جۇڭگوشا ەرەكشەلىككە يە فيلوسوفيا - قوعامدىق عىلىمداردى جەدەل قالىپتاستىرۋ

  شينحۋا اگەنتتىگىنىڭ 12 - ايدىڭ 13 - كۇنى بەيجيڭنەن بەرگەن حابارى (چي شىڭ). 2016 - جىلى 5 - ايدىڭ 17 - كۇنى باس شۋجي شي جينپيڭ بەيجيڭدە فيلوسوفيا - قوعامدىق عىلىمدار قىزمەتى جونىندەگى اڭگىمە ءماجىلىستى باسقارىپ اشتى.

  اڭگىمە ماجىلىستە، فيلوسوفيا - قوعامدىق عىلىمدار سالاسىنداعى 10 مامان، وقىمىستى جەكە - جەكە فيلوسوفيا، ەكونوميكا عىلىمى، عىلمي سوتسياليزم، تاريح عىلىمى، ساياسي عىلىم، ادەبيەت، زاڭ عىلىمى، ماركسيزم نازارياسى، اسكەري ىستەر عىلىمى سياقتى ءپان مەن سالالارداعى زەرتتەۋ جەتىستىكتەرىن تانىستىردى ءارى فيلوسوفيا - قوعامدىق عىلىمدار قىزمەتىندە جاڭالىق اشۋ، دامىتۋ جونىندەگى ۇسىنىس - پىكىرلەرىن ورتاعا سالدى.

  باس شۋجي شي جينپيڭ كوپشىلىكتىڭ سويلەگەن سوزدەرىن مۇقيات تىڭداپ، اۋىق - اۋىق قاتىستى تاقىرىپتار بويىنشا وقىمىستىلارمەن ىشكەرىلەي تالقى جۇرگىزدى. كوپشىلىك ءسوز سويلەگەننەن كەيىن، باس شۋجي شي جينپيڭ ماڭىزدى ءسوز سويلەدى. ول مىنانى باسا دارىپتەدى: جاراتىلىستىق عىلىمدارى دامىماعان مەملەكەتتىڭ الەم كوشىنىڭ الدىڭعى لەگىندە ءجۇرۋى مۇمكىن ەمەس، فيلوسوفيا - قوعامدىق عىلىمدارى گۇلدەنبەگەن مەملەكەتتىڭ دە الەم كوشىنىڭ الدىڭعى لەگىندە ءجۇرۋى مۇمكىن ەمەس. جۇڭگوشا سوتسياليزمگە تاباندى بولۋ مەن ونى دامىتۋدا فيلوسوفيا - قوعامدىق عىلىمدار ورنىن باسۋعا بولمايتىن ماڭىزدى ورىنعا يە، فيلوسوفيا - قوعامدىق عىلىمدار قىزمەتكەرلەرى ورنىن باسۋعا بولمايتىن ماڭىزدى رول اتقارادى. جۇڭگوشا سوتسياليزمگە تاباندى بولۋ مەن ونى دامىتۋ ءۇشىن، ءسوز جوق، فيلوسوفيا - قوعامدىق عىلىمدارعا وسكەلەڭ ءمان بەرىپ، جۇڭگوشا سوتسياليزمنىڭ ۇلى امالياتىنا ۇشتاستىرىپ، جۇڭگوشا ەرەكشەلىككە يە فيلوسوفيا - قوعامدىق عىلىمداردى جەدەل قالىپتاستىرۋ كەرەك.

  شي جينپيڭ مىنانى اتاپ كورسەتتى: جاڭا جاعدايدا، ەلىمىزدە فيلوسوفيا - قوعامدىق عىلىمداردىڭ ورنى ءتىپتى دە كوتەرىلىپ، مىندەتتەرى ءتىپتى دە اۋىرلاي ءتۇستى. قوعامدا ۇلكەن وزگەرىستەر جارىققا شىققان كەزەڭدە، فيلوسوفيا - قوعامدىق عىلىمداردىڭ، ءسوز جوق، قاۋىرت داميتىندىعىن تاريح دالەلدەگەن. قازىرگى جۇڭگو ەلىمىز تاريحىنداعى ەڭ كەڭ ءارى تەرەڭ قوعامدىق وزگەرىستى باستان كەشىپ، ادامزات تاريحىنداعى ەڭ زور ءارى وزگەشە پراكتيكالىق ىزدەنىستى جۇرگىزىپ جاتىر. بۇرىن ەشكىم ءىز سالماعان وسى ۇلى اماليات، ءسوز جوق، نازاريالىق جاسامپازدىق پەن عىلىمنىڭ گۇلدەنۋىنە پارمەندى قوزعاۋشى كۇش پەن كەڭ ءورىس ازىرلەيدى. بۇل نازارياعا مۇقتاج ءارى، ءسوز جوق، نازاريالار تۋىندايتىن ءداۋىر، بۇل يدەياعا مۇقتاج ءارى، ءسوز جوق، يدەيالار تۋىندايتىن ءداۋىر. مۇراتتى دا تالاپتى بارلىق فيلوسوفيا - قوعامدىق عىلىم قىزمەتكەرلەرى زامانا كوشىنىڭ باسىندا ءجۇرىپ، بۇرىنعى جانە بۇگىنگى وزگەرىستەردى قانىق ءبىلىپ، يدەيانىڭ العاشقى دابىلىن قاعىپ، پارتيا مەن حالىق مۇددەسى جولىندا بەلسەندى عىلمي ىزدەنىستەر جاساپ، كەلەلى كەڭەس، تولعامدى پىكىر ايتىپ، تاريح جۇكتەگەن داڭقتى بورىشتى تايسالماي ارقالاۋى ءتيىس.

جاۋاپتى رەداكتور: ريزا حاميت