بار ىنتا - ىقىلاسىمەن حالىق ءۇشىن قىزمەت ىستەدى

    ”مادەنيەت زور توڭكەرىسى“ تۋىلعاننان كەيىن، ول تۋدىرعان زياندى بارىنشا جەڭىلدەتىپ، مۇمكىن بولعان جاعدايدا اسىرە سولشىل يدەيالىق اعىمىن تەجەۋ ءۇشىن، جوۋ ىنلاي زۇڭلي باستان - اياق بار زەيىن - زەردە، كۇش - قايراتىن جۇمساپ، تىنباي قۇلشىنۋمەن بولدى. لين بياۋ وقيعاسىنىڭ تۋىلۋى ماۋ زىدۇڭنىڭ كەيبىر ماسەلەلەرگە قايتادان بايىپتاي قاراۋىنا مۇمكىندىك جاسادى. جوۋ ىنلاي ءتيىمدى ورايدى مىقتاپ يگەرىپ، اسىرە سولشىل يدەيالىق اعىمىمەن كۇرەس جاسادى.

  ”لين بياۋدى سىن تەزىنە الىپ، ستيلدى دۇرىستاۋ“ قوزعالىسى باستالعاننان كەيىن، جوۋ ىنلاي ماۋ زىدۇڭنىڭ قولداۋىندا ورتالىقتىڭ كۇندەلىكتى قىزمەتىن باسقاردى. ول كادرلار ساياساتى مەن زيالىلار ساياساتىنىڭ اياق الىسىن جەدەل تياناقتاندىرۋدى العا قويىپ، سوققىعا ۇشىراعان پارتيا، ۇكىمەت، ارميانىڭ ءبىر توپ باسشى كادرلارىنىڭ قايتادان باسشىلىق ورىنعا شىعۋىنا مۇمكىندىك جاسادى. ول مەملەكەتتىك كەڭەسكە كاسىپورىنداردى رەتكە سالۋ شارالارىن العا قويىپ، بۇزىلعان ءتۇرلى ەرەجە - تۇزىمدەردى قالپىنا كەلتىرۋگە نۇسقاۋ بەردى. ول جياڭ چيڭ قاتارلى ادامداردىڭ ”شەتەلگە جارامساقتانعان“ دەپ قۇتىرىنا سىنعا الۋ قىسىمىنا قاراماي، سىرتقى ساۋدا مەن ەكونوميكالىق - تەحنيكالىق اۋىس - كۇيىستى قۇلشىنا ورىستەتتى. اۋىل - قىستاق قىزمەتىندە، پارتيا ورتالىق كوميتەتى اۋىل - قىستاق حالىق كوممۋنالارىنىڭ ءبولىس ماسەلەسى جونىندە نۇسقاۋ شىعارىپ، ەڭبەگىنە قاراي ءبولىس جاساۋ پرينسيبىنە، ءسوز جوق، تاباندى بولۋ كەرەكتىگىن قايتالاي دارىپتەدى. عىلىم، وقۋ - اعارتۋ قىزمەتىندە، ول نەگىزدىك عىلىمدار مەن نازاريانى زەرتتەۋدى يگەرۋدى تالاپ ەتتى. مۇنان سىرت، ول پارتيانىڭ مادەنيەت، ۇلت، بىرلىكساپ سياقتى ساياساتتارىن تياناقتاندىرۋ قىزمەتىن دە يگەردى.

  جوۋ ىنلاي اسىرە سولشىل يدەيالىق اعىمىن سىن تەزىنە الۋ كەرەك دەگەن پىكىردى العا قويدى، بۇل 1967 - جىلى 2 - ايدىڭ الدى - ارتىندا ورتالىقتىڭ كوپتەگەن باسشى جولداستارى تالاپ ەتكەن ”مادەنيەت زور توڭكەرىسى“ قاتەلىگىن تۇزەتۋ سىندى دۇرىس دارىپتەمەنىڭ جالعاسى، ”مادەنيەت زور توڭكەرىسى“نە قاراتىلعان ”سولشىلدىق“تى ءبىرىنشى رەت وڭاۋى. 2 جىلعا تاياۋ رەتتەۋ - وڭاۋ ارقىلى ءار جاقتارداعى قىزمەتتەردە كورنەكتى جاقسارۋ جارىققا شىقتى. جاعدايدا وزگەرىس تۋىلعانىمەن، اسىرە سولشىل يدەيالىق اعىمىن سىن تەزىنە الۋ كۇرەسى ءىس جۇزىندە ءالى دە كومەسكى، قايتالاۋ تاسىلىندە جالعاسىپ جاتتى.

  1972 - جىلى، جوۋ ىنلايدىڭ قۋىق راگىنا دۋشار بولعان دياگنوزى انىقتالدى. بۇل كەزدە ول 74 جاستا بولاتىن، دەنى ساۋ ادامداردىڭ ءوزى ارقالاپ جۇرە المايتىن قيىن ەرەكشە قاربالاس قىزمەتتى ۇستىنە الدى. ونىڭ ۇستىنە، ونىڭ ءار سالاداعى ”سولشىلدىق“تى وڭاۋ ءۇشىن جاساعان قۇلشىنىسى جياڭ چيڭ قاتارلى ادامداردىڭ ءتۇرلى - ءتۇستى كەدەرگىلەرى مەن قىساسىنا ۇشىرادى. ول ۇنەمى: مەندە تەك ”ولە - ولگەنشە وتاننىڭ قامىن جەۋ“ دەگەن ءسوز عانا بار، - دەيتىن. ونىڭ كوڭىل تۇكپىرىندە تەك پارتيا مەن حالىقتىڭ كەلەلى تاپسىرماسى، تەك قىزمەتكە دەگەن وسكەلەڭ جاۋاپكەرشىلىك سەزىمى مەن ىسكە دەگەن شەكسىز ادالدىعى عانا بولدى!

  (شينحۋا اگەنتتىگىنىڭ 10 - ايدىڭ 2 - كۇنى بەيجيڭنەن بەرگەن حابارى)

جاۋاپتى رەداكتور: نۇربولات قابىل
  • 1
  • 2
  • 3
  • 4