شينجياڭعا باعىتتامالى كومەكتەسۋ: بارلىق گۇل شەشەك اتىپ، كوكتەم شۋاعىنا شومدى

  شينجياڭعا باعىتتامالى كومەكتەسۋ − مەملەكەتتىك ستراتەگيا، ءسوز جوق، ۇزاق ۋاقىت تاباندى بولىپ، شينجياڭعا باعىتتامالى كومەكتەسۋ قىزمەتىن ۇلتتار ىنتىماعىن كۇشەيتۋ ينجەنەرياسىنا اينالدىرۋ كەرەك.

  − شي جينپيڭ

        5 - ايدىڭ 25 - كۇنى شايار اۋدانى بوشىران زەردەلى اۋىل شارۋاشىلىق ماشينالارى شەكتى سەرىكتەستىگىنىڭ جۇمىسشىلارى ماقتا تەرۋ ماشيناسىن قۇراستىرۋدا. بۇل سەرىكتەستىكتى جىجياڭ ولكەسى جياشيڭ قالاسىنىڭ شينجياڭعا باعىتتامالى كومەكتەسۋگە قولباسشىلىق ەتۋ شتابى بىلتىر 2 - ايدا ەنگىزگەن، سول جىلى 9 - ايدا وندىرىسكە قوسىلعان، قازىر 142 ادامدى جۇمىسقا ورنالاستىردى. سۋرەتتى يۇي ليۋدۇڭ تۇسىرگەن

ءتىلشىمىز حان چينيان

  تيانشاننىڭ تۇستىگى مەن تەرىستىگىن ارالايتىن بولساڭىز، مەيلى شەت - شالعايعا ورنالاسقان شاعىن اۋىل، قالاشىق، الدە جاسىل جەلەك جامىلعان شاعىن قالا بولسىن، بارلىق جەردەن جاڭا كەزەكتى شينجياڭعا كومەكتەسۋ قىزمەتىنىڭ شينجياڭعا الا كەلگەن وزگەرىستەرىن بايقاي الاسىز.

  وزگەرىستىڭ استارىندا، شينجياڭعا كومەكتەسكەن ولكەلەر مەن قالالاردىڭ جانە شينجياڭداعى ءار ۇلت كادرلارى مەن جۇرتشىلىقتىڭ باس شۋجي شي جينپيڭنىڭ تاپسىرماسىن ەستەرىندە بەرىك ساقتاپ، پارتيا ورتالىق كوميتەتىنىڭ شينجياڭدى جونگە سالۋ جالپى جوباسىن بۇلجىتپاي دايەكتىلەندىرگەن، تياناقتاندىرعان جاندى امالياتى جاتىر. اسىرەسە، ورتالىقتىڭ شينجياڭ قىزمەتى جونىندەگى 2 - رەتكى اڭگىمە ماجىلىسىنەن بەرى، شينجياڭعا كومەكتەسۋ قىزمەتى ۇزدىكسىز تەرەڭدەپ، ناقتىلانىپ، سوتسياليستىك ءتۇزىمنىڭ ابزالدىلىعى تولىق ساۋلەلەندى.

شينجياڭعا كومەكتەسۋ قارجىسى حالىق تۇرمىسىن جاقسارتۋعا جۇمسالدى

  حىجيڭ اۋدانىنىڭ حىبەي جاڭا قىستاعىنا بارساڭىز، كوركەم كورىنىسىنە ءتانتى بولاسىز، تەپ - تەگىس اسفالت جول، جاڭاشا ۇلگىدە سالىنعان 2 قابات تۇرعىن ۇيلەر، رەتتى جوبالانعان كورىنىستىك جاياۋلار سەرۋەن كوشەسى...

  ”مالشىلارىمىز مۇنداي تۇرمىس كەشىرەدى دەگەن تۇسىمىزگە دە كىرمەگەن ءىس ەدى“. 5 - ايدىڭ 16 - كۇنى بايىنبۇلاق ساحاراسىنىڭ مالشىسى بارىنا ”قابات ۇيدە تۇرامىز، ەڭبەكاقى الامىز، ورتامىز تاماشا، شىنىمەن راقات!“، - دەدى كوتەرىڭكى كوڭىلمەن.

