شي جينپيڭ جۇڭگو ايەلدەر ۆولەيبول كومانداسىنىڭ ۋاكىلدەرىمەن كەزدەستى

  9 - ايدىڭ 30 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جۋىردا عانا 2019 - جىلعى دۇنيە جۇزىلىك ايەلدەر ۆولەيبول ساۋىتى جارىسىندا اعا جۇلدەگەر بولعان جۇڭگو ايەلدەر ۆولەيبول كومانداسىنىڭ مۇشەلەرىن، جاتتىقتىرۋشىلار ۋاكىلدەرىن جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قۇتتىقتاۋ قوناعاسىنا قاتىناسۋعا ارناۋلى ۇسىنىس ەتتى ءارى قوناعاسىدان بۇرىن ايەلدەر ۆولەيبول كومانداسىنىڭ ۋاكىلدەرىمەن ىستىق ىقىلاسپەن كەزدەستى. سۋرەتتى شينحۋا اگەنتتىگىنىڭ ءتىلشسى ۋاڭ يە تۇسىرگەن

  شينحۋا اگەنتتىگىنىڭ 9 - ايدىڭ 30 - كۇنى بەيجيڭنەن بەرگەن حابارى (ءتىلشى جۋ جيچاي). جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جاڭا عانا 2019 - جىلعى دۇنيە جۇزىلىك ايەلدەر ۆولەيبول ساۋىتى جارىسىندا اعا جۇلدەگەر بولعان جۇڭگو ايەلدەر ۆولەيبول كومانداسىنىڭ مۇشەلەرىن، جاتتىقتىرۋشىلار ۋاكىلدەرىن جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قۇتتىقتاۋ قوناعاسىنا قاتىناسۋعا ارناۋلى ۇسىنىس ەتتى ءارى قوناعاسىدان بۇرىن ايەلدەر ۆولەيبول كومانداسىنىڭ ۋاكىلدەرىمەن ىستىق ىقىلاسپەن كەزدەسىپ، كوپشىلىكپەن بىرگە ەستەلىك سۋرەتكە ءتۇستى.

  تۇستەن كەيىن ساعات 4تەن 45 مينۋت وتكەندە، ايەلدەر ۆولەيبول كومانداسىنىڭ مۇشەلەرى، جاتتىقتىرۋشىلار ۋاكىلدەرى حالىق سارايىنىڭ فۋجيان زالىنا كەلدى، شي جينپيڭ كوپشىلىكپەن ءبىر - بىرلەپ قول الىسىپ امانداستى. كوماندا جەتەكشىلەرىنىڭ جانە جاتتىقتىرۋشىلاردىڭ، سپورتشىلار ۋاكىلدەرىنىڭ ءسوزىن تىڭداعاننان كەيىن شي جينپيڭ مىنانى ءبىلدىردى: بۇكىل ەلدىڭ بارلىق جەرىندە جاڭا جۇڭگو قۇرىلعاندىعىنىڭ 70 جىلدىعىن قۇتتىقتاپ جاتقان شاقتا، مەن ەڭ الدىمەن جەڭىسپەن ورالعان سىزدەردى قارسى الامىن، سىزدەردى قىزۋ قۇتتىقتايمىن.

