1966 - جىلى: «مادەنيەت زور توڭكەرىسى» 10 جىلدىق ىشكى بىلىقپالىق باستالدى

  1966 - جىلى ەلىمىز شارۋاشىلىقتى رەتتەۋ مىندەتىن نەگىزىنەن ورىنداپ بولىپ، حالىق شارۋاشىلىعىن دامىتۋدىڭ 3 - بەسجىلدىق جوسپارىن اتقارا باستاعان كەزدە ”مادەنيەت زور توڭكەرىسى“ باستالدى.

  ”مادەنيەت زور توڭكەرىسىن“ ماۋ زىدۇڭ جولداس باستاعان جانە باسشىلىق ەتكەن. ونىڭ وسى ”زور توڭكەرىستى“ باستاۋداعى ويى − كاپيتاليزمنىڭ قايتا باس كوتەرۋىنەن ساقتانۋ، پارتيانىڭ كىرشىكسىزدىگىن قورعاۋ جانە جۇڭگونىڭ ءوزىنىڭ سوتسياليزم قۇرۋ جولىن تابۋ بولاتىن. ايتسە دە ونىڭ سول كەزدە پارتيا مەن مەملەكەتتىڭ ساياسي جاعدايىن قاتە مەجەلەۋى ەرەكشە اۋىر دارەجەگە جەتكەن ەدى.

  ”مادەنيەت زور توڭكەرىسى“ باستالعاننان تارتىپ 1969 - جىلى 4 - ايداعى جۇڭگو كوممۋنيستىك پارتياسىنىڭ 9 - قۇرىلتايىنا، پارتيا 9 - قۇرىلتايىنان 1973 - جىلى 8 - ايداعى جۇڭگو كوممۋنيستىك پارتياسىنىڭ 10 - قۇرىلتايىنا، پارتيا 10 - قۇرىلتايىنان 1976 - جىلى 10 - ايدا اياقتاعانعا دەيىنگى وسىنداي 3 كەزەڭدى باستان وتكىزدى. جۇڭگو كوممۋنيستىك پارتياسىنىڭ 9 - قۇرىلتايى لين بياۋ، جياڭ چيڭ، كاڭ شىڭ قاتارلى ادامداردىڭ ورتالىقتاعى ورنىن كۇشەيتىپ، ”مادەنيەت زور توڭكەرىسى“نىڭ قاتە نازارياسى مەن امالياتىن زاڭداستىردى. 1971 - جىلى 9 - ايدا لين بياۋ ۋاقيعاسىنىڭ تۋىلۋى ”مادەنيەت زور توڭكەرىسى“ نازارياسى مەن امالياتىنىڭ ءساتسىز بولعاندىعىن وبيەكتيۆ تۇرعىدان جاريالادى، ايتسە دە جۇڭگو كوممۋنيستىك پارتياسىنىڭ 10 - قۇرىلتايى پارتيا 9 - قۇرىلتايىنىڭ ”سولشىل“ اعاتتىعىن ۇزدىكسىز جالعاستىردى ءارى جياڭ چيڭ كەرى توڭكەرىستىك توبىنىڭ كۇشىن اناعۇرلىم كۇشەيتتى. 1976 - جىلى 9 - ايدا ماۋ زىدۇڭ قايتىس بولعاننان كەيىن، جياڭ چيڭ، جاڭ چۇنچياۋ، ياۋ ۋىنيۋان، ۋاڭ حۇڭۋىن پارتيا مەن مەملەكەتتىڭ ەڭ جوعارى باسشىلىق ۇقىعىن تارتىپ الۋ قاسكۇنەمدىك ارەكەتىن جەدەلدەتتى. سول جىلى 10 - ايدا جۇڭگو كوممۋنيستىك پارتياسى ورتالىق كوميتەتى ساياسي بيۋروسى پارتيا مەن حالىقتىڭ ەركىن اتقارىپ، ”تورتتىك توبە”نى ءبىر جولاتا تالقانداپ، ”مادەنيەت زور توڭكەرىسى“ سىندى زوبالاڭدى اياقتاتتى.

  اماليات ”مادەنيەت زور توڭكەرىسى“نىڭ پالەندەي ءبىر ماندەگى توڭكەرىس نەمەسە قوعامدىق العا باسۋ ەمەس ەكەندىگىن، مۇنداي بولۋى دا مۇمكىن ەمەستىگىن دالەلدەدى.

  ”مادەنيەت زور توڭكەرىسى“ كەزىندە، پارتيا مەن حالىقتىڭ ”سولشىل“ اعاتتىقپەن جانە لين بياۋ، جياڭ چيڭ كەرى توڭكەرىستىك توبىمەن بولعان كۇرەسى جاپالى دا بۇراڭ بولعانىمەن، ەشقاشان توقتاعان ەمەس. وسى 10 جىلدا، ەلىمىزدىڭ حالىق شارۋاشىلىعى سوندادا ىلگەرىلەۋشىلىككە قول جەتكىزدى، سىرتقى قىزمەتتە دە جاڭا جاعداي اشتى. ءبىراق، ەگەر ”مادەنيەت زور توڭكەرىسى“ بولماعان بولسا، ەلىمىزدىڭ سوتسياليستىك ىستەرى الدەقايدا كەسەك تابىستارعا قول جەتكىزگەن بولار ەدى.

  (شينحۋا اگەنتتىگىنىڭ 9 - ايدىڭ 27 - كۇنى بەيجيڭنەن بەرگەن حابارى)

جاۋاپتى رەداكتور: نۇربولات قابىل
  • 1
  • 2
  • 3
  • 4