  ”قۇبىر سۋمەن قامداۋ، لاس سۋدى ىعىستىرۋ، جانار گاز، جىلۋمەن قامداۋ، ەلەكتر، حابارلاسۋ سياقتى قۇرىلعىلاردىڭ ءبارى بار“. شاعىن اۋماقتا سەرۋەندەپ جۇرگەن پاڭ فەي: جوبالاۋشىلار شىنىمەن كەمەلدى جوبالاعان! - دەدى تەبىرەنىپ.

  بۇگىنگى وزگەرىستەر جونىندە پاڭ فەي: ”مۇنداي جاقسى تۇرمىسقا كەنەلۋىمىزدى پارتيا مەن ۇكىمەتتىڭ قامقورلىعىنان، بۇكىل ەلىمىزدەگى ءار ۇلت حالقىنىڭ قولداپ - قۋاتتاۋىنان، شينجياڭعا كومەكتەسكەن ولكەلەر مەن قالالاردىڭ قالتقىسىز كومەگىنەن بولە قاراۋعا بولمايدى“، - دەدى اسەرلى سەزىممەن.

  بارلىق ىستە حالىق تۇرمىسىن ماڭىزدى ورىنعا قويۋ كەرەك. مەملەكەتتىڭ ءبىر تۇتاس ورنالاستىرۋى، شينجياڭعا كومەكتەسۋشى كۇشتەردى بىرىكتىرۋ، اۆتونوميالى رايوننىڭ باتىل تياناقتاندىرۋى ءار ۇلت بۇقاراسىنىڭ قيىنشىلىعىن شەشەتىن، ناقتى ىستەر تىندىراتىن، باقىت جاراتاتىن بىرىككەن كۇش بولىپ توعىستى.

  حالىق تۇرمىسىن الدىمەن ويلاستىرۋ − جاڭا كەزەكتى شينجياڭعا باعىتتامالى كومەكتەسۋ قىزمەتىنىڭ شىعار تۇيىنىنە جانە تابان تىرەر تياناعىنا اينالدى. ورتالىقتىڭ شينجياڭ قىزمەتى جونىندەگى 2 - رەتكى اڭگىمە ماجىلىسىنەن بەرى، شينجياڭعا كومەكتەسۋ نىساندارىنان 7527سى ارت - ارتىنان اتقارىلدى، شينجياڭعا كومەككە بەرىلگەن قارجى 67 ميلليارد 590 ميلليون يۋانعا جەتتى. حالىق تۇرمىسىنا تيىمدىلىك جاساۋ، نەگىزدى نىعايتۋ، جۇمىستاندىرۋدى جەبەۋ نىساندارى تياناقتانىپ، تامىر تارتىپ، شينجياڭنىڭ ەكونوميكالىق، قوعامدىق دامۋىنا قۇدىرەتتى قوزعاۋشى كۇش جانە ومىرشەڭدىك كۇش باعىشتادى.

  ”شينجياڭعا باعىتتامالى كومەكتەسۋ بۇقارانىڭ شىنايى قالاۋىنان شىقتى!“. ۇلۇقشات اۋدانى قىزىلوي اۋىلى عانجۇمان قىستاعى تۇرعىندار كوميتەتىنىڭ مەڭگەرۋشىسى تۇردالى قاسەن قىستاقتا جول جاقسارىپ، سەلبەستىك كووپەراتيۆى قۇرىلىپ، قىستاق تۇرعىندارىنىڭ جۇمىسقا ورنالاسۋ ورايى كوبەيىپ، اۋقاتتانۋ ءورىسىنىڭ كەڭەيگەندىگىن، اۋىلداستاردىڭ پارتيا ورتالىق كوميتەتىنە شىن جۇرەكتەن العىس ايتاتىندىعىن، شينجياڭعا باعىتتامالى كومەكتەسەتىن ولكەلەر مەن قالالارعا العىس ايتاتىندىعىن ءبىلدىردى.

