شي جينپيڭ كولۋمبيانىڭ زۇڭتۇڭى دۋكەمەن كەڭەس وتكىزدى

شي جينپيڭ كولۋمبيانىڭ زۇڭتۇڭى دۋكەمەن كەڭەس وتكىزدى

  شينحۋا اگەنتتىگىنىڭ 7 - ايدىڭ 31 - كۇنى بەيجيڭنەن بەرگەن حابارى (ءتىلشى باي جيە). مەملەكەت ءتوراعاسى شي جينپيڭ 7 - ايدىڭ 31 - كۇنى حالىق سارايىندا كولۋمبيانىڭ زۇڭتۇڭى دۋكەمەن كەڭەس وتكىزدى.

  شي جينپيڭ بىلاي دەپ اتاپ كورسەتتى: 40 جىلدىڭ الدىندا، كولۋمبيا ۇكىمەتى اۋقىمدى باعامداپ، جۇڭگومەن ديپلوماتيالىق قارىم - قاتىناس ورناتۋ ۇيعارىمىن جاسادى، زۇڭتۇڭ مىرزانىڭ اكەسى سول كەزدە ۇكىمەتتىڭ مۇشەسى بولاتىن، ول بۇل شەشىمدى باتىل قولداپ، ەكى ەل قارىم - قاتىناسىنىڭ باستالعان ساتىنە كۋا بولدى. بۇگىن جۇڭگو مەن كولۋمبيا قارىم - قاتىناسىن دامىتۋدىڭ ۇتىلامالى تاياقشاسى ءسىز بەن مەنىڭ قولىما جەتتى. بۇل رەتكى ءسىزدىڭ جۇڭگوعا ارناۋلى ساپارىڭىز ءسىزدىڭ ءىس جۇزىندىك ارەكەتىڭىز ارقىلى جۇڭگو مەن كولۋمبيانىڭ ءداستۇرلى دوستىعى مەن ءوزارا سەلبەستىگىن تەرەڭدەتۋگە بەلسەنە كۇش سالعانىڭىزدى ايگىلەيدى، مەن مۇنى ايرىقشا القايمىن. جۇڭگو جاق كولۋمبيا جاقپەن بىرگە ديپلوماتيالىق قارىم - قاتىناس ورناتقاندىعىنىڭ 40 جىلدىعى سىندى وسى ماڭىزدى ءتۇيىندى ارقاۋ ەتىپ، بولاشاق دامۋ جوباسىن بىرگە جاساپ، جۇڭگو مەن كولۋمبيا قارىم - قاتىناسىنىڭ تىڭ ساتىعا كوتەرىلۋىن ىلگەرىلەتۋدى قالايدى.

  شي جينپيڭ بىلاي دەپ باسا دارىپتەدى: جۇڭگو مەن كولۋمبيا جوعارى جىكتەگىلەردىڭ بارىس - كەلىسىن جيىلەتىپ، ەل باسقارۋداعى تاجىريبەلەردى اۋىستىرىپ، ساياسي جاقتاعى ءوزارا سەنىمدىلىكتى تەرەڭدەتىپ، ءوزارا تۇسىنىستىكتى، ءوزارا قولداۋدى ارتتىرۋ كەرەك. جۇڭگو جاق كولۋمبيانىڭ بەيبىتشىلىك اياق الىسىن ىلگەرىلەتۋىنە جانە قاقتىعىستان كەيىنگى قايتا قۇرۋىنا ۇزدىكسىز قولداۋ كورسەتەدى. ەكى جاقتىڭ ناقتى سەلبەستىگىنىڭ كومەسكى كۇشىن تەرەڭ اشىپ، ءداستۇرلى سالاداعى سەلبەستىكتى بەكەمدەپ، جاڭا سالاداعى سەلبەستىككە ءورىس اشۋ كەرەك. جۇڭگو جاق كولۋمبيا جاقتىڭ ”ءبىر بەلدەۋ، ءبىر جول“دى بىرگە قۇرۋعا ات سالىسىپ، ەكى ەلدىڭ دامۋ ستراتەگياسىنىڭ ۇشتاسۋىن جۇزەگە اسىرۋدى قارسى الادى. ءادىليا، گۋمانيتارلىق سياقتى سالالارداعى اۋىس - كۇيىستى، سەلبەستىكتى ىلگەرىلەتىپ، حالىق رايىن جاقىنداستىرىپ، دوستىقتىڭ نەگىزىن بەكەمدەۋ كەرەك. بىرلەسكەن مەملەكەتتەر ۇيىمىن وزەك ەتە قازىرگى اتقارىپ وتىرعان حالىقارالىق جۇيەنى بىرگە قورعاپ، الەمدىك جونگە سالۋ جۇيەسى وزگەرىسىن ىلگەرىلەتىپ، ەكونوميكانىڭ جاھاندانۋىن اناعۇرلىم اشىق، سيىسىمدى، جالپىعا ءتيىمدى، تەپە - تەڭ، بىرگە يگىلىككە كەنەلەتىن باعىتقا قاراي دامىتۋدى ىلگەرىلەتۋ كەرەك.

