پىڭ گۇيچين: ىنتىماق گۇلىن مەكتەپ اۋلاسىندا قۇلپىرتتى

پىڭ گۇيچين: ىنتىماق گۇلىن مەكتەپ اۋلاسىندا قۇلپىرتتى

□ ءتىلشىمىز جاڭ رۇيلين

  ”پىڭ مەكتەپ باستىعى ءارى مەنىڭ پىڭ شەشەم، ونىڭ قامقورلىعى مەنىڭ باستاۋىش مەكتەپتەگى ءومىرىمدى ءتىپتى دە ارلەندىردى، مەن ونى جاقسى كورەمىن ءارى وتە قۇرمەتتەيمىن“، - دەدى 10 - ايدىڭ 15 - كۇنى ورتا مەكتەپتە وقىپ جاتقان شاپحات روزى تەبىرەنىپ. شاپحات جونىنەن پىڭ گۇيچين ونىڭ ومىرىندەگى ماڭىزدى ادامداردىڭ ءبىرى.

  پىڭ گۇيچين تۇرپان قالاسى توقسۇن اۋداندىق 1 - باستاۋىش مەكتەپ پارتيا باس ياچەيكاسىنىڭ شۋجيى. پىڭ گۇيچيننىڭ نازارىندا مەكتەپتەگى وقىتۋشى - قىزمەتكەرلەر ونىڭ اعا - باۋىرى، اپەكە - سىڭلىلەرى، وقۋشىلار ونىڭ بالالارى ىسپەتتى، تەك اعا - باۋىر، اپەكە - سىڭلىلەرمەن جانە بالالارمەن ىنتىماقتاسقاندا عانا، مەكتەپ تاتۋ - ءتاتتى ۇلكەن وتباسىنا اينالادى.

  2013 - جىلى مۇگەدەك اكەسى شاپحاتتى ەرتىپ توقسۇن اۋداندىق 1 - باستاۋىش مەكتەپتىڭ قاقپاسىنان اتتاعان ءبىرىنشى كۇننەن باستاپ، وسى كەدەي وتباسىنان كەلگەن بالا قاشاندا پىڭ گۇيچيننىڭ كوكەيىنەن كەتپەدى. وسىدان كەيىن پىڭ گۇيچين شاپحاتتىڭ ”پىڭ شەشەسىنە“ اينالىپ، ونىمەن سىرلاسىپ، ونى ۇيرەنۋگە شابىتتاندىرىپ وتىردى، ونى كۇدىك - كۇماننان ارىلتىپ، تۇرمىستىق قاراجاتى سياقتىلاردى ۇستىنە الدى. پىڭ گۇيچيننىڭ قامقورلىعىندا شاپحات باستاۋىش مەكتەپتى ءساتتى تامامداپ، ورتالاۋعا ءتۇستى. پىڭ گۇيچين ءوزىنىڭ ءومىر بويى شاپحاتتىڭ ”پىڭ شەشەسى“ ەكەندىگىن، ونىڭ ەسەيىپ - ەرجەتۋىنە ۇزىكسىز سەرىك بولاتىندىعىن ايتتى.

  قايتكەندە ۇلتتار ىنتىماعىنىڭ تۇقىمىن بارلىق وقىتۋشىلار مەن وقۋشىلاردىڭ كوكەيىندە تامىر تارتقىزىپ، وركەن جايدىرۋعا بولادى؟

  ”مەكتەپ − بالالاردىڭ ەسەيىپ - ەرجەتۋىندەگى ماڭىزدى ورتا، ىنتىماقتى، ءوزارا كومەكتەسەتىن كوللەكتيۆ قانا بالالارعا تاماشا ەسەيۋ ورتاسىن ازىرلەپ بەرە الادى، مەن ءاربىر بالانىڭ كوللەكتيۆتىڭ مەيىرىن سەزىنىپ، ىنتىماقتىڭ كۇش - قۋاتىن بويىنا جيىپ، كوڭىلدى ەسەيىپ - ەرجەتۋىن، پارتيانى سۇيەتىن، وتاندى سۇيەتىن، مەكەنىن سۇيەتىن ۇلتتار ىنتىماعىنىڭ ۇلگىسى بولۋىن ءۇمىت ەتەمىن“، - دەدى پىڭ گۇيچين.

