ومىرلىك قاجىر - قايراتىمەن حالىق ءۇشىن قىزمەت ىستەدى

ومىرلىك قاجىر - قايراتىمەن حالىق ءۇشىن قىزمەت ىستەدى

− زاڭمەن بىرگە ارەكەتتەنگەن ماقسات زايىپ

□ ءتىلشىمىز ءرايدا، ەرىكتى ءتىلشى قيۇم قادىر

  31 جىلدان بەرى، سۇيىسپەنشىلىك پەن زاڭنىڭ، اقشا مەن زاڭنىڭ، ۇقىق پەن زاڭنىڭ قاتاڭ سىن - سىناعى الدىندا، ول مۇراتىنان جازباي، ءوز قىزمەتىن تاباندىلىقپەن ادا ەتتى؛ 17 جىل دەربەس دەلو ءبىتىرىپ، ازاماتتىق، ساۋدا ىستەرى دەلولارىنان جالپى 3277سىن تەكسەرىپ قاراپ، 2992 دەلونى جاراستىرىپ، ارىزىن قايتارتتى، ەشبىر دەلونىڭ تەكسەرىپ قاراۋ ۋاقىتىن مەرزىمىنەن اسىرمادى، ەشبىر دەلودا جوعارىعا ارىزدانۋ، شاعىمدانىپ سوڭىنان قالماۋ جاعدايى بولعان جوق. ول باركول قازاق اۆتونوميالى اۋداندىق حالىق سوتى مەكەمەسىنىڭ باستىعى ماقسات زايىپ ەدى، وسىنىڭ الدىندا ”مەملەكەتتىك ۇلتتار ىنتىماعى، العاباسارلىعىنداعى ۇلگىلى جەكە“ داڭقتى اتاعىنا يە بولدى.

  ماقسات باركول قازاق اۆتونوميالى اۋدانى ۇلكەن قۇلىنشار اۋىلىنداعى قاراپايىم مالشى وتباسىندا تۋعان. 1988 - جىلى ول شينجياڭ ساياسي - زاڭ شۋەيۋانىنان وقۋ تاۋىسىپ، باركول قازاق اۆتونوميالى اۋداندىق حالىق سوتى مەكەمەسىنە قىزمەتكە بولىنەدى.

  كەدەي ەگىنشى - مالشىلاردىڭ ارىز - شاعىم قاراجاتىن ازايتىپ، ەكونوميكالىق قيىنشىلىعى بار ىسكە قاتىستى ادامنىڭ سوتتاسا الۋىنا شىنايى كەپىلدىك ەتۋ، ءادىليالىق قۇتقارۋ - كومەكتەسۋ كولەمىن كەڭەيتۋ ءۇشىن، باركول قازاق اۆتونوميالى اۋداندىق حالىق سوتى مەكەمەسى حالىققا قولايلى كوشپەلى سوت قيمىلىن ورىستەتتى.

  ماقسات قىزمەتتەسىمەن بىرگە كوشپەلى سوت بولىپ ۇيىمداسىپ، مەزگىل - مەزگىل سايىن ات جەتەكتەپ، مەملەكەت گەربىن اسىپ، تاۋ اسىپ، تاس باسىپ، مالشىلىق وڭىرلەرگە بارىپ دەلو ءبىتىردى.

  2008 - جىلى سارشوقى اۋىلى زىليۋجيڭ قىستاعىنداعى 85 جاستاعى قارت باعىپ - قاعۋ بورىشىن وتەمەدى دەپ 6 بالاسىنىڭ ۇستىنەن شاعىمدانادى. بۇل دەلونى جاراستىرۋ ءۇشىن، ماقسات اتپەن 70 كيلومەتر جول باسىپ قارتتىڭ ۇيىنە بارادى. دەلوعا سوت اشىلعاننان كەيىن، دەلونى قاراۋعا جاۋاپتى بولعان ماقسات ورنىنان تۇرىپ، شەشەيدى ايىپكەر تۇراتىن ورىنعا ەرتىپ بارىپ، ونى نۇسقاپ تۇرىپ، بالالارىنان: ”ول كىم؟“ دەپ جاعالاي سۇراپ شىعادى، 6 ۇل - قىز بىردەي:”ول مەنىڭ شەشەم“ دەپ جاۋاپ بەرەدى.

  انىق جاۋاپقا يە بولعان ماقسات ءوز ورنىنا كەلىپ وتىرىپ: ”مەنىڭ انام الدەقاشان ومىردەن وتكەن، مەن جانە ۇيىمدەگىلەر الدەبىر قاريانىڭ بىزبەن بىرگە تۇرمىس كەشىرۋىن ۇنەمى ءۇمىت ەتىپ كەلەمىز، ەگەر مەن سەندەردەن ءبىر تيىن اقشا الماي، سەندەردىڭ شەشەلەرىڭدى باعىپ - قاعامىن دەسەم، قالايسىڭدار ما؟“، - دەيدى، ماقساتتىڭ ءسوزى اياقتالماستان ايىپكەر ورنىندا وتىرعان 6 ۇل - قىز وزدەرىنىڭ كوڭىل كۇيلەرىن تەجەي الماي، شەشەلەرىن قۇشاقتاپ ەگىلە جىلاپ، ۇيلەرىنە اپارىپ قادىرلەپ - قۇرمەتتەيتىندىكتەرىن تالاسا ايتىستى. قارت سوتتا ارىزىن قايتارىپ الدى.

  حالىققا قولايلى كوشپەلى سوت قيمىلى ورىستەتىلگەننەن بەرى، ماقسات قاراستى اۋماقتاعى 38 مىڭ 400 شارشى كيلومەتر كەلەتىن مالشىلىق ءوڭىردى تۇگەل ارالاپ شىقتى.

  2015 - جىلدىڭ سوڭىندا باركول ساردالا اشۋ رايونىنداعى ءبىر ايەلگە ومىراۋ راگىنا شالدىعىپ، سوڭعى كەزەڭىنە وتكەندىگى جايلى دياگنوز قويىلادى، ونىڭ كۇيەۋى 8 جىلدىڭ الدىندا اۋىر ناۋقاستان دۇنيەدەن وتكەن ەكەن، قازىر ءوزىنىڭ دە ءومىرى حاۋىپتە قالعان سوڭ، ءالى ەرجەتپەگەن 2 بالاسىن ويلاعان ونىڭ كۇنى - ءتۇنى ەتەگى جاسقا تولادى.

  جاعدايدان حابار تاپقان ماقسات پەن ايەلى وعان: ”بۇدان كەيىن ءبىز بالالارعا باس - كوز بولامىز، الاڭداماڭىز“، - دەيدى. بۇل ايەل قايتىس بولعان سوڭ، ماقسات پەن ايەلىنىڭ كومەگىندە قازىر وسى 2 قىز بالانىڭ ءبىرى اۋداندىق اۋىل شارۋاشىلىعى تەحنيكالارىن جالپىلاستىرۋ پۋنكتىندە قىزمەت ىستەۋدە، ەندى ءبىرى شينجياڭ اۋىل شارۋاشىلىعى داشۋەسىندە وقۋدا.

  ماقسات بىلاي دەيدى: ”ومىرلىك قاجىر - قايراتىممەن حالىق ءۇشىن قىزمەت ىستەۋگە، كومەككە مۇقتاج جاندارعا كومەكتەسۋگە پەيىلمىن“.

جاۋاپتى رەداكتور: سايراش تۇرارجان