شي جينپيڭ رەسەيدىڭ زۇڭتۇڭى پۋتينمەن بەينە ەكراندا كەزدەسىپ

جۇڭگو - رەسەي شىعىس لەنيا تابيعي گاز قۇبىرىنىڭ ىسكە قوسىلىپ گاز جىبەرىلۋ سالتىنا بىرگە كۋا بولدى

        12 - ايدىڭ 2 - كۇنى مەملەكەت ءتوراعاسى شي جينپيڭ بەيجيڭدە رەسەيدىڭ زۇڭتۇڭى پۋتينمەن بەينە ەكراندا كەزدەسىپ، جۇڭگو - رەسەي شىعىس لەنيا تابيعي گاز قۇبىرىنىڭ ىسكە قوسىلىپ گاز جىبەرىلۋ سالتىنا بىرگە كۋا بولدى. □ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

  شينحۋا اگەنتتىگىنىڭ 12 - ايدىڭ 2 - كۇنى بەيجيڭنەن بەرگەن حابارى (ءتىلشى باي جيە). مەملەكەت ءتوراعاسى شي جينپيڭ 12 - ايدىڭ 2 - كۇنى تۇستەن كەيىن بەيجيڭدە رەسەيدىڭ زۇڭتۇڭى پۋتينمەن بەينە ەكراندا كەزدەسىپ، جۇڭگو - رەسەي شىعىس لەنيا تابيعي گاز قۇبىرىنىڭ ىسكە قوسىلىپ گاز جىبەرىلۋ سالتىنا بىرگە كۋا بولدى.

  مەملەكەتتىك كەڭەستىڭ ورىنباسار زۇڭليى حان جىڭ سالتقا قاتىناستى.

  شي جينپيڭ بەينە ەكران ارقىلى سوچيدە جۇرگەن پۋتينمەن ءوزارا سالەمدەستى.

  شي جينپيڭ قۇبىردىڭ ىسكە قوسىلىپ گاز جىبەرىلگەندىگىن قىزۋ قۇتتىقتاپ، ەكى ەلدىڭ قالىڭ قۇرىلىسشىلارىنا شىن جۇرەكتەن العىس ايتتى. شي جينپيڭ بىلاي دەپ اتاپ كورسەتتى: شىعىس لەنيا تابيعي گاز قۇبىرى − جۇڭگو مەن رەسەيدىڭ ەنەرگيا سەلبەستىگىنىڭ بەلگى سيپاتىندىق نىسانى ءارى ەكى جاقتىڭ تەرەڭ توعىسۋىنىڭ، سەلبەسىپ بىرگە يگىلىككە كەنەلۋىنىڭ ۇلگىسى. 2014 - جىلى مەن پۋتين زۇڭتۇڭمەن بىرگە ەكى جاقتىڭ نىساننىڭ سەلبەستىك حۇجاتىنا قول قويعاندىعىنا كۋا بولعان ەدىك. 5 جىلدان استام ۋاقىتتان بەرى، ەكى ەلدىڭ قۇرىلىسقا قاتىسۋشى ورىندارى تىعىز سەلبەسىپ، قالىڭ قۇرىلىسشىلار اق قار، كوك مۇز جاستانىپ، تارپاڭ تابيعاتپەن كۇرەسىپ، قۇرىلىس مىندەتتەرىن جوعارى دەڭگەي، جوعارى ساپامەن ورىنداپ، دۇنيە جۇزىنە ءىرى ەل ۇستالارىنىڭ ەرەن ونەرىن ايگىلەپ، جۇڭگو - رەسەي سەلبەستىگىنىڭ مول تابىستارىن كورسەتتى. ىسكە قوسىلىپ گاز جىبەرۋ − ماڭىزدى كەزەڭدىك تابىس، ونان دا ماڭىزدىسى، جاڭا سەلبەستىك باستاماسى. ەكى جاق تىنىشتىق قۇبىرىن، جاسىل قۇبىردى، دامۋ قۇبىرىن، دوستىق قۇبىرىن قالىپتاستىرىپ، قۇبىر قۇرىلىسىنا جانە ونىڭ حاۋىپسىز ءارى سەنىمدى تۇردە ىسكە قوسىلۋىنا بار كۇشپەن كەپىلدىك ەتىپ، قۇبىر بويىنداعى وڭىرلەردىڭ ەكونوميكاسى مەن قوعامىنىڭ باياندى دامۋىن جەبەۋى كەرەك.

