”كەشكى ەكونوميكا“ تۇتاس وڭىرلىك ساياحاتتى ءتىپتى دە ارلەندىردى

ءتىلشىمىز رىن جياڭ

  كەشكى بازاردا شامدار جايناپ، تاعامداردىڭ ءيىسى مۇرىن جارادى، ساياحاتشىلارعا كونسەرت نومىرلەرىن كورسەتۋ الاڭىندا ءان اۋەلەپ، بيشىلەر بۇرالا بيگە باستى، كەشكى كورىنىس ءوڭىرى كوزتارتا قۇلپىرىپ، دۋمانعا بولەندى... جاز كىرگەلى شينجياڭنىڭ جەر - جەرىندەگى كەشكى بازار، كەشكى ساياحاتتىق كونسەرت نومىرلەرىن كورسەتۋ قيمىلدارى، كەشكى ساياحات كورىنىس ءوڭىرى نىساندارى سياقتىلار بىرتىندەپ كوبەيىپ، تۇتاس وڭىرلىك ساياحاتتىڭ ”تۇتاس كۇندىك ساياحات“ كوزقاراسىن تولىق ايگىلەدى.

  ساياحات ۋاقىتى ءونىمدى ۇزارىپ، ساياحات ونىمدەرىمەن قامداۋ ارتىپ، ”كەشكى ەكونوميكا“ شينجياڭنىڭ كەشىن ءتىپتى دە دۋمانداتا ءتۇستى، ساياحات ونىمدەرىن ءتىپتى دە بايتتى.

كەشكى بازار جالىنداپ

”كەشكى ەكونوميكا“ نىڭ كورىگىن باستى

  6 - ايدىڭ 29 - كۇنى كەشكى ساعات 10دا ىمىرت ۇيىرىلگەن شاق، ىستىق تا قايتا باستادى. قۇمىل قالاسى يجوۋ رايونىنداعى 1 - شىلدە كەشكى بازارى دۋمانعا بولەندى. تاكسي شوفەرى چىن رۇڭجۇن كەشكى بازارعا 4 - 5 رەت ادام تاسىدى، بارلىعى ”قۇمىلعا ساياحاتتاپ كەلگەن ساياحاتشىلار“ دەدى ول. جاز كەشىندە كەشكى بازارعا كەلەتىن ساياحاتشىلار ونىڭ نەگىزگى قاريدار قاينارى بولدى.

  كەشكى بازاردا شىراقتار جايناپ، قوناقتار قايشالىسادى. كاۋاپ، جياۋماجي، حۋاڭميان ... جەرگىلىكتى تاعامداردىڭ ءتۇرى دە، ءتۇسى دە مول، مالا شياۋلۇڭشيا، باۋچاۋ تيانلو، مالاتاڭ ... سىرت جەرلەردىڭ تاعامدارىنىڭ ءيىسى مۇرىن جارىپ، يجوۋ رايونىنداعى 3 كەشكى بازاردا ءار كۇنى كەشتە ادامدار ءيىن تىرەسەدى. ”ءبىر جەرگە بارا قالساق بولعانى كەشكى بازارىن ارالاپ، ءدامدى تاعامداردان ءدام تاتىپ، جەرگىلىكتى ورىننىڭ سالت - ساناسىن سەزىنەمىز“، - دەدى ىشكى موڭعۇلدان كەلگەن ساياحاتشى زوۋ حۋا كۇلىمدەي سويلەپ.

  بۇگىنگى كۇندە كەشكى ءومىردىڭ ماڭىزدى فورماسى رەتىندە، شينجياڭنىڭ جەر - جەرىندە كەشكى بازار كوپتەپ اشىلدى: ءۇرىمجى، سانجى، شاۋەشەك... اسىرەسە، حوتان، قاشقار سىندى جەرلەردەگى كەشكى بازار ءتىپتى دۋمانداي ءتۇستى، مۇندا ەڭ تانىمالى حوتاننىڭ كەشكى بازارى. قازىر حوتان كونە كەشكى بازارى ءالى بۇرىنعىداي جالىنداپ تۇر، حوتان كەشكى بازارى (حۋانحۋ تارماق دۇكەنى)دا اشىلىپ، كۇنىنە ەڭ كوپ بولعاندا 10 مىڭنان استام ادام - رەت قوناق قابىلداپ، جەرگىلىكتى ورىننىڭ ءبىر تانىسقىسىنا اينالدى.