  شي جينپيڭ مىنانى اتاپ كورسەتتى: لاتىن امەريكاسى مەن كارايب ەلدەرى زور دامۋ كومەسكى كۇشىنە جانە كەڭ بولاشاققا يە، حالىقارالىق جۇيەدە نەمقۇرايدى قاراۋعا بولمايتىن ماڭىزدى كۇش. جۇڭگو جاق لاتىن امەريكاسى حالقىنىڭ دامۋ جولىن ءوز الدىنا تاڭداۋ ۇقىعىنا باستان - اياق قۇرمەت ەتىپ كەلەدى، لاتىن امەريكاسىنىڭ ءبىر تۇلعالانۋ اياق الىسىن جەدەلدەتىپ، كەڭەسۋ، اق−ىلداسۋ ارقىلى ۆەنەسۋەلا قاتارلى وڭىرلىك ماسەلەلەردى ۇيلەسىمدى ءبىر جايلى ەتىپ، ءوڭىردىڭ بەيبىتشىلىگى مەن ورنىقتىلىعىن قورعاۋىنا قولداۋ كورسەتەدى. جۇڭگو جاق تاتۋلاستىرۋ، كەڭەسۋدى جەبەۋ رولىن ۇزدىكسىز ساۋلەلەندىرۋدى قالايدى، كولۋمبيا جاقپەن بايلانىستى ساقتاۋدى قالايدى. جۇڭگو مەن لاتىن امەريكاسىنىڭ سەلبەستىگى ماندىك جاقتان وڭتۇستىك پەن وڭتۇستىك سەلبەستىك كاتەگورياسىنا جاتادى، ءوزارا قۇرمەت ەتۋ، تەڭ، ءوزارا پايدا جەتكىزۋ، سەلبەسىپ ورتاق يگىلىككە كەنەلۋ، اشىق، سيىسىمدى بولۋ پرينسيبىن تياناق ەتەدى. جۇڭگو جاق لاتىن امەريكاسى جاقپەن جۇڭگو - لاتىن امەريكاسى تالقى مىنبەرى مەحانيزم قۇرىلىسىن ىلگەرىلەتىپ، جۇڭگو - لاتىن امەريكاسى تاعدىرلاس ورتاق تۇلعاسىن بىرگە قۇرۋدى قالايدى.

  دۋكە مىنالاردى ءبىلدىردى: جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قىزۋ قۇتتىقتايمىن. مەن ءتوراعا شي جينپيڭنىڭ كورنەكتى باسشىلىق قابىلەتى مەن ماڭىزدى حالىقارالىق ىقپالىنا ايرىقشا سۇيىنەمىن، جۇڭگونىڭ ەل باسقارۋ تاجىريبەسىن ۇيرەنۋدى ءۇمىت ەتەمىن. كولۋمبيا - جۇڭگو ەكى ەل جاقىن كۇندەردە ديپلوماتيالىق قارىم - قاتىناس ورناتقاندىعىنىڭ 40 جىلدىعىن قارسى الادى، مەن وسى رەتكى مەملەكەتتىك ساپارىم ارقىلى ەكى ەل قارىم - قاتىناسىنىڭ ونان ارى دامۋىن ىلگەرىلەتىپ، ەكى ەلدىڭ ەكونوميكا - ساۋدا، ەنەرگيا، نەگىزدىك قۇرىلعى، بايلانىستىرۋ - تۇتاستىرۋ، سيفرلى ەكونوميكا، جاسامپازدىق كاسىپ سياقتى سالالارداعى سەلبەستىگىن جەبەۋدى ءۇمىت ەتەمىن، جۇڭگو كاسىپورىندارىنىڭ كولۋمبياعا بارىپ قارجى قوسۋىن قارسى الامىن. جۇڭگو مەن كولۋمبيانىڭ ءاربىر ەكى جاقتى سەلبەستىك نىسانىنىڭ تۇگەلدەي كولۋمبيانىڭ بەيبىتشىلىك اياق الىسىن ىلگەرىلەتۋىن قولدايتىندىعىنا، ءبارىنىڭ كولۋمبيانىڭ ەكونوميكالىق، قوعامدىق دامۋىنا دەم بەرەتىندىگىنە سەنەمىن. ءتوراعا شي جينپيڭ ورتاعا قويعان ”ءبىر بەلدەۋ، ءبىر جول“ باستاماسى دۇنيە ءجۇزىنىڭ بايلانىسۋىن، تۇتاسۋىن جانە حالىقارالىق سەلبەستىكتى جەبەۋدە كەلەلى مانگە يە، كولۋمبيا جاق بىرگە قۇرۋعا بەلسەنە ات سالىسۋدى قالايدى، ەكى ەلدىڭ دامۋ ستراتەگياسىن ۇشتاستىرۋ ارقىلى ەكى ەلدىڭ بولاشاق سەلبەستىگىنە اناعۇرلىم ويداعىداي جەتەكشىلىك ەتۋدى كۇتەمىن. كولۋمبيا جاق جۇڭگو جاقتىڭ حالىقارالىق جانە وڭىرلىك ىستەردە ورەلى رولىن ۇزدىكسىز ساۋلەلەندىرۋىنە باسا ءمان بەرەدى ءارى ءۇمىت ەتەدى. جۇڭگو جاقپەن قارىم - قاتىناستى ساقتاۋدى قالايدى. كولۋمبيا جاق لاتىن امەريكاسى مەن جۇڭگونىڭ قارىم - قاتىناسىن ىلگەرىلەتۋگە بەلسەندى قۇلشىنىس جاساۋدى قالايدى.

  كەڭەستەن كەيىن، ەكى ەلدىڭ مەملەكەت باسشىلارى كوپ ءتۇرلى ەكى جاقتى سەلبەستىك حۇجاتتارعا قول قويۋ سالتىنا كۋا بولدى.

  كەڭەستەن ىلگەرى، شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا دۋكەنى قارسى الۋ سالتىن وتكىزدى. ياڭ جيەچى، جاڭ چۇنشيان، ۋاڭ يۇڭچيڭ، حى ليفىڭ قاتارلىلار قاتىناستى.

جاۋاپتى رەداكتور: ريزا حاميت