جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قۇتتىقتاۋ جينالىسىندا سويلەنگەن ءسوز

  جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قۇتتىقتاۋ جينالىسىندا سويلەنگەن ءسوز

  (2019 - جىلى 10 - ايدىڭ 1 - كۇنى)

  شي جينپيڭ

  بۇكىل ەلدەگى باۋىرلاستار،

  جولداستار، دوستار:

  بۇگىن ءبىز سالتاناتتى جينالىس وتكىزىپ، جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قۇتتىقتاپ وتىرمىز. ءدال وسى ۋاقىتتا، وسى ساتتە، بۇكىل ەلدەگى ءار ۇلت حالقى، ەل ءىشى - سىرتىنداعى جۇڭحۋا ۇلاندارى تۇگەل شەكسىز قۋانىشتى سەزىمگە بولەنىپ، ۇلى وتانىمىزدى تۇگەل ماقتانىش ەتىپ، ۇلى وتانىمىزعا تۇگەل شىن جۇرەكتەن باقىت تىلەۋدە.

  وسى ارادا مەن پارتيا ورتالىق كوميتەتى، مەملەكەتتىك حالىق قۇرىلتايى، مەملەكەتتىك كەڭەس، مەملەكەتتىك ساياسي كەڭەس جانە ورتالىق اسكەري ىستەر كوميتەتى اتىنان ۇلتتىڭ تاۋەلسىزدىگى مەن حالىقتىڭ ازاتتىعى، مەملەكەتتىڭ بايۋ - قۇدىرەتتەنۋى مەن حالىقتىڭ باقىتى ءۇشىن وشپەس ەڭبەك كورسەتكەن بارلىق توڭكەرىستىك اعا بۋىندار مەن قۇرباندارعا تەرەڭ ساعىنىش بىلدىرەمىن! بۇكىل ەلدەگى ءار ۇلت حالقى مەن ەل ءىشى - سىرتىنداعى وتاندى سۇيەتىن باۋىرلاستارعا ىستىق ىقىلاستى قۇتتى بولسىن ايتامىن! جۇڭگونىڭ دامۋىنا كوڭىل بولگەن جانە قولداۋ كورسەتكەن ءار مەملەكەتتەگى دوستارعا شىن جۇرەكتەن العىس ايتامىن!

  70 جىلدىڭ الدىنداعى ءدال وسى كۇنى ماۋ زىدۇڭ جولداس وسى جەردە دۇنيە جۇزىنە جۇڭحۋا حالىق رەسپۋبليكاسىنىڭ قۇرىلعاندىعىن، جۇڭگو حالقىنىڭ وسىدان باستاپ ەڭسە كوتەرگەندىگىن سالتاناتپەن جاريالاعان بولاتىن. بۇل ۇلى وقيعا تاياۋ زاماننان بەرگى 100 نەشە جىلداعى جۇڭگونىڭ كەدەيلىكتەن، دارمەنسىزدىكتەن ارىلا الماعان، باسقالاردىڭ قورلاۋىنا ۇشىراعان ايانىشتى تاعدىرىن ءۇزىلدى - كەسىلدى وزگەرتىپ، جۇڭحۋا ۇلتىن ۇلى گۇلدەنۋدى جۇزەگە اسىرۋدىڭ داڭعىل جولىنا ءتۇسىردى.

  70 جىلدان بەرى، بۇكىل ەلدەگى ءار ۇلت حالقى ءبىر نيەت، ءبىر تىلەكتە بولا وتىرىپ، قاجىرلىلىقپەن كۇرەس جۇرگىزىپ، دۇنيە ءجۇزىن جالت قاراتقان ۇلى جەتىستىككە قول جەتكىزدى. بۇگىن سوتسياليستىك جۇڭگو دۇنيەنىڭ شىعىسىندا اسقاق تۇلعاسىمەن تۇر، ەشقانداي كۇش ءبىزدىڭ ۇلى وتانىمىزدىڭ ورنىن تەڭسەلتە المايدى، ەشقانداي كۇش جۇڭگو حالقى مەن جۇڭحۋا ۇلتىنىڭ العا باسۋ قادامىنا بوگەت بولا المايدى.

  جولداستار، دوستار!

