شي جينپيڭ گرەتسيانىڭ زۇڭليى ميتسوتاكيسپەن كەزدەستى

  شينحۋا اگەنتتىگىنىڭ 11 - ايدىڭ 4 - كۇنى شاڭحايدان بەرگەن حابارى (تىلشىلەر ليۋ حۋا، لۋ ۋىنجۇن). مەملەكەت ءتوراعاسى شي جينپيڭ 11 - ايدىڭ 4 - كۇنى شاڭحايدا گرەتسيانىڭ زۇڭليى ميتسوتاكيسپەن كەزدەستى.

  شي جينپيڭ ميتسوتاكيستىڭ جۇڭگوعا كەلىپ 2 - كەزەكتى جۇڭگو حالىقارالىق يمپورت كورمەسىنە قاتىناسقانىن قارسى الدى. شي جينپيڭ بىلاي دەپ اتاپ كورسەتتى: جۇڭگونىڭ يمپورت كورمەسىن وتكىزۋى − جۇڭگونىڭ ساۋدا ەركىندىگىن جانە ەكونوميكانىڭ جاھاندانۋىن، دۇنيە جۇزىنە ىرىقتىلىقپەن بازار اشۋدى باتىل قولداۋىنىڭ كەلەلى شاراسى، ءار ەلدىڭ ەكونوميكا - ساۋدا اۋىس - كۇيىسىن، سەلبەستىگىن جەبەۋگە، حالىقارالىق ساۋدانى جانە دۇنيە ءجۇزى ەكونوميكاسىنىڭ ارتۋىن جەبەۋگە پايدالى. ءبىز گرەتسيانىڭ نەگىزگى قوناق ەل رەتىندە يمپورت كورمەسى سىندى وسى تۇعىردان پايدالانىپ جۇڭگو تۇتىنۋشىلارىنا بەلسەندىلىكپەن ءوز ەلىنىڭ ابزال، ەرەكشە ونىمدەرىن تانىستىراتىندىعىن قۋانىشپەن كورىپ وتىرمىز.

  شي جينپيڭ بىلاي دەپ باسا دارىپتەدى: جۇڭگو مەن گرەتسيانىڭ قارىم - قاتىناسى ءداستۇرلى دوستىققا يە. ءبىر - ءبىرىن ءوزارا تۇسىنەدى، ءوزارا قۇرمەت ەتەدى، ساياسي ءوزارا سەنىمدىلىگى بەكەم، سەلبەستىك نەگىزى جاقسى. جۇڭگو جاق گرەتسيا جاقپەن بىرگە جوعارى جىكتەگىلەردىڭ بارىس - كەلىس ارىنىن ساقتاپ، دوستىقتى جانە ءوزارا سەنىمدىلىكتى تەرەڭدەتىپ، ناقتى ىستەر سەلبەستىگىن ىلگەرىلەتۋدى، وتە - موتە، پيراۋس پورتى نىسانىنىڭ جەتەكشىلىك ەتۋ جانە ۇلگى كورسەتۋ رولىن ويداعىداي ساۋلەلەندىرىپ، ”ءبىر بەلدەۋ، ءبىر جول“دى بىرگە قۇرىپ، ەنەرگيا، قاتىناس، حابارلاسۋ سياقتى سالالارداعى سەلبەستىكتىڭ ءتىپتى كوپ جەتىستىكتەرگە قول جەتكىزۋىن كۇش سالا ىلگەرىلەتۋدى قالايدى. جۇڭگو مەن گرەتسيا وركەنيەتتى بايىرعى ەلدەر، ەكى جاق گۋمانيتارلىق اۋىس - كۇيىستى جەبەپ، وركەنيەتتەردىڭ تىلدەسۋىن، ءوزارا ۇلگى الۋىن دارىپتەپ، كەلەلى حالىقارالىق ماسەلەلەردە بايلانىستى، سايكەستىكتى ساقتاۋى كەرەك. گرەتسيانىڭ جۇڭگو - ورتا، شىعىس ەۆروپا سەلبەستىك مەحانيزمىنە كىرۋىن قارسى الامىز، گرەتسيانىڭ بەلسەندى رول اتقارۋىن كۇتەمىز.

  ميتسوتاكيس مىنالاردى ءبىلدىردى: گرەتسيانىڭ كولەمدى ەكونوميكا - ساۋدا ۋاكىلدەر ۇيىرمەسىن باستاپ جۇڭگوعا كەلىپ 2 - كەزەكتى جۇڭگو حالىقارالىق يمپورت كورمەسىنە قاتىناسقانىما توتەنشە قۋانىشتىمىن. گرەتسيا مەن جۇڭگو وركەنيەتتى بايىرعى ەلدەر، ەكى ەلدىڭ ءداستۇرلى دوستىعىنىڭ تاريحى ارىدان باستاۋ العان، ءوزارا پايدا جەتكىزۋ سەلبەستىگى حالىققا تيىمدىلىك جەتكىزدى، وتە - موتە، پيراۋس پورتى نىسانى ”ءبىر بەلدەۋ، ءبىر جول“دى بىرگە قۇرۋدىڭ ماڭداي الدى نىسانىنا اينالدى. گرەتسيا جۇڭگوعا وسكەلەڭ ءمان بەرەدى، جۇڭگونىڭ دامۋ ۇستانىمىن جانە قول جەتكىزگەن دامۋ تابىستارىن القايدى، جۇڭگونىڭ سەنىمدى سەلبەستىك سەرىگى، جۇڭگونىڭ وزەكتى مۇددەسىنە ساياتىن ماسەلەلەردە جۇڭگو جاقتى باتىل قولدايدى. گرەتسيا حالقى ءتوراعا شي جينپيڭنىڭ گرەتسياعا ەرتەرەك ساپارلاي بارۋىن اسىعا كۇتىپ وتىر. گرەتسيا جۇڭگوعا ۇزدىكسىز ەسىك اشادى، جۇڭگو كاسىپورىندارىنىڭ قارجى قوسۋىن قارسى الادى. گرەتسيا جۇڭگو جاقپەن بىرگە كوپ جاقتىلىقتى قورعايدى، ورتا، شىعىس ەۆروپا ەلدەرىنىڭ جۇڭگومەن سەلبەستىگىنە بەلسەنە ات سالىسادى. گرەتسيا مەن جۇڭگو قارىم - قاتىناسىنىڭ بولاشاعى اناعۇرلىم جارقىن بولاتىندىعىنا سەنەمىن.

  ديڭ شۋەشياڭ، لي چياڭ، ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.

جاۋاپتى رەداكتور: نۇربولات قابىل