جۇڭگو حالقىنىڭ جاپون شاپقىنشىلارىنا قارسى سوعىسىنىڭ جەڭىسىن ەسكە الۋ كۇنى

  شينحۋا اگەنتتىگىنىڭ 12 - ايدىڭ 1 - كۇنى بەيجيڭنەن بەرگەن حابارى (چي شىڭ). 2014 - جىلى 2 - ايدىڭ 27 - كۇنى 12 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 7 - ءماجىلىسى «جۇڭگو حالقىنىڭ جاپون شاپقىنشىلارىنا قارسى سوعىسىنىڭ جەڭىسىن ەسكە الۋ كۇنىن بەلگىلەۋ تۋرالى قارار»دى ماقۇلدادى.

  «قارار» دا مىنالار اتاپ كورسەتىلدى: تاريحتى ەستە بەرىك ساقتاۋ، جۇڭگو حالقىنىڭ جاپون يمپەرياليزمىنىڭ شاپقىنشىلىعىنا قارسى ماشاقاتتى دا ەرەسەن كۇرەسىن ەستەن شىعارماۋ، جۇڭگو حالقىنىڭ جاپون شاپقىنشىلارىنا قارسى سوعىسىندا قاھارماندىقپەن ءومىرىن ارناعان قاھارمانداردى جانە جۇڭگو حالقىنىڭ جاپون شاپقىنشىلارىنا قارسى سوعىسىنىڭ جەڭىسىنە ۇلەس قوسقان بارلىق ادامداردى ەسكە الۋ، جۇڭگو حالقىنىڭ جاپون شاپقىنشىلارىنا قارسى سوعىسىنىڭ دۇنيە جۇزىلىك فاشيزمگە قارسى سوعىستاعى ماڭىزدى ورنىن ايگىلەۋ، جۇڭگو حالقىنىڭ مەملەكەتتىڭ يەلىك ۇقىعىن، تەرريتوريا تۇتاستىعىن جانە دۇنيە ءجۇزىنىڭ بەيبىتشىلىگىن باتىل قورعايتىن بەرىك تۇرعىسىن بەينەلەۋ، وتانشىلدىقتى وزەك ەتكەن ۇلى ۇلت رۋحىن اسقاقتاتۋ، بۇكىل ەلىمىزدەگى ءار ۇلت حالقىن جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ ءۇشىن ورتاق كۇرەس جاساۋعا شابىتتاندىرۋ ءۇشىن، 9 - ايدىڭ 3 - كۇنىن جۇڭگو حالقىنىڭ جاپون شاپقىنشىلارىنا قارسى تۇرۋ سوعىسىنىڭ جەڭىسىن ەسكە الۋ كۇنى ەتىپ بەكىتتى. ءار جىلى 9 - ايدىڭ 3 - كۇنى مەملەكەت ەسكە الۋ قيمىلدارىن وتكىزەدى.

  1931 - جىلى جاپون ميليتاريزمى كوپە - كورنەۋ ”18 - قىركۇيەك وقيعاسىن“ تۋدىردى، جۇڭگو حالقى تايسالماستان اتتانىسقا كەلىپ، قاھارماندىقپەن قارسى تۇردى. 14 جىلعا سوزىلعان ماشاقاتتى دا ەرەسەن كۇرەس جۇرگىزۋ ارقىلى جاپون شاپقىنشىلارىنا قارسى سوعىستىڭ ۇلى جەڭىسىنە قول جەتكىزدى. 1945 - جىلى 9 - ايدىڭ 2 - كۇنى تۇستەن بۇرىن، توكيو شىعاناعىندا امەريكانىڭ ”ميسسۇري“ ءنومىرلى سوعىس كەمەسىندە جاپون ۇكىمەتى تىزە بۇگۋ حاتىنا قول قويدى. جۇڭگو حالقىنىڭ جاپون شاپقىنشىلارىنا قارسى سوعىسىنىڭ جانە دۇنيە ءجۇزىنىڭ فاشيزمگە قارسى سوعىسىنىڭ رەسمي جەڭىسپەن اياقتالعاندىعى جاريالاندى.

  جۇڭگو حالقىنىڭ جاپون شاپقىنشىلارىنا قارسى سوعىس جەڭىسى − تاياۋ زاماننان بەرى جۇڭگونىڭ سىرتقى جاۋلاردىڭ سۇعاناقتىق جاساۋىنا سوققى بەرۋدەگى ءبىرىنشى رەتكى تۇبەگەيلى جەڭىسى. بۇل ۇلى جەڭىس جاپون ميليتاريزمىنىڭ جۇڭگونى وتارلاۋ، قۇلدانۋ ارام نيەتىن ادا - كۇدە تالقانداپ، تاياۋ زاماننان بەرگى جۇڭگونىڭ سىرتقى جاۋلاردىڭ شاپقىنشىلىعىنا قارسى تۇرۋدا سوعىسقان سايىن جەڭىلەتىن ۇلتتىق نامىستان قۇتىلدىردى؛ جۇڭگونىڭ دۇنيە جۇزىندەگى ءىرى ەلدىك ورنىن قايتالاي تىكتەپ، جۇڭگو حالقىن دۇنيە جۇزىندەگى بەيبىتشىلىكتى سۇيەتىن حالىقتاردىڭ قۇرمەتىنە بولەندىردى؛ جۇڭحۋا ۇلتىنىڭ ۇلى گۇلدەنۋىنىڭ جارقىن بولاشاعىن اشىپ، بايىرعى جۇڭگونىڭ وت پەن سۋدان تايسالماعان، ءورت ىشىندە سومدالعان جاڭا جورىعىن باستادى.

  جۇڭحۋا حالىق رەسپۋبليكاسى قۇرىلعاننان كەيىن، ورتالىق حالىق ۇكىمەتى اكىمشىلىك كەڭەسى، مەملەكەتتىك كەڭەس ىلگەرىندى - كەيىندى 1945 - جىلى جاپون ۇكىمەتىنىڭ تىزە بۇگۋ حاتىنا قول قويعان 2 - كۇندى، ياعني 9 - ايدىڭ 3 - كۇنىن ”3 - قىركۇيەك جاپون شاپقىنشىلارىنا قارسى سوعىستىڭ جەڭىسىن ەسكە الۋ كۇنى“ دەپ بەكىتتى.

  2014 - جىلى 12 - كەزەكتى مەملەكەتتىك حالىق قۇرىلتايى تۇراقتى كوميتەتى ارناۋلى قارار قابىلداپ، زاڭ شىعارۋ فورماسىمەن جۇڭگو حالقىنىڭ جاپون شاپقىنشىلارىنا قارسى سوعىسىنىڭ جەڭىسىن ەسكە الۋ كۇنىن بەلگىلەپ، وسى ءبىر ەسكە الۋ كۇنىنىڭ جۇڭگو حالقى جونىنەن الاتىن ماڭىزدى ءمانىن اناعۇرلىم ايقىندادى.

جاۋاپتى رەداكتور: ريزا حاميت