  شي جينپيڭ بىلاي دەپ باسا دارىپتەدى: 13 - كەزەكتى دۇنيە جۇزىلىك ايەلدەر ۆولەيبول ساۋىتى جارىسىندا سىزدەر ءۇرتىس 11 كەزەك جەڭىسكە جەتۋدەي ماقتانارلىق ناتيجەمەن اعا جۇلدەگەر بولىپ، اعا جۇلدەگەرلىكتى تابىسپەن قورعاپ، وتان مەن حالىققا داڭق اپەردىڭىزدەر. سىزدەر مىقتى قارسىلاستاردان تايسالماي، باتىلدىقپەن سايىسىپ، ونەگەلى ونەر كورسەتىپ، ورەلەرىڭىزدى كورسەتتىڭىزدەر. ءبىر كەزەك بۇرىن اعا جۇلدەگەرلىكتى تۇراقتاندىرعان جاعدايدا، سىزدەر ەڭ سوڭعى ءبىر مايدان جارىس بارىسىندا تيتتەي دە بولبىرلىق كورسەتپەي، قارسىلاستارىڭىزدى قۇرمەتتەپ، وزدەرىڭىزدى قۇرمەتتەپ، ءاربىر دوپتى قالت جىبەرمەي ۇرۋعا تاباندى بولىپ، وليمپيادا رۋحى مەن جۇڭحۋا دەنە تاربيە رۋحىن وتە جاقسى ايگىلەدىڭىزدەر. جۇڭگو ايەلدەر ۆولەيبول كومانداسى 5 - رەتكى دۇنيە جۇزىلىك ايەلدەر ۆولەيبول ساۋىتى جارىسىنىڭ اعا جۇلدەگەرى بولدى، 10 - رەت داڭقپەن دۇنيە جۇزىلىك ۆولەيبول ”ءۇش ۇلكەن جارىسىنىڭ“ اعا جۇلدەگەرى بولىپ، بۇكىل ەل حالقىنىڭ وتانشىلدىق قىزۋ ىنتاسىن قاۋلاتىپ، بۇكىل ەل حالقىنىڭ ۇلتتىق سەنىمى مەن ماقتانىش سەزىمىن نىعايتتى.

  شي جينپيڭ بىلاي دەپ اتاپ كورسەتتى: وسى رەتكى دۇنيە جۇزىلىك ايەلدەر ۆولەيبول ساۋىتى جارىسى كەزىندە، بۇكىل ەل حالقى سىزدەرگە توتەنشە نازار اۋداردى، ءار مايدان جارىستا سان ميلليونداعان ادام سىزدەرگە جىگەر بەردى. 38 جىلدىڭ الدىندا، جۇڭگو ايەلدەر ۆولەيبول كومانداسى تۇڭعىش رەت دۇنيە جۇزىلىك اعا جۇلدەگەر بولعان شاقتا بۇكىل ەلدىڭ بارلىق جەرىندە قۋانىش سەزىمى تاسقىنداپ، سان ميلليونداعان كورەرمەندەردىڭ كوزىنە ىستىق جاس تولعان ەدى. جۇڭگو ايەلدەر ۆولەيبول كومانداسى ”5 رەت ءۇرتىس اعا جۇلدەگەر“ بولىپ، ون مىڭداعان ادام اۋەجايدا ايەلدەر ۆولەيبول كومانداسىن قارسى الدى. قالىڭ حالىق بۇقاراسىنىڭ جۇڭگو ايەلدەر ۆولەيبول كومانداسىنا بولعان قۇشتارلىعى، تەك سىزدەردىڭ اعا جۇلدەگەرلىكتى جەڭىپ العاندىقتارىڭىز ءۇشىن عانا ەمەس، ونان دا ماڭىزدىسى، سىزدەردىڭ جارىس مايدانىندا وتاندى بارىنەن جوعارى قويۋ، ىنتىماقتاسا سەلبەسۋ، قايسارلىقپەن سايىسۋ، ماڭگىلىك جەڭىلمەۋ رۋحاني بەينەسىن ايگىلەگەندىكتەرىڭىز ءۇشىن ەدى. ايەلدەر ۆولەيبول رۋحى ءبىر ءداۋىردىڭ رۋحىنا ۋاكىلدىك ەتىپ، جۇڭحۋانىڭ كوركەيۋى ءۇشىن جان قيارلىقپەن سايىسۋداي ءداۋىردىڭ ەڭ كۇشتى اۋەنىن شارىقتاتتى. قاراپايىمدىلىقتان ۇلىلىق تۋادى. سىزدەر كۇن سايىن تاباندىلىقپەن جاتتىعۋ جاساپ، جارالانۋعا جانە اۋرۋعا قايسارلىقپەن ءتوزىپ، ساتسىزدىكتەرگە ءۇن - ءتۇنسىز توتەپ بەردىڭىزدەر، وتە - موتە، قۇلدىراۋ جاعدايى بولعان كەزدە دە ءبىر توپ ادام ءۇن - ءتۇنسىز قىزمەت ىستەپ، قارىمجىمەن ساناسىپ وتىرمادى. مىنە وسى ادامدار بولعاندىقتان عانا، جۇڭگو ايەلدەر ۆولەيبول كومانداسىنىڭ بۇگىنگى ناتيجەسى قولعا كەلدى.

