شي جينپيڭ فيليپپيننىڭ زۇڭتۇڭى دۋتەرتپەن كەزدەستى

شي جينپيڭ فيليپپيننىڭ زۇڭتۇڭى دۋتەرتپەن كەزدەستى

  شينحۋا اگەنتتىگىنىڭ 8 - ايدىڭ 29 - كۇنى بەيجيڭنەن بەرگەن حابارى (ءتىلشى ليۋ حۋا). مەملەكەت ءتوراعاسى شي جينپيڭ 8 - ايدىڭ 29 - كۇنى كەشتە دياۋيۇيتاي مەملەكەتتىك قوناق ۇيىندە فيليپپيننىڭ زۇڭتۇڭى دۋتەرتپەن كەزدەستى.

  شي جينپيڭ دۋتەرت زۇڭتۇڭنىڭ ساپارلاي كەلگەندىگىن ءارى 2019 - جىلعى حالىقارالىق باسكەتبول بىرلەستىگىنىڭ باسكەتبول دۇنيە ءجۇزى ساۋىتى جارىسىن كورۋىن قارسى الاتىندىعىن ءبىلدىردى. شي جينپيڭ مىنالاردى ءبىلدىردى: ءسىز بيلىك جۇرگىزگەن 3 جىلدان بەرى، ەكى جاقتىڭ بىرگە قۇلشىنۋىندا، جۇڭگو - فيليپپين قارىم - قاتىناسى راقايلاسۋدى، بەكەمدەۋدى، ءوسىرۋدى ءساتتى جۇزەگە اسىرىپ، ۇزدىكسىز تىڭعىلىقتى جەتىستىكتەرگە قول جەتكىزدى. كەزەكتە حالىقارالىق جانە وڭىرلىك جاعدايدا تەرەڭ دە كۇردەلى وزگەرىس تۋىلۋدا، ايتسە دە بەيبىتشىلىك، دامۋ، سەلبەستىك، تەڭ يگىلىككە كەنەلۋ ءالى دە بوگەۋ بەرمەس داۋىرلىك اعىم. مەن سىزبەن بىرگە ۋاقىت پەن جاعدايدى ستراتەگيالىق تۇرعىدان جانە ۇزاق بولاشاقتىق تۇرعىدان ويداعىداي يگەرىپ، جۇڭگو - فيليپپين قارىم - قاتىناسىنىڭ دامۋىنا ويداعىداي جەتەكشىلىك ەتۋدى قالايمىن، بۇل ەكى ەلگە جانە ەكى ەل حالقىنا ءتيىمدى بولۋمەن قاتار، وڭىرلىك بەيبىتشىلىك پەن ورنىقتىلىققا دا وڭ ەنەرگيا ۇستەيدى.

  شي جينپيڭ بىلاي دەپ باسا دارىپتەدى: ”ءبىر بەلدەۋ، ءبىر جول“ باستاماسىن فيليپپين جاقتىڭ ”قاۋىرت قۇرۋ، ەرەكشە قۇرۋ“ جوباسىمەن ۇشتاستىرۋدى ۇزدىكسىز ىلگەرىلەتىپ، نەگىزدىك قۇرىلعى قۇرىلىسى، ونەركاسىپ باقشا رايونى، تەلەگراف، ەنەرگيا سياقتى سالالارداعى كەلەلى سەلبەستىك نىساندارىن ويداعىداي اتقارۋ كەرەك. جۇڭگو جاق فيليپپيننىڭ اناعۇرلىم كوپ ساپالى جەمىستەرىن جانە اۋىل شارۋاشىلىق ونىمدەرىن يمپورت ەتۋدى، مامانداردى فيليپپينگە جىبەرىپ، اۋىل شارۋاشىلىعى، بالىق شارۋاشىلىعى تەحنيكالارىن ۇيرەتۋدى قالايدى. ادامدىق ۇقىق سياقتى ماسەلەلەردە، جۇڭگو جاق فيليپپين جاقتىڭ مەملەكەتتىڭ يەلىك ۇقىعىن قورعاۋداعى، سىرتتىڭ كيلىگۋىنە قارسى تۇرۋداعى قۇلشىنىستارىن ۇزدىكسىز قولدايدى.

  شي جينپيڭ بىلاي دەپ اتاپ كورسەتتى: جۇڭگو - فيليپپين باستان - اياق نانحاي تەڭىزى ماسەلەسى جونىندە ءونىمدى بايلانىستى ساقتاپ كەلەدى. ەكى جاق تالاس - تارتىستى قويا تۇرىپ، سىرتتىڭ كەدەرگىسىن ارىلتىپ، زەيىن - زەردەنى شوعىرلاندىرا سەلبەستىك جاساسىپ، ناقتى ءىس ىستەپ، دامۋعا تالپىنۋ كەرەك. تەك ەكى جاق وسى ماسەلەنى ۇيلەسىمدى ءبىر جايلى ەتسە بولعانى، جۇڭگو - فيليپپين قارىم - قاتىناسىنىڭ بەينەسى جاقسارادى، نەگىزى ورنىعادى، ءوڭىردىڭ بەيبىتشىلىگى مەن ورنىقتىلىعى دا ماڭىزدى كەپىلدىككە يە بولادى. ەكى جاقتىڭ تەڭىزدەگى مۇناي - تابيعي گازدى بىرگە اشۋ جاعىندا ءتىپتى دە زور قادام تاستاۋىنا بولادى. ”نانحاي تەڭىزى ارەكەت ولشەمى“ − نانحاي ەرەجەسىن جاساپ، ءتارتىبىن ورناتۋداعى باستاما، ەكى جاق ”ولشەم“گە ەرتەرەك قول قويۋدى ىلگەرىلەتۋگە كۇش سالىپ، جۇڭگو - فيليپپيننىڭ وڭىرلىك باياندى تىنىشتىقتى بىرگە قورعاۋداعى بەرىك تۇرعىسى مەن بەلسەندى بەينەسىن ايگىلەۋ كەرەك.