  كەشكى بازار ساياحاتشىلاردى باۋرادى، اۋەلى، جەرگىلىكتى ادامداردىڭ سەرۋەندەپ، سالقىندايتىن تاماشا ورنىنا اينالدى. دۋماندى كەشكى بازار ”كەشكى ەكونوميكا“عا تىكەلەي تۇرتكى بولدى. كاۋاپ جەي وتىرىپ، سىرا ءىشۋ شينجياڭنىڭ جەر - جەرىندەگى كەشكى بازاردىڭ ايقىن بەلگىسى. شيحۋ سىراسىنىڭ ساتىلىمى 8 - ايدا مولشەرمەن بىلتىر تۇتاس جىلداعى 400 مىڭ توننادان اسىپ كەتۋى مۇمكىن. بيىل تۇتاس جىلداعى ساتىلىمىن 500 مىڭ توننادان اسىرۋدان ءۇمىت بار، مۇندا كەشكى بازاردىڭ ۇلەسى زور.

  6 - ايدىڭ سوڭىندا اشىلعان قارامايلى قالاسىنداعى حۇڭچىڭ يحاۋفاڭ كەشكى بازارى ءبىر اپتانىڭ ىشىندە ساۋداگەر شاقىرىپ، ساۋدا باستاعان العاشقى 3 كۇندەگى قوناق 30 مىڭ ادام - رەتكە جەتىپ، قازىردە ءار كۇنى كەشتە 10 مىڭ ادام - رەتتەن تۇسپەي تۇر.

كونسەرت نومىرلەرى دۋمانداتقان

كەشكى ساحنا كوپشىلىكتى باۋرادى

  قۋالاما شىراق ساۋلەسى قارا ءتۇندى ءتىلىپ ءوتىپ، بۇيرات - بۇيرات قۇم توبەشىكتەرىنە ءتۇستى، كەرۋەن، ساياحاتشىلار قۇم توبەسىندە ماڭ - ماڭ باسىپ كەتىپ بارادى، تابيعي كورىنىستە ورىندالعان ”تۇنگى كروران“ قۇمتاع قۇمدىعىندا شىمىلدىعىن اشتى. اي نۇرى، جۇلدىزدى اسپان، قۇم توبەشىكتەرى، لاگەر، ءان - ءبي توعىسىپ، ساياحاتشىلاردى وزگەشە سەزىمگە بولەدى.

  بۇگىنگى كۇندە، شينجياڭنىڭ كوپتەگەن جەرلەرىندە كەشتە ورىندالاتىن كولەمدى ساياحاتتىق كونسەرت قيمىلدارى دابىرالى جۇرىلۋدە، ”باتىس وڭىرگە ورالۋ“، ”قاناس سالتاناتى“، ”شىعىسقا ورالۋ. ەلەس“، ”جىبەك جولى اجارى“ سياقتى ويىن نومىرلەرى كورەرمەندەرگە دىبىس، جارىق، ەلەكتر، 3D تەحنيكاسى جانە ءان - بيمەن قابىسقان ورتادا شينجياڭنىڭ ءساندى كەلبەتىن سەزىندىردى، بۇلاردا شينجياڭنىڭ ەرەكشە ساياحات ونىمىنە اينالدى.

  شينجياڭ تەاترحاناسىنىڭ ”باتىس وڭىرگە ورالۋ“ كونسەرتى 2015 - جىلى رەسمي قويىلا باستاعاننان بەرى، 1100 رەتكە جۋىق قويىلىپ، جىلىنا ورتا ەسەپپەن 300 مىڭ ادام - رەت كورەرمەن قابىلدادى. شينجياڭنىڭ ساياحات كاسىبىنىڭ تەز قارقىنمەن دامۋىنا ىلەسە، قابىلدانعان ساياحاتشى سانى قاۋىرت ارتىپ، ”باتىس وڭىرگە ورالۋ“ دى تاماشالاعان كورەرمەندەر دە جەدەل ارتتى. ”ءبىز ءار كۇنى كەشتە ءبىر كەزەك كونسەرت ورنالاستىرامىز، ەگەر ساياحاتشى ءبىرشاما كوپ بولسا، تاعى ءبىر كەزەك كونسەرت قويامىز، بيىل 4 -، 5 - ايدىڭ كەيبىر ۋاقىتتارىندا ءار كۇنى كەشتە ءبىر مايدان ارتىق كونسەرت قويدىق“. شينجياڭ تەاترحاناسىنىڭ قارجىگەرى، ”باتىس وڭىرگە ورالۋ“ كونسەرتىنىڭ فيلمگەرى چىن جيەنىڭ تانىستىرۋىنشا، بيىل ”باتىس وڭىرگە ورالۋ“دى تاماشالايتىن كورەرمەن 600 مىڭ ادام - رەتتەن اساتىنى مەجەلەنىپ وتىر ەكەن.

