شي جينپيڭ 7 - كەزەكتى كوپچى حالىقارالىق قۇمدىق تالقى مىنبەرىنە قۇتتىقتاۋ حاتىن جولدادى

  شينحۋا اگەنتتىگىنىڭ 7 - ايدىڭ 27 - كۇنى بەيجيڭنەن بەرگەن حابارى. 7 - كەزەكتى كوپچى حالىقارالىق قۇمدىق تالقى مىنبەرى 7 - ايدىڭ 27 - كۇنى ىشكى موڭعۇل اۆتونوميالى رايونىنىڭ وردوس قالاسىندا وتكىزىلدى، مەملەكەت ءتوراعاسى شي جينپيڭ قۇتتىقتاۋ حاتىن جولدادى.

  شي جينپيڭ مىنانى اتاپ كورسەتتى: ادامزاتتا ءبىر عانا جەر شارى مەكەن بار. قۇمايتتانۋدان ساقتانۋ جانە ونى جونگە سالۋ − ادامزاتتىڭ توقتاۋسىز دامۋىنا ساياتىن ۇلى ءىس. حالىقارالىق قوعام سەلبەسە قۇلشىنىپ، قۇمايتتانۋدان ساقتانۋ، قۇمايتتانۋدى جونگە سالۋ حالىقارالىق سەلبەستىگىن كۇشەيتىپ، بۇكىل جەر شارى ورتاسىن جونگە سالۋدى ىلگەرىلەتىپ، 2030 - جىلعى باياندى دامۋ كەڭەستىك ءتارتىبىن جاپپاي تياناقتاندىرىپ، تابيعاتقا جاراسىمدىلىق پەن كورىك سيلاپ، حالىقتىڭ باقىتى مەن اماندىعىن كوزدەۋ كەرەك.

  شي جينپيڭ مىنانى باسا دارىپتەدى: جۇڭگو ەكولوگيالىق وركەنيەت قۇرىلىسىنا ايرىقشا ءمان بەرىپ، قۇمايتتانۋدان ساقتانۋدا جانە ونى جونگە سالۋدا كورنەكتى تابىسقا قول جەتكىزدى. كوپچى قۇمدىعىن تىزگىندەۋ حالىقارالىق قوعامدى قورشاعان ورتا ەكولوگياسىن جونگە سالۋدا، 2030 - جىلعى كەڭەستىك ءتارتىپتى تياناقتاندىرۋدا جۇڭگو تاجىريبەسىمەن قامدادى. جۇڭگو ”ءبىر بەلدەۋ، ءبىر جول“ حالىقارالىق سەلبەستىگىن 2030 - جىلعى كەڭەستىك ءتارتىپتىڭ تياناقتانۋىمەن ىشكەرىلەي ۇشتاسۋىن بەلسەنە ىلگەرىلەتتى. بولاشاققا بەت العاندا، جۇڭگو ءارقايسى جاقپەن بىرگە جاسىل دامۋ جولىمەن جۇرۋدەن جازباي، ەكولوگيالىق وركەنيەت نەگىزىن بىرگە قالاپ، بۇكىل جەر شارىنىڭ قورشاعان ورتاسىن جونگە سالۋدى، قورعاۋدى سەلبەسە ىلگەرىلەتىپ، كورىكتى، تازا دۇنيە ءجۇزىن قۇرۋعا بەلسەنە ۇلەس قوسۋدى قالايدى.

جاۋاپتى رەداكتور: نۇربولات قابىل