراققا تامىر تارتىپ، جەرگىلىكتى بۇقارامەن ىنتىماقتاسىپ، ءوزارا كومەكتەسۋدىڭ تيبىنە اينالدى.

  2002 - جىلى 9 - ايدا ابدوللا ايەلىمەن بىرگە نانچاڭعا جۇمىس ىستەۋگە بارعاندا، قالتاسىندا نەبارى 40 يۋان اقشا قالعان ەدى. قينالعان ساتىندە ءۇي تانىستىرۋشى لۇي تيڭياڭ ولارعا كومەكتەسىپ جاتىن ورىن تاۋىپ بەرەدى ءارى ءۇيدىڭ جالاقىسىن كەشىكتىرىپ تاپسىرۋىنا قوسىلادى. وسىلايشا ەرلى - زايىپتى ەكەۋى نانچاڭدا ىرگە تەۋىپ، ۆوكزالدىڭ ماڭايىندا جايما جايىپ، مەيىز، قارما نان ساتا باستايدى.

  2010 - جىلى نانچاڭ قالاسى ۆوكزالدىڭ اينالاسىنداعى ورتاعا جالپىلىق رەتتەۋ جۇرگىزەدى، ەندى جايما اشۋعا بولمايتىن بولدى. نانچاڭ قالالىق قوعام حاۋىپسىزدىگى مەكەمەسى شيحۋ بولىمشە مەكەمەسىنىڭ حالىق ساقشىسى شۇي يۇڭنىڭ كەپىل بولۋىندا ابدوللا ءبىر دۇكەندى جالعا الىپ، ساۋداسى دا ورنىعىپ قالادى.

  ”مەيىز ساۋداسى جاقسى بولمادى، شاندۇڭدىق ءبىر اپاي ماعان قارما نان جاساۋدى تەگىن ۇيرەتتى؛ دۇكەن اشۋ، راسميات بىتىرۋدە قاتىستى تاراۋلار ماعان جاسىل جول اشىپ بەردى؛ دۇكەننىڭ ساۋداسى قاربالاس بولعاندىقتان كورشىم لو گوليان قارايلاسىپ بالامدى باعىپ بەردى...“ ابدوللا ساۋساعىن ساناپ وتىرىپ تىلشىگە: ”وسى جىلدارى قوعامداعى ءار سالانىڭ ماعان جەتكىزگەن مەيىرى مەنىڭ ءار ۋاق باسقالارعا قارىمجى قايتارۋىما قوزعاۋشى كۇش بولدى“، - دەدى.

  ءبىراز قارجى توپتاعاننان كەيىن، ابدوللا ارەكەتكە كىرىستى: ۆوكزالدا قيىنشىلىققا ۇشىراعان جولاۋشىلارعا كومەكتەسىپ پويەز بەلەت ساتىپ الىپ بەردى؛ دوسى ۋاڭ لەيگە شۇعىل اقشا قاجەت بولعاندا، 20 مىڭ يۋان اپارىپ بەردى؛ كورشىسى ليۋ فىڭليڭنىڭ جاسى 80 نەشە جاستا، ابدوللا ونى ”شەشە“ دەپ اتاپ، كۇن ارالاتىپ امانداسىپ بارىپ تۇردى؛ شينجياڭدىق جۇمىسشىلاردىڭ جەرگىلىكتى ورىنعا تەزىرەك ۇيلەسۋىنە كومەكتەسۋ ءۇشىن، ول 30 مىڭ يۋان قارجى قوسىپ، مەملەكەتتە ءبىر تۇتاس قولدانىلاتىن ءتىل - جازۋعا باۋلۋ ورتالىعىن قۇردى؛ ول تاعى قيىنشىلىعى بار وتباسىلارىمەن جۇپ قۇراپ، تاياۋ جىلدان بەرى جىلىنا، از دەگەندە، 100 مىڭ يۋان شىعارىپ الەۋمەتتىك يگىلىك ىستەرىنە جۇمسادى.

  ابدوللا سەرىكتەستىكتىڭ قىزمەتكەرلەرىن باستاپ ”ابلاجان ەرىكتىلەر قىزمەت وتەۋ اترەتىن“ قۇردى. ”مەن ءاربىر دۇكەندى ۇلتتار ىنتىماعىنىڭ تەرەزەسى، ءاربىر قىزمەتكەردى ۇلتتار ىنتىماعىنىڭ امالياتتا ايگىلەۋشىسى بولۋعا مۇمكىندىك جاسايمىن“. ابدوللا كۇلىمسىرەپ: ”ءار كۇنى باس دۇكەندە 200گە تارتا، ءارقايسى تارماق دۇكەندەردە نەشە ونداعان تۇرعىن شينجياڭ دامدەرىنەن ءدام تاتادى، ءبىز ءار ۋاقىت ’ۇلتتار ىنتىماعىنىڭ ۇرىعىن‘ سەۋىپ كەلەمىز“، - دەدى.

  بيىل 8 - ايدا ابدوللا داڭقپەن جۇڭگو كوممۋنيستىك پارتياسىنا مۇشە بولدى. بيىل ول 6 - كەزەكتى جياڭشي ولكەسىنىڭ ءمورال ۇلگىسى، 7 - كەزەكتى مەملەكەتتىك ءمورال ۇلگىسىنە كورسەتۋ سيلىعى سياقتى اتاقتارعا يە بولدى. نانچاڭ قالالىق ۇلت، ءدىن ىستەرى مەكەمەسىنىڭ ورىنباسار باستىعى تان سانگو بىلاي دەدى: ”ابدوللا جاقسىلىقتى بىلەدى، العىس ايتا بىلەدى، قامقورلىقتى اقتاۋدى بىلەدى، ۇلتتار ىنتىماعى گۇلىن جۇرەگىمەن، سۇيىسپەنشىلىگىمەن، مەيىرىمىمەن سۋارىپ، جۇڭحۋا ۇلتى بەرەكەلى شاڭىراعىنىڭ جياڭشي - شينجياڭ بايتاق دالاسىنداعى اسەرلى بەينەسى بولدى“.

جاۋاپتى رەداكتور: ريزا حاميت