  تۇرپاننىڭ حۋانلى شىڭديان ساياحات، مادەنيەت شەكتى سەرىكتەستىگىنىڭ باسالقاسى لين جۇڭي جىبەك جولى سالتاناتى جەلىلەس ويىن - ساۋىعىنىڭ باس فيلم جاساۋشىسى. 2010 - جىلى ول كينو تۇسىرۋدەن ساياحاتتىق كونسەرت كاسىبىنە ويىستى. 2011 - جىلى ”تۇرپان سالتاناتى“ كونسەرتى رەسمي قويىلدى؛ 2013 - جىلى ”قاناس سالتاناتى“ كونسەرتى رەسمي قويىلدى. ”سەرىكتەستىكتىڭ ’سالتانات‘ شينجياڭ بولەگى كۇنى بۇگىنگە دەيىن ءبىر ميلليونعا جۋىق كورەرمەندى قابىلدادى“ دەدى لين جۇڭي. بۇگىندە ”قاناس سالتاناتى“ كوپتەگەن ساياحاتشىلاردىڭ بۋىرشىنعا بارعاندا، ءسوز جوق، كورەتىن كونسەرتىنە اينالدى.

  كەزەكتە ءۇرىمجى قالاسى جاساعان كولەمدى تابيعي كورىنىس تەاترى ”كۇنلۇندە كەزدەسۋ“ كورىنىسكە الىنىپ بولايىن دەدى. ءتىپتى دە كوپ ساياحاتتىق كونسەرت نىساندارى تۋىندى جاراتىپ، دايىندالۋدا. ال شينجياڭنىڭ ساياحات كونسەرت كاسىپورىندارى شينجياڭنان بۇكىل ەلگە بەت الدى. قازىر لين جۇڭيدىڭ جاسامپازدىق ۇجىمىنىڭ گانسۋ، نيڭشيا جانە چۇڭچيڭ سياقتى جەرلەردەگى كونسەرتتەرى دە رەسمي قويىلا باستادى.

كەشكى ساياحات بىرتىندەپ جاندانىپ

”كەشكى ەكونوميكا“عا قوزعاۋشى كۇش بەردى

  كەش باتىسىمەن، تۇرپان كارىز قۇدىعى ۇلتتىق سالت - سانا باقشاسى دىر - دۋمانعا شومدى. شاعىن الاڭدا، ءبيشى ارتيستەر، ساياحاتشىلار، قالا تۇرعىندارى بىرگە بيگە باستى؛ كارىز قۇدىعى جەر استى جولىنىڭ سالقىن لەبى بەتىڭدى وبەدى. ساياحاتشىلار سالقىن جەردە ءجۇرىپ كارىز قۇدىعىن تاماشالايدى، كوڭىلدەرى ەرەكشە كوتەرىڭكى. ”كۇندىز تۇرپاننىڭ ىستىعىنا قاقتالىپ، تۇندە كارىز قۇدىعىنىڭ سالقىن لەبىنەن ءلاززاتتاناسىز، مۇنداي كەشىرمە، شىنىندا، تاڭعاجايىپ!“ دەدى حۋناندىق ساياحاتشى لو يۇڭلي.

  كارىز قۇدىعىن كەشتە ساياحاتتاۋ نىسانى بيىل 4 - ايدا العا قويىلعاننان بەرى، ساياحاتشىلاردى كوپتەپ باۋرادى. قازىر كەشكى ساياحات، كەشكى بازار سياقتىلار تۇرپاننىڭ كەشىن ءتىپتى دە كورىكتەندىرە ءتۇستى.

  كۇندىز تاۋ، سۋ، ءشول، بايىرعى جۇرت سياقتىلاردى تاماشالاسا، كەش باتا ساياحاتشىلار كوشەلەرگە شىعىپ، كورىنىس وڭىرىندە، كورىنىس تۇيىنىندە ساياحاتتايدى... سوڭعى جىلداردان بەرى شينجياڭنىڭ جەر - جەرىندە كەشكى ساياحات نىسانى جاندانىپ، ساياحاتشىلاردىڭ تولىق ساياحاتتاپ تاماشالاۋىنا، شينجياڭنىڭ سالت - ساناسىن اناعۇرلىم شىنايى سەزىنۋىنە مۇمكىندىك جاسالىپ، تۇتاس وڭىرلىك ساياحاتتىڭ دامۋىنا تىڭ مازمۇن جانە فورما قوسىلدى.