  شي جينپيڭ بىلاي دەپ باسا دارىپتەدى: بيىل − جۇڭگو مەن رەسەيدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى، مەن پۋتين زۇڭتۇڭمەن بىرگە جۇڭگو مەن رەسەيدىڭ جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىن دامىتۋدى جاريالاپ، جۇڭگو مەن رەسەيدىڭ قارىم - قاتىناسىن دامىتۋدى ۇزدىكسىز تۇردە وزدەرىنىڭ ديپلوماتياسىندا الدىمەن ويلاستىراتىن بەتالىس ەتىپ، ەكى ەلدىڭ ستراتەگيالىق سەلبەستىگىن جانە ءار سالاداعى ىستەستىگىن بۇلجىماستان تەرەڭدەتۋدى ءبىر اۋىزدان ۇيعاردىق. قازىر جۇڭگو مەن رەسەي ەكى ەل مەملەكەتتىڭ دامۋىنىڭ شەشۋشى كەزەڭىندە تۇر، جۇڭگو - رەسەي قارىم - قاتىناسى جاڭا داۋىرگە ءوتتى. ەكى جاقتىڭ كۇش ۇستىنە كۇش قوسىپ، شىعىس لەنيا تابيعي گاز قۇبىرى سياقتى اناعۇرلىم كوپ بىرەگەي نىسانداردى سالىپ، ەكى ەلدىڭ وزدەرىنىڭ دامۋىنا قايرات قوسىپ، دەم بەرىپ، ەكى ەل مەن ەكى ەل حالىقتارىن اناعۇرلىم ويداعىداي باقىتقا كەنەلتۋىن ءۇمىت ەتەمىن.

  پۋتين مىنالاردى ءبىلدىردى: رەسەي مەن جۇڭگو ەكى ەل ديپلوماتيالىق قارىم - قاتىناس ورناتقاندىعىنىڭ 70 جىلدىعىن سالتاناتپەن قۇتتىقتاۋ قارساڭىندا، رەسەي - جۇڭگو شىعىس لەنيا تابيعي گاز قۇبىرىنىڭ ىسكە قوسىلىپ گاز جىبەرىلۋى كەلەلى تاريحي ءمان الادى، ەكى ەلدىڭ ستراتەگيالىق سەلبەستىگىن تىڭ ورەگە كوتەرەدى. 2014 - جىلى ءتوراعا شي جينپيڭمەن بىرگە وسى نىساننىڭ سەلبەستىك حۇجاتىنا قول قويىلۋىنا كۋا بولعاننان بەرى، ەكى جاقتىڭ ۇجىمدارى سۇركەيلى اۋا رايىندا قاجىرلىلىقپەن قىزمەت ىستەپ، قۇرىلىستى ءوز ۋاعىندا اياقتاتتى، بولاشاقتاعى 30 جىلدا رەسەي جاق جۇڭگو جاقتى ءبىر تريلليون تەكشەمەتر تابيعي گازبەن قامدايدى، بۇل ءتوراعا شي جينپيڭ ەكەۋىمىز كەلىسكەن 2024 - جىلى رەسەي مەن جۇڭگونىڭ ەكى جاقتى ساۋدا سوماسىن 200 ميلليارد دوللارعا جەتكىزۋ جونىندەگى ورتاق تانىمدى تياناقتاندىرۋعا سەپتىگىن تيگىزەدى. رەسەي جاق جۇڭگو جاقپەن بىرگە قۇلشىنىپ، وسى بەلگى سيپاتىندىق ستراتەگيالىق سەلبەستىك نىسانىنىڭ ءساتتى اتقارىلۋىنا شىنايى كەپىلدىك ەتۋدى قالايدى.

  جۇڭگو مەن رەسەيدىڭ ۋاكىلدەرى جەكە - جەكە حيحى، اتامانسكايا جانە چايانكين سياقتى قۇبىر بويىنداعى 3 بەكەتتە ءسوز سويلەپ، ەكى ەلدىڭ مەملەكەت باسشىلارىنا: رەسەي جاقتىڭ جۇڭگو جاقتى گازبەن قامداۋعا دايىندالىپ بولعاندىعىن، جۇڭگو جاقتىڭ گازدى قابىلداۋعا دايىندالىپ بولعاندىعىن مالىمدەدى.

  پۋتين ”گازبەن قامداڭدار!“ دەپ بۇيرىق بەردى.

  شي جينپيڭ ”گازدى قابىلداڭدار!“ دەپ بۇيرىق بەردى.

  بۇكىل الاڭدا قىزۋ قول شاپالاق ءۇنى كوتەرىلدى.

  ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلعا قاتىناستى.

   جۇڭگو مەن رەسەيدىڭ شىعىس لەنيا تابيعي گاز قۇبىرى رەسەيدىڭ شىعىس سيبرياسىنان باستالىپ، بلاگوۆەشەنسكى ارقىلى ەلىمىزدىڭ حيلۇڭجياڭ ولكەسىنىڭ حيحىسىنا كىرەدى. رەسەي جەرىندەگى قۇبىردىڭ جالپى ۇزىندىعى شامامەن 3000 كيلومەتر، ەلىمىز شەكاراسىنداعى جاڭادان جاتقىزىلعان قۇبىردىڭ ۇزىندىعى 3371 كيلومەتر، پايدالانىلىپ وتىرعان قۇبىردىڭ ۇزىندىعى 1740 كيلومەتر.

جاۋاپتى رەداكتور: ريزا حاميت