كاسىپ سالاسىنىڭ تياناق تابۋى كەدەيلەردى سۇيەمەلدەۋ ونىمدىلىگىن كورنەكتىلەندىردى

  ”زاۆود ءۇيىمنىڭ قارسىسىندا عانا، قاسىندا بالاباقشا بار. ءار كۇنى تاڭەرتەڭ الدىمەن بالامدى بالاباقشاعا اپارىپ، ونان سوڭ زاۆودقا قىزمەتكە بارامىن، اي سايىن تۇراقتى ەڭبەكاقىم بار، وتباسىم مەن قىزمەتىمدى تەڭ الىپ كەلەمىن“. كونەءشار اۋدانى وعۇساق قالاشىعى تومەنگى وعۇساق قىستاعىنىڭ تۇرعىنى تۇنيساگۇل عوپۇر: ”زاۆودقا كىرىپ ىستەگەننەن بەرى وتباسىمنىڭ تۇرمىسى جاقسارىپ قالدى“، - دەدى.

  5 - ايدىڭ 20 - كۇنى ءتىلشى تۇنيساگۇل مەن قىستاقتاعى 100 نەشە ايەل جۇمىسشىنىڭ تىگىن ماشيناسىنىڭ الدىنا وتىرىپ الىپ، ينە ساباقتاپ، تىگىسىن جاتقىزىپ، كيىم تىگىپ جاتقاندىعىن، قيمىلدارىنا كوز ىلەسپەيتىندىگىن، تىگىن ماشينالارىنىڭ توقتاۋسىز جۇمىس ىستەپ جاتقاندىعىن كوردى.

  ”ءجۇرىڭىز، مەنىڭ جاڭا ءۇيىمدى كورىڭىز!“. زاۆود قاقپاسىنان شىعىپ جولدى كەسىپ وتە بەرە تۇنيساگۇلدىڭ جانعا جايلى اۋلاسىنا كەز بولدىق. قوناق بولمەسىنە سۋداي جاڭا سافا قويىلىپتى، ونىءوزىنىڭ ەڭبەكاقىسىنا ساتىپ الىپتى. ”مەن تاعى اقشا جيىپ، جاڭا جيھازدار ساتىپ الىپ، ءۇيىمدى جايناتا تۇسەمىن!“، - دەدى تۇنيساگۇل.

  ”جۇمىستاندىرۋ ويداعىداي بولماسا، حالىق تۇرمىسى تۇبەگەيلى جاقسارمايدى“، - دەدى قاشقار ايماقتىق پارتكومنىڭ ورىنباسار شۋجيى، گۋاڭدۇڭ ولكەسىنىڭ شينجياڭعا باعىتتامالى كومەكتەسۋ الدىڭعى شەپ قولباسشىلىق شتابىنىڭ باس قولباسشىسى حى يۇي.

  ورتالىقتىڭ شينجياڭ قىزمەتى جونىندەگى 2 - رەتكى اڭگىمە ماجىلىسىنەن بەرى، ساۋداگەر شاقىرىپ، قارجى باۋراۋ، كاسىپ سالاسىن دامىتۋ − شينجياڭعا باعىتتامالى كومەكتەسۋ قىزمەتىنىڭ كۇش سالۋ تۇيىنىنە اينالدى. شينجياڭعا كومەكتەسۋشى ءارقايسى ولكە، قالالار جاڭا ءادىس، ناقتى شارا اتقارىپ، ارتىقشىلىقتارىن ساۋلەلەندىرىپ، وزدەرىنىڭ ەرەكشەلىكتەرىن ايگىلەپ، توقىماشىلىق، جەڭىل ونەركاسىپ، ەلەكتروندىق ينفورماتسيا سىندى كاسىپ سالالارى كومەك قابىلدايتىن ورىندارعا ىركەس - تىركەس تابان تىرەدى. شينجياڭعا كومەكتەسەتىن كوپتەگەن ولكەلەردىڭ، قالالاردىڭ كاسىپورىندارى شينجياڭعا كەلىپ، ءار ۇلت جۇرتشىلىعىنىڭ جۇمىستانۋىنا تۇرتكى بولۋمەن قاتار، وزدەرىنىڭ دامۋ ورايىن دا قاراستىردى.