  كەشكى ساياحات نىساندارى جاندانا ءتۇستى. قارامايلى دۇنيە جۇزىلىك سايتان كەرىش كورىنىس ءوڭىرى، قاناس كورىنىس ءوڭىرى سياقتىلاردىڭ ءبارى كەشكى ساياحات نىساندارىن جوبالاپ قۇرۋدا. دۇنيە جۇزىلىك سايتان كەرىش كورىنىس ءوڭىرى 10 ميلليون يۋان شاماسىندا قارجى قوسىپ، ياردان جەر بەدەرى وزەكتى كورىنىس وڭىرىندەگى 13 كيلومەترلىك سەيىل - سەرۋەن جەلىسى مەن جول بويىنداعى 20 نەشە جەردەگى كەسكىندەۋلى كورىنىس ورنىنا شىراقتار ورناتىپ، يارداننىڭ عاجايىپ تارتىمدىلىعىن شوعىرلى ايگىلەدى. كورىنىس وڭىرىندەگى دينازاۆەر جىلعاسى شىراق سالتاناتى نىسانىنا تاعى 15 ميلليون يۋان قارجى قوسپاقشى.

  ءۇرىمجى قالاسى سياقتى قالالاردىڭ شىراقپەن اجارلاۋ قۇرىلىسىن بارىنشا اتقارۋىنا ساي، ”كەشكى ەكونوميكا“نىڭ دامۋى دا تاماشا نەگىزگە يە بولدى. كەلەشەكتە وسى زامانعى سيفرلى تەحنيكادان پايدالانىپ، شىراق سالتاناتى، ويىن - ساۋىق سالتاناتى، ساۋدا كوشەسى كەشكى بازارى، شىراقپەن اجارلاۋ قۇرىلىسى، كەشكى كورىنىس اۋماعى سياقتىلاردى قالىپتاستىرۋ ارقىلى ءداستۇرلى ساياحات بايلىعىن ونان ارى رەتتەپ بىرىكتىرىپ، دەڭگەيىن جوعارىلاتىپ، سول ارقىلى ساياحات كوزەۋلى جەر بازار ونىمدەرىنىڭ كاسىپ سالاسى جەلىسىن ۇزارتىپ، كەشكى ساياحات ەكونوميكاسىنىڭ دامۋىنا دەم بەرۋگە بولادى.

  ”كەشكى ساياحات نىساندارى ساياحاتشىلاردىڭ كوزدەگەن جەردەگى بازارلاردا ايالداۋ ۋاقىتىن ۇزارتىپ، ساياحات كوزەۋلى جەرلەردەگى بازارلاردىڭ ساياحاتتىق تۇتىنۋىنىڭ ارتۋىن جەبەدى“، - دەدى اۆتونوميالى رايوندىق ساياحات قوعامىنىڭ ورىنباسار باستىعى، تيجارات قوعامىنىڭ باستىعى چىن جيانۋىن. ول جەر - جەردىڭ بار بايلىق ەرەكشەلىگى مەن ساياحاتشىلاردىڭ قاجەتىنە نەگىزدەلىپ، وزگەشە IP قۇنىنا يە مادەنيەت جاڭالىعىنداعى كەشكى ساياحات نىساندارىن اشىپ، وزەكتى ساياحات ونىمدەرىن قالىپتاستىرۋدى؛ سالا اتتاپ ”ساياحات+ مادەنيەت + ساۋدا“ سياقتى كوپ ءتۇرلى كاسىپ جاعدايىن توعىستىرىپ، نىسان جۇيەسى، قۇرىلعى جۇيەسى، قىزمەت وتەۋ جۇيەسى جانە حاۋىپسىزدىكتى قامتاماسىزداندىرۋ جۇيەسى قۇرىلىسىن ونان ارى كەمەلدەندىرۋدى ۇسىنىس ەتتى. ”پايدا تابۋ ۇلگىسىن ويداعىداي جوبالاپ، ۇسىنىلىم، ءوندىرىس سالىستىرماسى سياقتىلاردى عىلمي تۇجىرىمداۋ كەرەك. مۇنان دا ماڭىزدىسى، ساياحاتشىلاردى ايالداتۋمەن بىرگە، جەرگىلىكتى تۇتىنۋ قاجەتىنە دە ءمان بەرىپ، قوناق يەسى مەن قوناق بىرگە يگىلىكتەنەتىن تاماشا سەرۋەندەۋ - تىنىعۋ ورتاسىن قالىپتاستىرۋ كەرەك.

جاۋاپتى رەداكتور: سايراش تۇرارجان
  • 1
  • 2
  • 3
  • 4