  شي جينپيڭ بىلاي دەپ باسا دارىپتەدى: جاپپاي سوتسياليستىك وسىزاماندانعان قۇدىرەتتى ەل قۇرۋ ءار جاقتىڭ تۇگەلدەي قۇدىرەتتەنۋىن قاجەت ەتەدى. دەنە تاربيەدە قۇدىرەتتى ەل بولۋ نىساناسىن جۇزەگە اسىرۋ ءۇشىن، جاڭا داۋىردەگى ايەلدەر ۆولەيبول رۋحىن زور كۇشپەن ساۋلەلەندىرىپ، دەنە تاربيەلىك شىنىعۋدى حالىقتىڭ سالاماتتىلىعىمەن ۇشتاستىرىپ، جۇڭحۋا دەنە تاربيە رۋحىن اسقاقتاتۋدى مادەنيەت سەنىمىن بەكەمدەۋمەن ۇشتاستىرىپ، بۇكىل ەلدە ءتۇزىلىس پەن بازار مەحانيزمىن ۇشتاستىرۋعا بۇلجىماي تاباندى بولىپ، اۋەلگى ماقساتتى ۇمىتپاي، ەش بۇلجىماي، جاڭا داۋىردەگى ەلىمىز دەنە تاربيە ىستەرىنىڭ جاڭا جاعدايىن قۇلشىنا اشۋ كەرەك. جۇڭگو ايەلدەر ۆولەيبول كومانداسىنىڭ ۇزدىكسىز قايراتتانىپ، كۇش ۇستىنە كۇش قوسۋىن ءۇمىت ەتەمىن، سىزدەردىڭ توكيو وليمپياداسىندا تاڭداۋلى ناتيجەگە قول جەتكىزۋلەرىڭىزدى كۇتەمىن.

  2019 - جىلعى دۇنيە جۇزىلىك ايەلدەر ۆولەيبول ساۋىتى جارىسى 9 - ايدىڭ 14 - كۇنىنەن 29 - كۇنىنە دەيىن جاپونيادا وتكىزىلدى، جۇڭگو ايەلدەر ۆولەيبول كومانداسى ءۇرتىس 11 رەت جەڭىسكە جەتۋدەي تاڭداۋلى ناتيجەمەن دۇنيە جۇزىلىك ساۋىتى اعا جۇلدەگەرلىگىن تابىسپەن قورعادى. قابىلداۋدا بولعان ءارى باس شۋجيدىڭ ءسوزىن تىڭداعان جۇڭگو ايەلدەر ۆولەيبول كومانداسىنىڭ مۇشەلەرى، جاتتىقتىرۋشىلارى ايرىقشا جىگەرلەندى. كوپشىلىك مىنالاردى ءبىلدىردى: جاڭا جۇڭگو قۇرىلعاندىعىنىڭ 70 جىلدىعىن قۇتتىقتاپ وتىرعان ساتتە، باس شۋجيدىڭ قامقورلىق جاساۋى جۇڭگو ايەلدەر ۆولەيبول كومانداسى ءۇشىن زور شابىتتاندىرۋ بولدى. باس شۋجيدىڭ ىقىلاستى تاپسىرماسىن، ءسوزسىز، ەستە بەرىك ساقتاپ، داندايسىماي، ۇشقالاقتىققا سالىنباي، كۇش ۇستىنە كۇش قوسىپ، اسقاق كۇرەس جىگەرىن ساقتاپ، ۇزدىكسىز قايسارلىقپەن كۇرەس جاساپ، اناعۇرلىم تاڭداۋلى جاڭا ناتيجەلەر جاراتۋعا قۇلشىنامىز.

  ديڭ شۋەشياڭ، سۇن چۇنلان جانە مەملەكەتتىك دەنە تاربيە باس مەكەمەسىندەگى جاۋاپتى جولداستار كەزدەسۋگە قاتىناستى.

جاۋاپتى رەداكتور: نۇربولات قابىل