  قىسقا عانا 5 جىلدا شينجياڭعا باعىتتامالى كومەكتەسەتىن ولكە، قالالار كاسىپ سالاسى ارقىلى جۇمىستانۋدى جەبەۋ ءۇشىن شينجياڭعا كومەكتەسۋگە 14 ميلليارد 280 ميلليون يۋان قارجى ورنالاستىرىپ، ءتۇرلى كاسىپ سالاسى باقشا قۇرىلىسىنا قولداۋ كورسەتىپ، ارتىق ەڭبەككۇشتەن 200 مىڭ ادام - رەت جۇمىسقا قابىلدادى.

  كاسىپ سالاسى ارقىلى شينجياڭعا كومەكتەسۋدە كەدەيلەردى سۇيەمەلدەۋ قىزمەتىن ”بالىق بەرۋ“دەن ”بالىق اۋلاۋدى ۇيرەتۋ“گە قاراي ويىستىرىپ، كومەككە يە بولعان ورىنداردى ءتىپتى دە ويداعىداي ”قان جاساۋ“ يقۋاتىنا جانە ءتىپتى دە زور دامۋ كومەسكى كۇشىنە يە ەتىپ قانا قالماستان، تيانشاننىڭ تۇستىگى مەن تەرىستىگىندەگى ءار ۇلت بۇقاراسىنا ۇلى وتان شاڭىراعىنىڭ جىلۋىن سەزىندىردى.

اقىل - پاراسات ارقىلى شينجياڭعا كومەكتەسۋ دامۋ تەبىنىن ارتتىردى

  ”شاڭحايدان شينجياڭعا كومەككە كەلگەن شيپاگەرلەردىڭ باستاۋىندا، شيپاحانامىز كوپ ءتۇرلى تەحنيكادا ناتيجە جاراتتى“، - دەدى 5 - ايدىڭ 18 - كۇنى قاشقار ايماقتىق 2 - حالىق شيپاحاناسى پارتكومىنىڭ شۋجيى تاڭ شيانجياڭ تەبىرەنە سويلەپ، ”شاڭحايدىڭ قالتقىسىز كومەك بەرىپ، شيپاحانامىزدىڭ تەز دامۋىنا مۇمكىندىك جاساعاندىعىنا العىس ايتامىز“.

  شاڭحايداعى ءىرى شيپاحانالاردىڭ شيپاگەرلەرى قاشقارعا كەلگەندە، كوپ ءتۇرلى كەمەلدى تەحنيكالاردى الا كەلدى. شاڭحايدان شينجياڭعا كومەككە كەلگەن شيپاگەرلەر جەرگىلىكتى ەمدەۋ قىزمەتكەرلەرىمەن بىرگە قاشقاردىڭ كوپ كەزدەسەتىن اۋرۋلارعا دياگنوز قويۋ، ەمدەۋ ورەسىن جوعارىلاتىپ، ءىس جۇزىندىك ارەكەتتەرى ارقىلى ءار ۇلت بۇقاراسىنىڭ القاۋىنا يە بولدى.

  شينجياڭعا كومەككە كەلگەن شيپاگەرلەردىڭ كومەگىندە قاشقار ايماقتىق 2 - حالىق شيپاحاناسىنىڭ بۇيرەك اۋرۋلارى ءبولىمى ”جابدىق بولماۋ، ادام كۇشى بولماۋ، ماماندىق تەحنيكا بولماۋ“دان قازىرگى قۇرساق پەردەسىن ءسۇزۋ تەحنيكاسىنداعى قيىنشىلىقتان قامال الۋعا دەيىن بۇيرەك اۋرۋلارىن ەمدەۋ دەڭگەيى زور دارەجەدە جوعارىلادى.

