قاتىناس پەن ساياحاتتىڭ توعىسۋى شينجياڭنىڭ ساياحاتىن گۇلدەندىردى

قاتىناس پەن ساياحاتتىڭ توعىسۋى شينجياڭنىڭ ساياحاتىن گۇلدەندىردى

  تىلشىلەرىمىز لۋ فىڭباۋ، ما ينيڭ 9 - ايدىڭ 9 - كۇنى ۇرىمجىدەن حابارلايدى. ”مۋزيكالى تاس جولدا اۆتوكولىك قاتىناعاننان كەيىن، وسى تاس جولدا كۇنىنە 800دەن استام جەكەلىك ساياحات اۆتوكولىگى جۇرەتىن بولدى، ساياحاتشىلار كۇنىنە ورتا ەسەپپەن 3000 ادامنان اسادى“، - دەدى 9 - ايدىڭ 6 - كۇنى موري قازاق اۆتونوميالى اۋدانى قاتىناس - تاسىمال مەكەمەسىنىڭ باستىعى حان كايگاڭ تەلەفوندا تىلشىگە.

  مۋزيكالى تاس جول − موري بانشان ساياحات تاس جولىنىڭ ءبىر بولىگى، 8 - ايدىڭ ورتا شەنىندە سالىنىپ بولىپ اۆتوكولىك قاتىناعان، شينجياڭداعى تۇڭعىش مۋزيكالى تاس جول، تاس جولدىڭ بويىندا تاعى اۆتوكولىك تۇراعى، ۆاگوننان جاسالعان ايالداما، الەۋمەتتىك دارەتحانا سياقتى ساياحاتقا قىزمەت وتەۋ قۇرىلعىلارى بار. مۋزيكالى تاس جولدا اۆتوكولىك قاتىناي سالىسىمەن ”توراپ جۇلدىزى جولى“نا اينالدى.

  جۋىق جىلداردان بەرى، رايونىمىز ستەرەولى قاتىناس تورابىن قۇرۋعا كۇش سالىپ، ”قاتىناس + ساياحات“تىڭ ىشكەرىلەي توعىسۋىن جەدەل ىلگەرىلەتتى. بيىل اۆتونوميالى رايوندىق قاتىناس - تاسىمال مەڭگەرمەسى 800 ميلليون يۋان قارجى ءبولىپ، ”قاتىناس + ساياحات“تى توعىستىرا دامىتاتىن 6 ءىرى ينجەنەريانى اتقاردى، بۇل ادەتتەگى مەملەكەت تاس جولى، ولكە تاس جولى نەگىزگى لەنياسى قىزمەت وتەۋ رايونىنىڭ دارەجەسىن جوعارىلاتۋ، وزگەرتۋ، G217 لەنياسى مايتاۋ - كۇشار سارا ساياحات جولىن ءتۇيىندى تۇردە قالىپتاستىرۋ، جوعارى قارقىندى تاس جولدا جىلجىمالى اقى تولەۋدى تولىق قامتۋدى جۇزەگە اسىرۋ سياقتىلارعا سايادى.

  ءتىلشىنىڭ ۇعىسۋىنشا، 7 - ايدىڭ 8 - كۇنى G217 لەنياسى مايتاۋ - كۇشار جولى بولەگىنىڭ قىزمەت وتەۋ ساپاسىن جوعارىلاتۋ ينجەنەرياسى بىتكەننەن بەرى، مايتاۋ - كۇشار تاس جولى اناعۇرلىم ىركىلىسسىزدەنىپ عانا قالماستان، ءوز اۆتوكولىگىمەن ساياحاتتاۋعا اناعۇرلىم قولايلىلىق اكەلدى، وسى جولدا قاتىنايتىن اۆتوكولىكتەر بارعان سايىن كوبەيىپ، كۇنىنە ورتا ەسەپپەن 10 مىڭعا جەتتى.

  اۆتونوميالى رايوندىق قاتىناس - تاسىمال مەڭگەرمەسىنىڭ ورىنباسار باستىعى لي جىنۇڭ مىنانى ءبىلدىردى: مۇنان كەيىن قاتىناس - تاسىمال مەڭگەرمەسىنىڭ قىزمەت ءتۇيىنى ”قۇرىلىستى نەگىز ەتۋ“دەن قۇرىلىس پەن قىزمەت وتەۋگە تەڭ ءمان بەرۋ“گە قاراي ويىسىپ، جول نىسانى قۇرىلىسى، جوعارى قارقىندى تاس جولدا ETC (اۆتوكولىكتى توقتاتپاي ەلەكتروندى اقى تولەۋ جۇيەسى)دان پايدالانۋ، تاس جول قىزمەت وتەۋ رايونىنىڭ دارەجەسىن جوعارىلاتۋ سياقتى جاقتاردا قاتىناس پەن ساياحاتتىڭ توعىسپالى دامۋىن جەدەلدەتەدى.

  حالىقتىق اۆياتسيا جاعىندا، ءارقايسى ءىرى اۆياتسيا سەرىكتەستىكتەرى كوپ ءتۇرلى ساياسات اتقارىپ، ساياحاتشىلاردى شينجياڭدى ۇشاقپەن ساياحاتتاۋعا باۋرايدى. ءارقايسى ءىرى اۆياتسيا سەرىكتەستىكتەرى ءبىر جاعىنان، ۇشاق ەنگىزۋ قارقىنىن تەزدەتىپ، شينجياڭ وڭىرىندەگى تاسىمال، جەتكىزۋ تەبىنىن كۇشەيتتى؛ ەندى ءبىر جاعىنان، شينجياڭ كولەمىندە اينالىپ ۇشۋ، ارالاپ ۇشۋ لەنياسىن اشىپ، شينجياڭنىڭ ساياحات قالالارىن تۇتاستىرىپ، شينجياڭنىڭ ساياحات كاسىبىنىڭ دامۋىنا كۇش ۇستەدى. بيىل الدىڭعى 8 ايدا ءۇرىمجى ديوپۋ حالىقارالىق اۋەجايىنىڭ جولاۋشى قابىلداۋ - جونەلتۋ مولشەرى 16 ميلليون 286 مىڭ 100 ادام - رەتكە جەتىپ، سايكەس مەزگىلدەگىدەن %5.2 ارتتى.

  جۋىق جىلداردان بەرى، شينجياڭ تەمىر جولى قارقىنىن تەزدەتىپ، ۆاگوندارىن جاڭالاپ، پويەزدىڭ جۇمساق - قاتتى بولشەكتەرىنىڭ دارەجەسىن جوعارىلاتتى، پويەزعا وتىرىپ ساياحاتتاۋ بارعان سايىن جانعا جايلى بولدى. بيىل الدىڭعى 8 ايدا شينجياڭ تەمىر جولىنىڭ جونەلتكەن جولاۋشىلارى 29 ميلليون 780 مىڭ ادام - رەتتەن استى.

  ”قاتىناس + ساياحات“تىڭ ىشكەرىلەي توعىسۋى رايونىمىز ساياحات كاسىبىنىڭ تەز قارقىنمەن دامۋىن جەبەدى. بيىل الدىڭعى جارتى جىلدا شينجياڭنىڭ ساياحات كاسىبى جيىنى 75 ميلليون 893 مىڭ 500 ادام - رەت ساياحاتشى قابىلدادى، بۇل سايكەس مەزگىلدەگىدەن %46 ارتتى.

جاۋاپتى رەداكتور: ريزا حاميت