  توقسۇن اۋداندىق 1 - باستاۋىش مەكتەبىندەگى 21 كۋرجەك جانە ”ءبىر كلاستا ءبىر ءتۇر، ءبىر كلاستا ءبىر ەرەكشەلىك بولۋ“ سىندى قيمىلدار وقۋشىلاردىڭ ۇيرەنۋ تۇرمىسىن بايىتىپ قالماستان، بالالاردىڭ بىرگە ۇيرەنۋىنە، بىرگە ويناۋىنا ءتىپتى دە مۇمكىندىك تۋدىردى. ءار ۇلت وقىتۋشىلارى ءبىر كەڭسەدە قىزمەت ىستەپ، كاسىپ، ءتىل، يدەيا جانە سۇيىسپەنشىلىك جاقتارىندا ءوزارا اۋىس - ءتۇيىس جاساۋدى جەبەپ، ءوزارا كومەكتەسىپ، ءوزارا ۇيرەنەتىن، ورتاق العا باساتىن جاراسىمدى ورتا قالىپتاستى.

  پىڭ گۇيچيننىڭ جەتەكتەۋىندە مەكتەپتەگى ءاربىر پارتيا مۇشەسى وزدىگىنەن وتباسىندا قيىنشىلىعى بار ءبىر وقۋشىنى سۇيەمەلدەپ، ولاردىڭ ۇيرەنۋىنە، تۇرمىسىنا كومەكتەستى. مەرەكە - مەيرام، دەمالىس كۇندەرىندە مەكتەپ تاعى ءوزارا امانداسىپ بارۋ، ءبىر - بىرىنە اسەر ەتۋ جەلىلەس قيمىلدارىن ورىستەتەدى... ۇلتتار ىنتىماعى وسىلايشا مەكتەپتەگى ءار ادامنىڭ تۇرمىسىنا ءسىڭىپ، ءوزارا كومەكتەسەتىن، ۇنەمى بارىس - كەلىس جاساپ تۇراتىن، ءبىر ءۇيلى جاندارداي بولعان حيكايالار توقتاۋسىز تۋىندادى...

  وقىتۋشى دارىندىلار قوسىنى قۇرىلىسىن كۇشەيتۋ ءۇشىن، پىڭ گۇيچين ”ەكىنى باۋلۋ، ءبىردى جەتەكتەۋ، ءبىردى تانىستىرۋ“ قىزمەت ءتۇزىمىن كۇش سالا اتقاردى، ياعني ۇزدىك جاس وقىتۋشىلاردى پارتيا مۇشەسى بولۋعا باۋلىپ، پارتيالى وقىتۋشىلاردى تىرەكتى وقىتۋشى بولۋعا باۋلىپ، پارتيالى وقىتۋشىلار جاس وقىتۋشىلارعا كومەكتەسىپ، ولاردى جەتەكتەپ، ورتا جىكتەگى كادرلاردى پارتيالى وقىتۋشى بولۋعا الدىمەن تانىستىردى. ىنتىماقتاسىپ ءوزارا كومەكتەسۋدەي قىزمەت ورتاسىندا ءبىر توپ جاس وقىتۋشىلار پارتيا ۇيىمىنا قابىلدانىپ، ساياسي دەڭگەيى مەن وقىتۋ قابىلەتى تەز جوعارىلادى.

  پىڭ گۇيچين تۇقسۇن اۋداندىق 1 - باستاۋىش مەكتەپتىڭ باستىعى بولعاننان بەرى، مەكتەپ ىلگەرىندى - كەيىندى ”اۆتونوميالى رايوننىڭ ءمورال تاربيەسىنەن ۇلگى كورسەتەتىن مەكتەپ“، ”اۆتونوميالى رايوننىڭ مەكتەپتى زاڭ بويىنشا جونگە سالۋدان ۇلگى كورسەتەتىن مەكتەپ“، ”اۆتونوميالى رايوننىڭ پاك مادەنيەتتى مەكتەپكە ەنگىزۋدەن ۇلگى كورسەتۋ ءتۇيىنى“، ”مەملەكەتتىك ۇلتتار ىنتىماعى، العاباسارلىعىنداعى ۇلگىلى كوللەكتيۆ“ سياقتى داڭقتى اتاقتارعا يە بولدى.

جاۋاپتى رەداكتور: ريزا حاميت