  سونىمەن بىرگە، شينجياڭعا كومەكتەسەتىن ولكە، قالالار وزدەرىنىڭ ساپالى بايلىقتارىنىڭ اسەر ەتۋ، جەتەكتەۋ رولى ارقىلى دارىندىلاردىڭ ”ۇيىرمە ۇلگىسى“ندە شينجياڭعا كومەكتەسۋىن بەلسەندىلىكپەن اتقارىپ، كومەككە يە بولعان جەرلەردىڭ وقۋ - اعارتۋدان، ەمدەۋدەن قىزمەت وتەۋ قابىلەتىنىڭ تۇتاس تۇلعالى جوعارىلاۋىن جەبەدى.

  2016 - جىلى 7 ولكە، قالا ”ۇيىرمە ۇلگىسى“ندە شينجياڭعا كومەكتەسۋ ەمدەۋ دارىندىلارىنىڭ شينجياڭعا كەلۋ قىزمەتىن ورىستەتكەننەن بەرى، كومەككە يە بولعان شيپاحانالاردىڭ قاتەرلى، شۇعىل، سالماقتى ناۋقاستاردى قۇتقارۋ مولشەرى ورتا ەسەپپەن 2015 - جىلعى %88تەن قازىرگى %95تەن استامعا جەتىپ، جوتكەپ ەمدەۋ مولشەرى %6تەن %4.6كە تومەندەپ، تۇتاس رايونداعى بارلىق ايماق، وبلىس، قالالاردا تۇگەلدەي 3A دارەجەلى شيپاحانا بولۋداي تاريحي ناتيجە جاراتتى.

  اقىل - پاراسات ارقىلى شينجياڭعا كومەكتەسۋ، دارىندى ارقىلى شينجياڭعا كومەكتەسۋ − شينجياڭنىڭ دامۋداعى جۇمساق كۇشىن جوعارىلاتۋداعى ماڭىزدى شارا. 2015 - جىلى بەيجيڭ قالاسى، شاڭحاي قالاسى جەكە - جەكە كادر دارىندىلار ارقىلى ءۇرىمجى قالاسىنا، قارامايلى قالاسىنا باعىتتامالى كومەكتەستى؛ شاندۇڭ ولكەسى، تيانجين قالاسى جەكە - جەكە بيڭتۋان 12 - شىسىنا، 11 - شىسىنا باعىتتامالى كومەكتەسىپ، كومەك العان ايماق، اۋدان سىندى ەكى دارەجەلى ورىندى جانە بيڭتۋاننىڭ شى دارەجەلى كادر دارىندىلارىن شينجياڭعا كومەكتەسۋمەن جاپپاي قامتۋدى جۇزەگە اسىردى.

  ارالاسۋ، ىشتەسۋ، توعىسۋ ۇزدىكسىز تەرەڭدەپ، شينجياڭعا كومەكتەسەتىن ولكە، قالالاردىڭ قاتىستى قالا (رايون)، اۋداندارى مەن كومەككە يە بولعان 82 اۋدان (قالا) جۇپ قۇراۋ قاتىناسىن ورناتتى، ”كولدەنەڭ باعىتى جيەككە دەيىنگى، تىك باعىتى تۇپكە دەيىنگى“ شينجياڭعا كومەكتەسۋدىڭ كوپ ساتىلى جاڭا جاعدايى قالىپتاسىپ، شينجياڭ مەن ىشكى جەرلەردىڭ اراسىنداعى اۋىس - كۇيىستى، بارىس - كەلىستى جەبەدى ءارى ۇلتتار ىنتىماعى گۇلىن قۇلپىرتا ءتۇستى.

جاۋاپتى رەداكتور: نۇربولات قابىل