  العا باسۋ ساپارىندا ءبىز جۇڭگو كوممۋنيستىك پارتياسىنىڭ باسشىلىعىنا تاباندى بولىپ، حالىقتىڭ تۇلعالىق ورنىنا تاباندى بولىپ، جۇڭگوشا سوتسياليزم جولىنا تاباندى بولىپ، پارتيانىڭ نەگىزگى نازاريالارىن، نەگىزگى لۋشيانىن، نەگىزگى جالپى جوباسىن جاپپاي دايەكتىلەندىرىپ، اتقارىپ، حالىقتىڭ تاماشا تۇرمىسقا دەگەن تالپىنىسىن ۇزدىكسىز قاناعاتتاندىرىپ، تىڭ تاريحي ۇلى ىستەردى تولاسسىز جارىققا شىعارامىز.

  العا باسۋ ساپارىندا ءبىز ”بەيبىت بىرلىككە كەلۋ، ءبىر ەل، ەكى ءتۇزىم“ باعىتىنا تاباندى بولىپ، شياڭگاڭنىڭ، اۋمىننىڭ ۇزاق ۋاقىت گۇلدەنۋىن، ورنىقتى بولۋىن ساقتاپ، بۇعازدىڭ ەكى جاعالاۋى قارىم - قاتىناسىنىڭ بەيبىت دامۋىن ىلگەرىلەتىپ، بارشا جۇڭحۋا ۇلاندارىن ىنتىماقتاستىرىپ، وتاننىڭ بۇكىلدەي بىرلىككە كەلۋىن جۇزەگە اسىرۋ ءۇشىن ۇزدىكسىز كۇرەس جۇرگىزەمىز.

  العا باسۋ ساپارىندا ءبىز بەيبىت دامۋ جولىنا تاباندى بولىپ، ءوزارا تيىمدىلىك جاسايتىن، تەڭ يگىلىكتەنەتىن اشىق ستراتەگيا اتقارىپ، دۇنيە جۇزىندەگى ءار ەل حالقىمەن بىرگە ادامزاتتىڭ تاعدىرلاس ورتاق تۇلعاسىن قۇرۋدى ۇزدىكسىز بىرگە ىلگەرىلەتەمىز.

  جۇڭگو حالىق ازاتتىق ارمياسى مەن حالىق قارۋلى ساقشى قوسىندارى حالىقتىڭ اسكەري قوسىنىندىق سيپاتىن، باستى ماقساتىن، قاسيەتىن ماڭگى ساقتاپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعاۋى، دۇنيە ءجۇزىنىڭ بەيبىتشىلىگىن باتىل قورعاۋى كەرەك.

  جولداستار، دوستار!

  جۇڭگونىڭ كەشەگىسى ادامزاتتىڭ تاريح پاراعىنا جازىلدى، جۇڭگونىڭ بۇگىنى ميلليارد حالىقتىڭ قولىمەن جاراتىلۋدا، جۇڭگونىڭ ەرتەڭى، ءسوز جوق، اناعۇرلىم كوركەم بولادى. بۇكىل پارتيا، بۇكىل ارميا، بۇكىل ەلدەگى ءار ۇلت حالقى اناعۇرلىم تىعىز ىنتىماقتاسىپ، اۋەلگى ماقساتتى ۇمىتپاي، بورىشتى ەستە بەرىك ساقتاپ، حالىق رەسپۋبليكامىزدى ۇزدىكسىز ويداعىداي بەكەمدەپ، ويداعىداي دامىتىپ، ”قوس 100 جىلدىق“ كۇرەس نىساناسىن جۇزەگە اسىرۋ ءۇشىن، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ءۇشىن ۇزدىكسىز قۇلشىنا كۇرەس جۇرگىزۋ كەرەك!

  ۇلى جۇڭحۋا حالىق رەسپۋبليكاسى جاساسىن!

  ۇلى جۇڭگو كوممۋنيستىك پارتياسى جاساسىن!

  ۇلى جۇڭگو حالقى جاساسىن!

  (شينحۋا اگەنتتىگىنىڭ 10 - ايدىڭ 1 - كۇنى بەيجيڭنەن بەرگەن حابارى)

جاۋاپتى رەداكتور: نۇربولات قابىل