  دۋتەرت جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قۇتتىقتادى، جۇڭگونىڭ تابىستى دامۋىنىڭ تاجىريبەلەرى فيليپپيننىڭ ۇيرەنۋىنە، ۇلگى الۋىنا تاتيتىندىعىن ءبىلدىردى. ول مىنالاردى ءبىلدىردى: مەن ءتوراعا شي جينپيڭمەن ارامىزداعى جاقىن دوستىقتى قاستەرلەيمىن. جۇڭگو فيليپپين جونىنەن ايرىقشا ماڭىزدى، فيليپپين - جۇڭگو قارىم - قاتىناسى عاسىرلىق ۇلى جوبا. مەن ءتوراعا شي جينپيڭمەن ۇنەمى كەزدەسىپ، بايلانىستى كۇشەيتىپ، ەكى ەلدىڭ جان - جاقتى ستراتەگيالىق سەلبەستىك قارىم - قاتىناسىنىڭ ۇزدىكسىز تەبىندى دامۋىن بىرگە ىلگەرىلەتىپ، ءوزارا تيىمدىلىك جاساپ، تەڭ يگىلىكتەنۋدى جۇزەگە اسىرۋدى قالايمىن. فيليپپين جاق جۇڭگو جاقتىڭ فيليپپين ەكونوميكاسىنىڭ دامۋىن جانە نەگىزدىك قۇرىلعى قۇرىلىسىن ۇزدىكسىز دەمەۋىن ءۇمىت ەتەدى، جۇڭگو جاقتىڭ فيليپپيننىڭ ادامدىق ۇقىق ىستەرى، جەر سىلكىنىسى اپاتىنا ۇشىراعان وڭىرلەردى قايتا قۇرۋ، لاڭكەستىككە قارسى تۇرۋ، ەسىرتكىگە تيىم سالۋ سياقتى جاقتاردا قولداۋ كورسەتكەندىگىنە العىس ايتادى. فاكت جۇڭگونىڭ فيليپپيننىڭ ناعىز دوسى ەكەندىگىن دالەلدەدى. شياڭگاڭ ماسەلەسىندە، فيليپپين جۇڭگونىڭ زاڭىنا، سونداي - اق زاڭمەن جونگە سالۋدى زاڭ بويىنشا قورعاۋ ۇقىعىنا تولىق قۇرمەت ەتەدى.

  دۋتەرت مىنانى ءبىلدىردى: مەن نانحاي تالاس - تارتىسىن قارسىلاسۋ تاسىلىمەن ەمەس، قايتا سەلبەستىك جاساسۋ ارقىلى بەيبىت جولمەن ءبىر جايلى ەتۋدى دارىپتەيمىن، وڭىرلىك دوستىقتى، سەلبەستىكتى، بەيبىت ورنىقتى كەلەلى جاعدايدى قورعاۋ وسى وڭىردەگى تاراپتاردىڭ مۇددەسىنە ۇيلەسەدى. فيليپپين جاق جۇڭگو جاقپەن تەڭىزدەگى مۇناي - تابيعي گازدى بىرگە اشۋدى جەدەل ىلگەرىلەتۋدى قالايدى. فيليپپين شىعىس وڭتۇستىك ازيا ەلدەرى وداعى − جۇڭگو قارىم - قاتىناسىن قازىرگى سايكەستىرۋشى ەل رەتىندە، تاراپتاردىڭ ”نانحاي تەڭىزى ارەكەت ولشەمى“نە ەرتەرەك قول قويۋىن ىلگەرىلەتۋگە كۇش سالادى.

  كەزدەسۋدەن كەيىن ەكى ەلدىڭ مەملەكەت باسشىلارى ەكى جاقتى سەلبەستىك حۇجاتتارىن اۋىستىرۋ سالتىنا بىرگە كۋا بولدى. ەكى جاق مۇناي - تابيعي گاز سەلبەستىگى ۇكىمەت ارا بىرلەسكەن جەتەكشىلىك كوميتەتىن جانە كاسىپورىندار ارا قىزمەت گرۋپپاسىن قۇرىپ، بىرگە اشۋدىڭ ماندىك ىلگەرىلەۋشىلىككە قول جەتكىزۋىن جەدەلدەتەتىندىكتەرىن دە جاريالادى.

  ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.

جاۋاپتى رەداكتور: ريزا حاميت