جۇڭگو - افريكا دوستىعىنىڭ وشپەس ەسكەرتكىشى

  شىعىسى تانزانيانىڭ استاناسى داراس - سالامنان باستالىپ، باتىستا زامبيانىڭ ورتالىق ولكەسىندەگى كاپيريمبوشقا جالعاساتىن، ”جەر شارىنىڭ تىرتىعى“ − شىعىس افريكاداعى ۇلكەن شاتقالدى كەسىپ وتەتىن، جالپى ۇزىندىعى 1860.5 كيلومەتر كەلەتىن ءبىر تەمىر جول بار. شىعىس افريكا مەن ورتا وڭتۇستىك افريكانى تۇتاستىراتىن وسى ۇلكەن نەگىزگى جەلى تانزانيا تەمىر جولى دەپ اتالادى، بۇل جۇڭگو - افريكا دوستىعىنىڭ وشپەس ەسكەرتكىشى.

  تانزانيا مەن زامبيا وتكەن عاسىردىڭ 60 - جىلدارىنداعى افريكا قۇرلىعىنىڭ ۇلت ازاتتىق تولقىنىندا جاڭادان تاۋەلسىزدىك العان مەملەكەت. الايدا، كەيبىر ەلدەردىڭ قۇرساۋلاۋى سەبەپتى، وسى ەكى ەلدىڭ ەكونوميكاسىنىڭ دامۋى ۇلكەن قيىنشىلىققا ءدوپ كەلەدى. سوندىقتان، تانزانيا، زامبيا ەكى ەلدىڭ باسشىلارى دۇنيە جۇزىندەگى قاتىستى مەملەكەتتەردەن ەكى ەلدى تۇتاستىراتىن ءبىر تەمىر جول سالۋعا كومەكتەسۋدى ءوتىنىش ەتەدى.

  1965 - جىلى 2 - ايدا تانزانيانىڭ زۇڭتۇڭى نيەرەرە جۇڭگوعا ساپارلاي كەلەدى. ليۋ شاۋچي مەن جوۋ ىنلاي نيەرەرەمەن كەڭەس وتكىزگەندە، جۇڭگو ۇكىمەتىنىڭ تانزانيادان زامبياعا باراتىن ءبىر تەمىر جولدى كومەكتەسىپ سالىپ بەرۋگە قوسىلاتىندىعىن بىلدىرەدى. ماۋ زىدۇڭ نيەرەرەگە بىلاي دەيدى: سىزدەردە قيىنشىلىق بولسا، بىزدە دە قيىنشىلىق بار. ءبىراق سىزدەردىڭ قيىنشىلىقتارىڭىز ءبىزدىڭ قيىنشىلىعىمىزعا ۇقسامايدى، ءبىز ءوزىمىز تەمىر جول سالماساق تا سىزدەرگە كومەكتەسىپ وسى تەمىر جولدى سالىپ بەرەمىز. 1967 - جىلى 6 - ايدا زامبيانىڭ زۇڭتۇڭى كا - ۋىندا جۇڭگوعا ساپارلاي كەلگەن كەزدە جۇڭگومەن تانزانيا - زامبيا تەمىر جولىن سالۋعا قاتىستى ىستەردى اقىلداسىپ بەكىتەدى. وسى جىلى 9 - ايدىڭ 5 - كۇنى جۇڭگو، تانزانيا، زامبيا 3 ەل ۇكىمەتى بەيجيڭدە «جۇڭحۋا حالىق رەسپۋبليكاسى ۇكىمەتىنىڭ تانزانيا بىرىككەن رەسپۋبليكاسى ۇكىمەتىمەن، زامبيا رەسپۋبليكاسى ۇكىمەتىمەن تانزانيا - زامبيا تەمىر جولىن سالۋ جونىندەگى كەلىسىم»گە قول قويادى. كەلىسىمدە بىلاي بەلگىلەنگەن: جۇڭگو ءوسىمسىز، ەشقانداي شارتسىز قارىز اقشا بەرەدى ءارى مامانداردى جىبەرىپ وسى تەمىر جولدى سالادى، باسقارادى، قورعايدى، تەحنيكالىق قىزمەتكەرلەردى باۋليدى.

  1968 - جىلى 5 - ايدا جۇڭگو بارلاۋ قىزمەتكەرلەرىن جىبەرىپ، توتەنشە ناشار جاراتىلىستىق ورتادا تۇتاس جەلىدەگى بارلاۋ - ولشەۋ، جوبالاۋ جۇمىسىن باستايدى. تانزانيا - زامبيا تەمىر جولىندا 1975 - جىلى 10 - ايدا سىناق رەتىندە تاسىمال جۇرگىزىلەدى، 1976 - جىلى 5 - ايدا تۇتاس جەلىدەگى قۇرىلىستى اياقتاتۋ جانە قۇرىلعىلاردى ورناتۋ، سايكەستىرۋ سياقتى قىزمەتتەر ورىندالادى. كا - ۋىندا زۇڭتۇڭ كەيىن بىلاي دەيدى: تانزانيا - زامبيا تەمىر جولى ”ءبىزدىڭ جۇڭگومەن دوستىعىمىزدىڭ جانە ىنتىماعىمىزدىڭ ەسكەرتكىشى“.

  باتىستىڭ ءبىر ينجەنەرى تانزانيا - زامبيا تەمىر جولىن كوزدەن كەشىرگەننەن كەيىن: ”ۇلى قورعاندى سالعان ۇلت قانا وسىنداي جوعارى ساپالى، جوعارى ولشەمدى تەمىر جولدى سالىپ شىعا الادى“، - دەدى سۇيىنىشپەن.

  (شينحۋا اگەنتتىگىنىڭ 9 - ايدىڭ 28 - كۇنى بەيجيڭنەن بەرگەن حابارى)

جاۋاپتى رەداكتور: نۇربولات قابىل
  • 1
  • 2
  • 3
  • 4